Read Ndebele-IBhayibhili Elingcwele 2006 Kwebe-efesu 6 Bible Online

Kwebe-efesu 6 - Ndebele-IBhayibhili Elingcwele 2006 bible

Kwebe-efesu 6

¹Bantwana, lalelani abazali benu eNkosini; ngoba lokhu kulungile.

²Hlonipha uyihlo lonyoko, okungumlayo wokuqala olesithembiso,

³ukuze kube kuhle kuwe, njalo uphile isikhathi eside emhlabeni.

⁴Lani bobaba, lingabathukuthelisi abantwana benu, kodwa libondle emlayweni lemfundisweni yeNkosi.

⁵Zisebenzi, lalelani amakhosi enu ngokwenyama, ngokwesaba langokuthuthumela, ebuqothweni benhliziyo zenu, njengakuKristu;

⁶kungeyisikho njengokukhonza amehlo njengabathokozisa abantu, kodwa njengezisebenzi zikaKristu, zisenza intando kaNkulunkulu ngenhliziyo,

⁷lisebenza ngenhliziyo enhle kungathi kuseNkosini njalo kungeyisikho kubantu;

⁸lisazi ukuthi loba yini enhle ngulowo lalowo angayenza, okunjalo uzakwemukela eNkosini, loba eyisigqili, loba engokhululekileyo.

⁹Lani makhosi, yenzani izinto ezifananayo kuzo, liyekele ukuzisongela; lisazi ukuthi leyenu iNkosi isemazulwini, njalo ukubandlulula umuntu kakukho kuyo.

¹⁰Elokucina, bazalwane bami, qinani eNkosini, lebuninimandleni bamandla ayo.

¹¹Hlomani izikhali zonke zikaNkulunkulu, ukuze libe lamandla okumelana lobuqili bukaSathane;

¹²ngoba kasibindani legazi lenyama, kodwa lemibuso, lamandla, lababusi balumhlaba wobumnyama balesisikhathi, labomoya ababi e ndaw eni zezulu.

¹³Ngakho hlomani izikhali zonke zikaNkulunkulu, ukuze libe lamandla okugxila esukwini olubi, lokuze kuthi lapho seliqede konke lime.

¹⁴Ngakho manini, inkalo zenu zibotshiwe ngeqiniso, lifakile isivikelo sesifuba sokulunga,

¹⁵njalo ligqokise inyawo zenu ngokulunga kwevangeli lokuthula;

¹⁶phezu kwakho konke selithethe isihlangu sokholo, elizakuba lamandla okucitsha ngaso yonke imitshoko evuthayo yomubi.

¹⁷Njalo thathani ikhowa losindiso, lenkemba kaMoya, eyilizwi likaNkulunkulu,

¹⁸ngawo wonke umkhuleko lonxuso likhuleka isikhathi sonke kuMoya, lakulokhu lilinde ngesineke sonke lonxuso ngabangcwele bonke,

¹⁹langami, ukuze ngiphiwe ilizwi ekuvuleni umlomo wami ngesibindi ukuze ngazise imfihlo yevangeli,

²⁰engiyisithunywa ngalo esisemaketaneni, ukuze ngikhulume ngesibindi kulo, njengoba kungifanele ukuthi ngikhulume.

²¹Kodwa ukuze lani lazi izinto eziqondana lami, engikwenzayo, uzalitshela konke uTikiko umzalwane othandekayo lesikhonzi esithembekileyo eNkosini;

²²engimthuma kini ngakhona lokhu, ukuze lazi izinto eziqondana lathi, lokuthi aduduze inhliziyo zenu.

²³Ukuthula kakube kubazalwane, lothando kanye lokholo oluvela kuNkulunkulu uBaba leNkosini uJesu Kristu.

²⁴Umusa kawube kubo bonke abathanda iNkosi yethu uJesu Kristu ngokungonakaliyo. Ameni.