Read Ndebele-IBhayibhili Elingcwele 2006 Kwebefilipi 3 Bible Online

Kwebefilipi 3 - Ndebele-IBhayibhili Elingcwele 2006 bible

Kwebefilipi 3

¹Elokucina, bazalwane bami, thokozani eNkosini. Ukulibhalela izinto ezifananayo, mina kakungidinisi, kodwa lina kuyaliqinisa.

²Nanzelelani izinja, linanzelele izisebenzi ezimbi, linanzelele ukusika;

³ngoba thina siyikusoka, esikhonza uNkulunkulu ngoMoya, siziqhenya kuKristu Jesu, njalo singathembeli enyameni;

⁴lanxa mina ngilethemba futhi enyameni; uba omunye ecabanga ukuthemba enyameni, mina kakhulu;

⁵ngasokwa ngosuku lwesificaminwembili, ngingowohlanga lukaIsrayeli, owesizwe sakoBhenjamini, umHebheru wamaHebheru, ngokomlayo umFarisi,

⁶ngokokukhuthala ngazingela ibandla, ngokokulunga okusemlayweni ngingasoleki.

⁷Kodwa izinto ezaziyinzuzo kimi, lezo ngazibala njengencithakalo ngenxa kaKristu.

⁸Yebo isibili, futhi ngikubala konke njengencithakalo ngenxa yobuhlekazi bolwazi lukaKristu Jesu iNkosi yami; okungenxa yakhe ngilahlekelwe yikho konke, njalo ngakuthatha njengezibi, ukuze ngizuze uKristu,

⁹njalo ngificwe kuye, ngingelakho okwami ukulunga okuvela emlayweni, kodwa lokho okungokholo lukaKristu, ukulunga okuvela kuNkulunkulu ngokholo;

¹⁰ukuze ngimazi yena lamandla okuvuka kwakhe, lokuhlanganyela kwenhlupheko zakhe, ngenziwe ngifuze ukufa kwakhe,

¹¹uba kungenzeka ngifinyelele ekuvukeni kwabafileyo.

¹²Kangitsho ukuthi sengi ku bambile, kumbe ukuthi sengiphelelisiwe; kodwa ngiya ku xotsha, ukuthi futhi ngingakubambisisa lokho engabanjisiselwa khona nguKristu Jesu.

¹³Bazalwane, mina kangibali ukuthi mina uqobo sengi ku bambisisile; kodwa kunye engikwenzayo, ngikhohlwa okungemuva, ngizelulela kokungaphambili,

¹⁴ngigijimela umudwa ngokunxwanela, emvuzweni wobizo lwaphezulu lukaNkulunkulu kuKristu Jesu.

¹⁵Ngakho ngobunengi bethu esesiphelele, kasikhumbule lokhu; njalo uba licabanga ulutho olwehlukeneyo, lalokhu uNkulunkulu uzalembulela khona;

¹⁶kodwa kulokhu esesifike kukho, kasihambeni ngesimiso esifananayo, sikhumbule intonye.

¹⁷Banini ngabahlanganyeli abanga balingiseli bami, bazalwane, njalo baqaphelisiseni abahamba ngokunjalo, njengoba lilathi njengesibonelo.

¹⁸Ngoba abanengi bahamba, engalitshela kanengi ngabo, lakhathesi ngitsho ngezinyembezi ngithi, ba yizitha zesiphambano sikaKristu;

¹⁹abakuphela kwabo kuyikubhujiswa, abankulunkulu wabo uyisisu, lodumo lwabo lusehlazweni labo, abacabanga izinto zomhlaba.

²⁰Ngoba ikithi lisemazulwini, lalapho esilindele ukuthi uMsindisi avele khona, iNkosi uJesu Kristu;

²¹ozaphendula umzimba wethu wobuphansi, ukuze ufanane lomzimba wakhe wenkazimulo, njengokusebenza elamandla ngitsho okwehlisela ngaphansi kwakhe zonke izinto.