Read Ndebele-IBhayibhili Elingcwele 2006 Kwebegalatiya 5 Bible Online

Kwebegalatiya 5 - Ndebele-IBhayibhili Elingcwele 2006 bible

Kwebegalatiya 5

¹Ngakho manini liqine enkululekweni uKristu asikhulula ngayo, lingabuyi libotshelwe futhi ejogweni lobugqili.

²Khangelani, mina Pawuli ngithi kini, uba lisokwa, uKristu kayikulisiza ngalutho.

³Ngiyafakaza-ke futhi kumuntu wonke osokwayo, ukuthi ulomlandu wokwenza umlayo wonke.

⁴Likhutshiwe kuKristu, elilungisiswa ngomlayo; liwile emuseni.

⁵Ngoba thina ngoMoya silindele ngokholo ithemba lokulunga.

⁶Ngoba kuKristu Jesu ukusoka kumbe ukungasoki kakulamandla, kodwa ukholo olusebenza ngothando.

⁷Beligijima kuhle; ngubani olivimbele ukuthi lingalaleli iqiniso?

⁸Lokhukuhuga kakuveli kolibizayo.

⁹Imvubelo eyingcosana ibilisa inhlama yonke.

¹⁰Mina ngilethemba ngani eNkosini, ukuthi kaliyikunakana okwehlukeneyo; kodwa lowo olihluphayo uzathwala isigwebo, loba engubani.

¹¹Kodwa mina, bazalwane, uba ngisatshumayela ukusoka, ngisazingelelwani? Ngakho isikhubekiso sesiphambano sisusiwe.

¹²Sengathi abalihluphayo bangazithena labo.

¹³Ngoba lina labizelwa enkululekweni, bazalwane; kuphela lingenzi inkululeko ibe lithuba enyameni, kodwa ngothando sizanani.

¹⁴Ngoba umlayo wonke ugcwaliseka elizwini linye, kulokhu ukuthi: Wothanda umakhelwane wakho njengalokhu uzi thanda wena.

¹⁵Kodwa uba lilumana lidlana, qaphelani ukuthi lingaqedwa omunye ngomunye.

¹⁶Kodwa ngithi: Hambani ngoMoya, lingagcwalisi lakanye inkanuko zenyama.

¹⁷Ngoba inyama ikhanuka okuphambene loMoya, loMoya okuphambene lenyama; njalo lezizinto ziphambene, ukuze lingenzi izinto elizifunayo.

¹⁸Kodwa uba likhokhelwa nguMoya, kalikho ngaphansi komlayo.

¹⁹Imisebenzi yenyama-ke isobala, eyi le: Ukufeba, ukuphinga, ukungcola, amanyala,

²⁰ukukhonza izithombe, ukuthakatha, ubutha, inkani, umona, ulaka, ukubanga, ukuxabana, ukubhazuka,

²¹umhawu, ukubulala, ukudakwa, ukuminza, lezinye izinto ezinjalo; engilitshela ngakho ngaphambili, njengoba ngatsho futhi ngaphambili, ukuthi abenza izinto ezinje kabayikulidla ilifa lombuso kaNkulunkulu.

²²Kodwa isithelo sikaMoya luthando, intokozo, ukuthula, ukubekezela, ububele, ukulunga, ukholo,

²³ubumnene, ukuzithiba; kokunje kakulamlayo.

²⁴Kodwa abakaKristu babethele inyama kanye lokuhugeka lezinkanuko.

²⁵Uba siphila ngoMoya, njalo asihambe ngoMoya.

²⁶Kasingazikhukhumezi, siqalane, sifelane umona.