Read Ndebele-IBhayibhili Elingcwele 2006 Ujotjhuwa 14 Bible Online

Ujotjhuwa 14 - Ndebele-IBhayibhili Elingcwele 2006 bible

Ujotjhuwa 14

¹Lala ngamazwe abantwana bakoIsrayeli abawadla abe yilifa elizweni leKhanani, uEleyazare umpristi loJoshuwa indodana kaNuni lenhloko zaboyise bezizwe zabantwana bakoIsrayeli ababanika wona aba yilifa,

²ngenkatho yelifa labo, njengokulaya kwe Nkosi ngesandla sikaMozisi, ngezizwe eziyisificamunwemunye lengxenye eyodwa kwezimbili yesizwe.

³Ngoba uMozisi wayesenike ilifa izizwe ezimbili lengxenye eyodwa kwezimbili yesizwe ngaphetsheya kweJordani; kodwa kumaLevi kanikanga ilifa phakathi kwazo.

⁴Ngoba abantwana bakoJosefa babeyizizwe ezimbili, uManase loEfrayimi. Njalo kabawanikanga amaLevi isabelo elizweni, ngaphandle kwemizi yokuhlala, lamadlelo ayo ezifuyo zabo lempahla zabo.

⁵Njengokulaya kwe Nkosi kuMozisi, abantwana bakoIsrayeli benza njalo, balaba ilizwe.

⁶Khona abantwana bakoJuda basondela kuJoshuwa eGiligali; uKalebi indodana kaJefune umKenizi wasesithi kuye: Wena uyalazi ilizwi i Nkosi eyalikhuluma kuMozisi umuntu kaNkulunkulu mayelana lawe lamayelana lami eKadeshi-Bhaneya.

⁷Ngangileminyaka engamatshumi amane lapho uMozisi inceku ye Nkosi ingithuma ngisuka eKadeshi-Bhaneya ukuhlola ilizwe. Ngasengibuyisela kuye umbiko njengokusenhliziyweni yami.

⁸Kodwa abazalwane bami ababenyuke lami benza inhliziyo zabantu zancibilika; kodwa mina ngayilandela ngokupheleleyo i Nkosi uNkulunkulu wami.

⁹UMozisi wasefunga mhlalokho esithi: Isibili umhlaba olunyathele kuwo unyawo lwakho uzakuba ngowakho ube yilifa, lebantwaneni bakho kuze kube nininini, ngoba uyilandele ngokupheleleyo i Nkosi uNkulunkulu wami.

¹⁰Khathesi-ke khangela, i Nkosi ingilondoloze ngiphila njengokutsho kwayo okwale iminyaka engamatshumi amane lanhlanu, kusukela esikhathini i Nkosi eyakhuluma ngaso lelilizwi kuMozisi, uIsrayeli esahamba enkangala. Khathesi-ke khangela, lamuhla ngileminyaka engamatshumi ayisificaminwembili lanhlanu.

¹¹Ngisaqinile lalamuhla njengasosukwini uMozisi angithuma ngalo. Njengamandla ami ngalesosikhathi, asenjalo amandla ami khathesi, awempi lawokuphuma lawokungena.

¹²Ngakho-ke nginika lintaba i Nkosi eyakhuluma ngayo ngalolosuku, ngoba wena wezwa mhlalokho ukuthi amaAnaki ayekhona lapho lemizi emikhulu ebiyelwe ngemithangala. Aluba i Nkosi ilami, ngizawaxotsha elifeni, njengokutsho kwe Nkosi.

¹³UJoshuwa wasembusisa wanika uKalebi indodana kaJefune iHebroni ibe yilifa.

¹⁴Ngalokho-ke iHebroni yaba ngekaKalebi indodana kaJefune umKenizi yaba yilifa kuze kube lamuhla, ngoba wayilandela ngokupheleleyo i Nkosi, uNkulunkulu kaIsrayeli.

¹⁵Lebizo leHebroni kuqala laliyiKiriyathi-Arba, owayengumuntu omkhulu phakathi kwamaAnaki. Ilizwe laseliphumula empini.