Read Ndebele-IBhayibhili Elingcwele 2006 1 kwebethesalonika 5 Bible Online

1 kwebethesalonika 5 - Ndebele-IBhayibhili Elingcwele 2006 bible

1 kwebethesalonika 5

¹Kodwa ngezikhathi langemizuzu, bazalwane, kalisweli ukuthi libhalelwe,

²ngoba lina uqobo liyazi kuhle kakhulu ukuthi usuku lweNkosi luzafika ngokunjalo njengesela ebusuku;

³ngoba nxa besithi: Ukuthula lokuhlala kuhle, khona ukubhujiswa okujumayo kuzabehlela, njengomhelo kowesifazana okhulelweyo, njalo kabasoze baphunyuke.

⁴Kodwa lina, bazalwane, kalikho emnyameni, ukuze lolosuku luliphuthume njengesela;

⁵lina lonke lingabantwana bokukhanya labantwana bemini; kasisibo abobusuku loba abobumnyama;

⁶ngakho-ke asingalali njengabanye labo, kodwa asilinde siqonde.

⁷Ngoba abalalayo balala ebusuku; labadakwayo badakwa ebusuku.

⁸Kodwa thina esingabemini, asiqonde, sifake isivikelo sesifuba sokholo lothando, lethemba losindiso libe likhowa,

⁹ngoba uNkulunkulu kasimiselanga ulaka, kodwa ukuzuza usindiso ngeNkosi yethu uJesu Kristu,

¹⁰owasifelayo, ukuze loba siphapheme loba silele, siphile kanye laye.

¹¹Ngakho khuthazanani, lakhane, njengoba lani likwenza.

¹²Kodwa siyalincenga, bazalwane, ukuthi libazi labo abasebenza nzima phakathi kwenu, labaliphathayo eNkosini, labalelulekayo,

¹³njalo libahlonipha kakhulu okwedlula amalawulo ethandweni ngenxa yomsebenzi wabo. Hlalisanani ngokuthula.

¹⁴Kodwa siyalikhuthaza, bazalwane, lulekani abangelamthetho, liduduze abadanileyo, lisekele ababuthakathaka, libekezelele bonke.

¹⁵Qaphelani ukuthi kungabi khona ophindisela omunye okubi ngokubi; kodwa dingisisani ngesikhathi sonke okuhle lomunye komunye lakibo bonke.

¹⁶Thokozani njalonjalo;

¹⁷khulekani lingaphezi;

¹⁸bongani kukho konke; ngoba lokhu kuyintando kaNkulunkulu kuKristu Jesu ngani.

¹⁹Lingamcitshi uMoya;

²⁰lingadeleli iziprofetho;

²¹hlolisisani konke; libambelele kokuhle;

²²dedani kukho konke ukubonakala kobubi.

²³Kungathi uNkulunkulu wokuthula uqobo alenze libe ngcwele ngokupheleleyo; njalo kungathi umoya wenu wonke lomphefumulo lomzimba kungalondolozwa kungasoleki ekufikeni kweNkosi yethu uJesu Kristu.

²⁴Uthembekile yena olibizayo; laye oza kw enza lokhu.

²⁵Bazalwane, sikhulekeleni.

²⁶Bingelelani abazalwane bonke ngokwanga okungcwele.

²⁷Ngiyalifungisa ngeNkosi, ukuthi lincwadi ifundwe kubo bonke abazalwane abangcwele.

²⁸Umusa weNkosi yethu uJesu Kristu kawube lani. Ameni.