Read Ndebele-IBhayibhili Elingcwele 2006 Kwebegalatiya 3 Bible Online

Kwebegalatiya 3 - Ndebele-IBhayibhili Elingcwele 2006 bible

Kwebegalatiya 3

¹Hawu maGalathiya ayizithutha, ngubani oliloyileyo ukuze lingalaleli iqiniso, abekwa obala phambi kwamehlo enu uJesu Kristu ebethelwe phakathi kwenu?

²Yilokhu kuphela engithanda ukukufunda kini ukuthi: Lemukela uMoya ngemisebenzi yomlayo yini, loba ngokuzwa kokholo?

³Kanti liyizithutha kangaka? Seliqalile ngoMoya selipheleliswa ngenyama yini?

⁴Lahlupheka izinto ezinengi kangaka ngeze yini? Uba-ke ngitsho kungeze.

⁵Ngakho yena olinika uMoya losebenza amandla phakathi kwenu, kungaba emisebenzini yomlayo yini, kumbe ekuzweni kokholo?

⁶NjengoAbrahama wakholwa kuNkulunkulu, kwasekubalelwa kuye ukuthi yikulunga.

⁷Ngakho liyazi ukuthi labo abangabokholo, bona bangabantwana bakaAbrahama.

⁸Lombhalo ubona ngaphambili ukuthi uNkulunkulu ulungisisa abezizwe ngokholo, watshumayela ivangeli ngaphambili kuAbrahama wathi: Izizwe zonke zizabusiswa kuwe.

⁹Ngakho abangabokholo babusiswa kanye loAbrahama okholwayo.

¹⁰Ngoba bonke abemisebenzini yomlayo bangaphansi kwesiqalekiso; ngoba kulotshiwe ukuthi: Uqalekisiwe wonke ongemi njalo kukho konke okulotshiweyo encwadini yomlayo ukukwenza.

¹¹Njalo kusobala ukuthi ngomlayo kakulamuntu olungisiswayo phambi kukaNkulunkulu; ngoba kuthiwa: Olungileyo uzaphila ngokholo;

¹²kodwa umlayo kawusiwo wokholo, kodwa kuthiwa: Umuntu owenza lezizinto uzaphila kuzo.

¹³UKristu wasihlenga kusiqalekiso somlayo, esebeyisiqalekiso esikhundleni sethu; ngoba kulotshiwe ukuthi: Uqalekisiwe wonke olenga esihlahleni;

¹⁴ukuze kuthi isibusiso sikaAbrahama sifike kwabezizwe ngoKristu Jesu, ukuze semukele isithembiso sikaMoya ngokholo.

¹⁵Bazalwane, ngikhuluma njengokomuntu; ngitsho isivumelwano somuntu esiqinisiweyo, kakho o si chithayo loba o s engezelelayo.

¹⁶Njalo izithembiso zakhulunywa kuAbrahama lenzalweni yakhe. Katsho ukuthi: Lezinzalweni, njengezinengi, kodwa njengeyodwa ukuthi: Lenzalweni yakho, enguKristu.

¹⁷Lalokho ngithi: Umlayo oweza emva kweminyaka engamakhulu amane lamatshumi amathathu kawusichithi isivumelwano esaqiniswa nguNkulunkulu kuKristu ngaphambili, usenze isithembiso sibe yize.

¹⁸Ngoba uba ilifa livela emlayweni, alisaveli esithembisweni; kodwa uNkulunkulu wa li nika uAbrahama ngesithembiso.

¹⁹Pho, umlayo uyini? Wengezwa ngenxa yeziphambeko, kuze kufike inzalo eyanikwa isithembiso; wamiswa ngezingilosi esandleni somlamuli.

²⁰Kodwa umlamuli kayisuye woyedwa, kodwa uNkulunkulu munye.

²¹Pho umlayo uphambene lezithembiso zikaNkulunkulu yini? Phinde ! Ngoba uba wawunikiwe umlayo olamandla okuphilisa, isibili ukulunga ngabe kuvela ngomlayo.

²²Kodwa umbhalo uvalele konke ngaphansi kwesono, ukuze isithembiso esivela ngokholo lukaJesu Kristu siphiwe abakholwayo.

²³Kodwa kungakafiki ukholo, sasilondolozwe ngaphansi komlayo sasivalelwe kuze kube sekholweni obeluzakwembulwa.

²⁴Ngakho umlayo wawungumeluleki wethu kuKristu, ukuze silungisiswe ngokholo;

²⁵kodwa selufikile ukholo, kasisekho ngaphansi kukameluleki.

²⁶Ngoba lonke lingabantwana bakaNkulunkulu ngokholo kuKristu Jesu.

²⁷Ngoba lonke elabhabhathizelwa kuKristu, lembethe uKristu;

²⁸kakukho umJuda lomGriki, kakukho obotshiweyo lokhululekileyo, kakukho owesilisa lesifazana; ngoba lina lonke limunye kuKristu Jesu.

²⁹Uba-ke lingabakaKristu, ngakho liyinzalo kaAbrahama, njalo liyizindlalifa njengokwesithembiso.