Read Ndebele-IBhayibhili Elingcwele 2006 2 Kwebekorinte 2 Bible Online

2 Kwebekorinte 2 - Ndebele-IBhayibhili Elingcwele 2006 bible

2 Kwebekorinte 2

¹Ngasengizimisela lokhu, ukungaphindi ngize kini esizini.

²Ngoba uba mina ngilibangela usizi, ngubani-ke ongithokozisayo, ngaphandle kobangelwe yimi usizi?

³Njalo ngalibhalela into le efananayo ukuze ekufikeni kwami ngingabi losizi kulabo abamele bangithokozise, ngileqiniso ngani lonke, ukuthi intokozo yami ingeyenu lonke.

⁴Ngoba esizini olukhulu lekudabukeni kwenhliziyo ngalibhalela ngezinyembezi ezinengi, kungeyisikho ukuthi libangelwe usizi, kodwa ukuze lazi uthando olwengezelelweyo engilalo kini.

⁵Kodwa uba ekhona obange usizi, kabanganga usizi kimi, kodwa nganxanye (ukuze ngingathwalisi nzima) kini lonke.

⁶Kumanele onjalo lokhukukhuza okungokwabanengi;

⁷ukuze endaweni yalokho kungcono lithethelele liduduze, hlezi onjalo aginywe lusizi olwengezelelweyo.

⁸Ngakho ngiyalincenga ukuthi liqinise uthando kuye.

⁹Ngoba ngalokhu ngabhala futhi, ukuze ngazi ubufakazi benu, uba lingabalalelayo ezintweni zonke.

¹⁰Lalowo elimthethelela ulutho, lami ngiyamthethelela; ngoba mina futhi uba ngithethelele ulutho, lowo engimthethelelayo, ngikwenza ngenxa yenu phambi kobuso bukaKristu,

¹¹ukuze singasetshenziswa nguSathane; ngoba kasisibo abangazi ngamaqhinga akhe.

¹²Lekufikeni kwami eTrowasi ngevangeli likaKristu, kwathi sengivulelwe umnyango eNkosini,

¹³kangibanga lokuphumula emoyeni wami, ngoba angimtholanga uTitosi umzalwane wami; kodwa ngasengivalelisa kibo ngasuka ngaya eMakedoniya.

¹⁴Njalo kabongwe uNkulunkulu osikhokhelayo ngesikhathi sonke ekunqobeni kuKristu, njalo ebonakalisa ngathi iphunga lolwazi lwakhe endaweni zonke.

¹⁵Ngoba siliphunga elimnandi likaKristu kuNkulunkulu kulabo abasindiswayo lakulabo ababhubhayo;

¹⁶kulaba iphunga lokufa ekufeni, lakwabanye iphunga elimnandi lempilo empilweni. Njalo ngubani olingene lezizinto?

¹⁷Ngoba kasinjengabanengi, abalonayo ilizwi likaNkulunkulu. Kodwa njengebuqothweni, njalo njengokuvela kuNkulunkulu phambi kukaNkulunkulu, sikhuluma sikuKristu.