Read Ndebele-IBhayibhili Elingcwele 2006 Ujotjhuwa 13 Bible Online

Ujotjhuwa 13 - Ndebele-IBhayibhili Elingcwele 2006 bible

Ujotjhuwa 13

¹UJoshuwa wayesemdala eleminyaka eminengi. I Nkosi yasisithi kuye: Usumdala, uleminyaka eminengi, kusasele ilizwe elikhulu kakhulu ukudla ilifa lalo.

²Yileli ilizwe eliseleyo: Yonke imingcele yamaFilisti, leGeshuri yonke,

³kusukela eShihori eliphambi kweGibhithe, kusiya emngceleni weEkhironi enyakatho, elibalelwa kumaKhanani; ababusi abahlanu bamaFilisti, abeGaza, labeAshidodi, abeAshikeloni, abeGathi, labeEkhironi, labeAvi,

⁴kusukela eningizimu, ilizwe lonke lamaKhanani, leMeyara elingelamaSidoni, kuze kufike eAfeki, kuze kube semngceleni wamaAmori,

⁵lelizwe lamaGebali, leLebhanoni lonke, kusiya empumalanga, kusukela eBhali-Gadi ngaphansi kwentaba yeHermoni, kusiya ekungeneni kweHamathi.

⁶Bonke abakhileyo ezintabeni, kusukela eLebhanoni kusiya eMisirefothi-Mayimi, wonke amaSidoni, mina ngizabaxotsha elifeni phambi kwabantwana bakoIsrayeli. Kuphela ulabele uIsrayeli ngenkatho libe yilifa, njengoba ngikulayile.

⁷Ngakho-ke yehlukanisa ilizwe leli libe yilifa ezizweni eziyisificamunwemunye lengxenye eyodwa kwezimbili yesizwe sakoManase.

⁸Kanye labo abakoRubeni labakoGadi bemukela ilifa labo, uMozisi owabanika lona, ngaphetsheya kweJordani ngempumalanga, njengalokho uMozisi inceku ye Nkosi wabanika:

⁹Kusukela eAroweri esekhunjini lwesifula seArinoni, lomuzi ophakathi kwesifula, lamagceke wonke eMedeba kuze kube seDiboni,

¹⁰lemizi yonke kaSihoni inkosi yamaAmori owabusa eHeshiboni, kuze kube semngceleni wabantwana bakoAmoni,

¹¹leGileyadi lomngcele wamaGeshuri lamaMahakathi lentaba yonke yeHermoni leBashani lonke kuze kube seSaleka,

¹²umbuso wonke kaOgi eBashani owabusa eAshitarothi leEdreyi. Nguye owasala kunsali yeziqhwaga. UMozisi wayebatshaye-ke wabaxotsha elifeni labo.

¹³Kodwa abantwana bakoIsrayeli kabawaxotshanga elifeni amaGeshuri lamaMahakathi; kodwa amaGeshuri lamaMahakathi ahlala phakathi kukaIsrayeli kuze kube lamuhla.

¹⁴Kuphela esizweni sakoLevi kanikanga ilifa; iminikelo ye Nkosi uNkulunkulu kaIsrayeli eyenziwe ngomlilo iyilifa laso, njengokutsho kwayo kuso.

¹⁵UMozisi wasenika isizwe sabantwana bakoRubeni ngokwensendo zabo.

¹⁶Lomngcele waso wasukela eAroweri esekhunjini lwesifula seArinoni, lomuzi ophakathi kwesifula, lamagceke wonke eMedeba,

¹⁷iHeshiboni, lemizi yayo yonke esemagcekeni, iDiboni leBamothi-Bhali leBeti-Bhali-Meyoni,

¹⁸leJahazi leKedemothi leMefahathi,

¹⁹leKiriyathayimi leSibima leZerethi-Shahari entabeni yesigodi,

²⁰leBeti-Peyori leAshidodi-Pisiga leBeti-Jeshimothi,

²¹lemizi yonke yamagceke, lombuso wonke kaSihoni inkosi yamaAmori, owayebusa eHeshiboni, uMozisi amtshaya leziphathamandla zeMidiyani, oEvi loRekemi loZuri loHuri loReba, amakhosana kaSihoni, abakhileyo belizwe.

²²LoBalami indodana kaPeyori, ovumisayo, abantwana bakoIsrayeli bambulala ngenkemba phakathi kwababuleweyo babo.

²³Lomngcele wabantwana bakoRubeni wawuyiJordani lomngcele wayo. Lokhu kwakuyilifa labantwana bakoRubeni ngokwensendo zabo, imizi lemizana yayo.

²⁴UMozisi wasenika isizwe sakoGadi, kubantwana bakoGadi ngokwensendo zabo.

²⁵Lomngcele wabo wawuyiJazeri layo yonke imizi yeGileyadi lengxenye eyodwa kwezimbili yelizwe labantwana bakoAmoni, kusiya eAroweri, ephambi kweRaba,

²⁶njalo kusukela eHeshiboni kusiya eRamathi-Mizipa leBetonimi, njalo kusukela eMahanayimi kuze kube semngceleni weDebhiri;

²⁷lesigodini, iBeti-Harama leBeti-Nimira leSukothi leZafoni, insali yombuso kaSihoni inkosi yeHeshiboni, iJordani lomngcele, kuze kube sekupheleni kolwandle lweKinerethi ngaphetsheya kweJordani empumalanga.

²⁸Leli yilifa labantwana bakoGadi ngokwensendo zabo, imizi lemizana yabo.

²⁹UMozisi wasenika ingxenye eyodwa kwezimbili yesizwe sakoManase ilifa; njalo yayingeyengxenye eyodwa kwezimbili yesizwe sabantwana bakoManase ngokwensendo zabo.

³⁰Lomngcele wabo wasukela eMahanayimi, iBashani lonke, umbuso wonke kaOgi inkosi yeBashani, layo yonke imizana yeJayiri eseBashani, imizi engamatshumi ayisithupha.

³¹Lengxenye eyodwa kwezimbili yeGileyadi, leAshitarothi, leEdreyi, imizi yombuso kaOgi eBashani, yayingeyabantwana bakoMakiri indodana kaManase, ngitsho eyengxenye eyodwa kwezimbili yabantwana bakoMakiri ngokwensendo zabo.

³²La yiwo uMozisi awanika aba yilifa emagcekeni akoMowabi ngaphetsheya kweJordani eJeriko empumalanga.

³³Kodwa esizweni sakoLevi uMozisi kanikanga ilifa; i Nkosi, uNkulunkulu kaIsrayeli, iyilifa labo, njengokutsho kwayo kubo.