Read Ndebele-IBhayibhili Elingcwele 2006 Ujotjhuwa 23 Bible Online

Ujotjhuwa 23 - Ndebele-IBhayibhili Elingcwele 2006 bible

Ujotjhuwa 23

¹Kwasekusithi emva kwensuku ezinengi emva kokuthi i Nkosi isimphumuzile uIsrayeli ezitheni zonke zabo inhlangothi zonke, loJoshuwa wayesemdala elensuku ezinengi,

²uJoshuwa wabiza uIsrayeli wonke, abadala babo, lenhloko zabo, labahluleli babo, lenduna zabo, wathi kubo: Mina sengimdala ngilensuku ezinengi.

³Lina selibonile konke i Nkosi uNkulunkulu wenu ekwenzileyo kulezizizwe zonke ngenxa yenu, ngoba i Nkosi uNkulunkulu wenu yiyo elilweleyo.

⁴Bonani, ngilabele ngenkatho lezizizwe eziseleyo zibe yilifa lezizwe zenu, kusukela eJordani, lazo zonke izizwe engiziqumileyo, ngitsho kuze kube selwandle olukhulu lapho okutshona khona ilanga.

⁵I Nkosi uNkulunkulu wenu izazixotsha-ke phambi kwenu, izixotshe elifeni phambi kwenu, njalo lizakudla ilifa lelizwe, njengalokho i Nkosi uNkulunkulu wenu ikhulumile kini.

⁶Ngakho qinani kakhulu ukugcina lokwenza konke okubhaliweyo egwalweni lomlayo kaMozisi, ukuze lingaphambuki kuwo liye ngakwesokunene loba ngakwesokhohlo,

⁷ukuze lingangeni kulezi izizwe, lezi ezisele lani, lingaphathi ibizo labonkulunkulu bazo, lingafungisi ngabo, lingabakhonzi, lingakhothami kubo,

⁸kodwa linamathele e Nkosi ni uNkulunkulu wenu njengoba lenzile kuze kube lamuhla.

⁹Ngoba i Nkosi ixotshile elifeni phambi kwenu izizwe ezinkulu lezilamandla; lina-ke kakulamuntu ome phambi kwenu kuze kube lamuhla.

¹⁰Umuntu oyedwa kini uzaxotsha inkulungwane, ngoba i Nkosi uNkulunkulu wenu yiyo elilwelayo, njengalokho ikhulumile kini.

¹¹Ngakho ziqaphelisiseni ukuthanda i Nkosi uNkulunkulu wenu.

¹²Ngoba uba libuyela lokubuyela, linamathele kunsali yalezizizwe, lezi ezisele lani, lithathane lazo, lingene kuzo, lazo kini,

¹³yazini lokwazi ukuthi i Nkosi uNkulunkulu wenu kayiyikuqhubeka ngokuzixotsha elifeni lezizizwe phambi kwenu; kodwa zizakuba yisifu lomjibila kini, zibe luswazi enhlangothini zenu, lameva emehlweni enu, lize libhubhe liphele kulelilizwe elihle, i Nkosi uNkulunkulu wenu elinike lona.

¹⁴Khangelani-ke, ngihamba lamuhla ngendlela yomhlaba wonke. Njalo liyazi enhliziyweni yenu yonke lemphefumulweni wenu wonke ukuthi akukho lelizwi elilodwa eliwileyo kuwo wonke amazwi amahle i Nkosi uNkulunkulu wenu ewakhulumileyo phezu kwenu; wonke ezile kini, akukho lelizwi elilodwa eliwileyo kuwo.

¹⁵Kuzakuthi-ke, njengalokhu zonke izinto ezinhle i Nkosi uNkulunkulu wenu eyazikhuluma kini sezilehlele, ngokunjalo i Nkosi izalehlisela zonke izinto ezimbi, ize ilibhubhise liphele kulelilizwe elihle i Nkosi uNkulunkulu wenu elinike lona.

¹⁶Uba liseqa isivumelwano se Nkosi uNkulunkulu wenu eyalilaya sona, lisuke liyekhonza abanye onkulunkulu, likhothame kibo, khona ulaka lwe Nkosi luzalivuthela, libhubhe masinyane liphele kulelilizwe elihle elinike lona.