Read Ndebele-IBhayibhili Elingcwele 2006 Kwebefilipi 4 Bible Online

Kwebefilipi 4 - Ndebele-IBhayibhili Elingcwele 2006 bible

Kwebefilipi 4

¹Ngakho, bazalwane bami abathandekayo labalangathwayo, intokozo lomqhele wami, manini liqine ngokunjalo eNkosini, bathandekayo.

²Ngiyamncenga uYuwodiya, njalo ngiyamncenga uSintike, ukuthi babe lomqondo munye eNkosini.

³Ngiyakucela-ke lawe, mnakwethu oqotho, siza labo abesifazana, abasebenza kakhulu kanye lami evangelini, kanye loKlementi, lezinye izisebenzi kanye lami, amabizo azo asencwadini yempilo.

⁴Thokozani eNkosini njalonjalo; ngiyaphinda ngithi: Thokozani.

⁵Ukubekezela kwenu kakwaziwe yibo bonke abantu. INkosi iseduze.

⁶Lingakhathazeki ngalutho, kodwa ezintweni zonke, izicelo zenu kazaziwe kuNkulunkulu ngomkhuleko langonxuso kanye lokubonga,

⁷lokuthula kukaNkulunkulu, okudlula ukuqedisisa konke, kuzalondoloza inhliziyo zenu lemicabango yenu kuKristu Jesu.

⁸Elokucina, bazalwane, konke okuliqiniso, konke okuhloniphekayo, konke okulungileyo, konke okuhlambulukileyo, konke okuhle, konke okulodumo oluhle, uba kukhona okuhle njalo uba kukhona okudumisekayo, nakanani ngakho lokhu;

⁹lelakufundayo njalo lakwemukela futhi lakuzwa laselikubona kimi, zenzeni lezizinto; loNkulunkulu wokuthula uzakuba lani.

¹⁰Kodwa ngiyathokoza kakhulu eNkosini, ukuthi khathesi selize lavuselela ukunginanzelela, ebelinanzelela kambe, kodwa laswela ithuba.

¹¹Kakusikho ukuthi ngitsho mayelana lenswelo; ngoba mina sengifundile ukuthi ngeneliswe ezintweni engikuzo.

¹²Ngiyakwazi konke ukuthotshiswa, futhi ngiyakwazi ukuba lokunengi kakhulu; kukho konke lezintweni zonke sengifundisiwe futhi ukusutha lokulamba, lokuba lokunengi kakhulu lokuswela.

¹³Ngingakwenza konke ngoKristu engiqinisa.

¹⁴Kodwa lenze kuhle ngokuhlanganyela ekuhluphekeni kwami.

¹⁵Liyazi futhi lani, beFiliphi, ukuthi ekuqaleni kwevangeli, ekusukeni kwami eMakedoniya, kwakungekho bandla elahlanganyela lami endabeni yokupha lokwemukela, ngaphandle kwenu lodwa;

¹⁶ngoba laseThesalonika lathumela ekusweleni kwami kanye njalo la phinda.

¹⁷Kungesikuthi ngidinga isipho, kodwa ngidinga isithelo esengeza isikhwama senu.

¹⁸Kodwa ngemukele konke njalo ngengezelelwe; ngigcwele, ngengikwemukele kuEpafrodithu izinto ezivela kini, uqhatshi olumnandi, umnikelo owemukelekayo, othabisayo kuNkulunkulu.

¹⁹Kodwa uNkulunkulu wami uzagcwalisa yonke inswelo yenu njengokwenotho yakhe ebukhosini, kuKristu Jesu.

²⁰Akube-ke kuNkulunkulu loBaba wethu udumo kuze kube nini lanini. Ameni.

²¹Bingelelani wonke ongcwele okuKristu Jesu. Abazalwane abalami bayalibingelela.

²²Bonke abangcwele bayalibingelela, kodwa ikakhulu labo abendlu kaKesari.

²³Umusa weNkosi yethu uJesu Kristu kawube lani lonke. Ameni.