Read Ndebele-IBhayibhili Elingcwele 2006 2 Kwebekorinte 6 Bible Online

2 Kwebekorinte 6 - Ndebele-IBhayibhili Elingcwele 2006 bible

2 Kwebekorinte 6

¹Sisebenza-ke ndawonye lathi siyancenga ukuthi lingawemukeli ngeze umusa kaNkulunkulu;

²ngoba uthi: Ngesikhathi esihle ngikuzwile, langosuku losindiso ngakusiza; khangelani, khathesi yisikhathi esihle isibili; khangelani khathesi lusuku losindiso.

³Kasikhubekisi ngalutho ngitsho, ukuze inkonzo ingasolwa;

⁴kodwa kukho konke sizibonakalisa njengezikhonzi zikaNkulunkulu, ekubekezeleni okukhulu, ezinhluphekweni, ebunzimeni, encindezelweni,

⁵ekutshayweni, ekubotshweni, eziphithiphithini, ekusebenzeni nzima, ekungalalini, ekuzileni ukudla,

⁶ekuhlambulukeni, elwazini, ekubekezeleni, ebubeleni, kuMoya oNgcwele, ethandweni olungazenzisiyo,

⁷elizwini leqiniso, emandleni kaNkulunkulu; ngezikhali zokulunga kwesokunene lakwesokhohlo,

⁸ngodumo langehlazo, ngokuthukwa langokudunyiswa; njengabakhohlisi, kanti abaqinisileyo;

⁹njengabangaziwayo, kanti abaziwayo kakhulu; njengabafayo, kanti khangelani siyaphila; njengabalaywayo, kanti abangabulawayo;

¹⁰njengabalosizi, kodwa abathokoza njalonjalo; njengabayanga, kodwa abanothisa abanengi; njengabangelalutho, kanti abalakho konke.

¹¹Umlomo wethu uvulekele lina, beKorinte, inhliziyo yethu yenziwe banzi.

¹²Kalivinjelwanga yithi, kodwa livinjelwe emibilini yenu.

¹³Njalo ngokwenanana okufananayo, ngikhuluma njengebantwaneni, lani yenziwani banzi.

¹⁴Lingabotshwa ngokungalingani ejogweni labangakholwayo; ngoba kulokuhlanganyela bani ukulunga lokungalungi? Kulokuhlanganyela bani ukukhanya lobumnyama?

¹⁵Njalo uKristu ulokuzwana bani loBheliyali? Kumbe ulesabelo bani okholwayo longakholwayo?

¹⁶Njalo kulokuvumelana bani ithempeli likaNkulunkulu lezithombe? Ngoba lina lilithempeli likaNkulunkulu ophilayo, njengokutsho kukaNkulunkulu ukuthi: Ngizahlala kibo, ngizabhoda phakathi kwabo; sengizakuba nguNkulunkulu wabo, bona-ke bazakuba ngabantu bami.

¹⁷Ngakho phumani phakathi kwabo lehlukaniswe, itsho iNkosi, lingathinti okungcolileyo; mina-ke ngizalemukela,

¹⁸futhi ngizakuba nguBaba kini, lina selizakuba kimi ngamadodana lamadodakazi, itsho iNkosi uSomandla.