Read Ndebele-IBhayibhili Elingcwele 2006 Ujotjhuwa 4 Bible Online

Ujotjhuwa 4 - Ndebele-IBhayibhili Elingcwele 2006 bible

Ujotjhuwa 4

¹Kwasekusithi lapho isizwe sonke sesiqede ukuchapha iJordani, i Nkosi yakhuluma kuJoshuwa isithi:

²Zithathele amadoda alitshumi lambili ebantwini, indoda ibenye kuleso lalesosizwe,

³uwalaye uthi: Zithatheleni okuvela lapha phakathi kweJordani kuleyondawo, lapho obekumi khona inyawo zabapristi ziqinile, amatshe alitshumi lambili, liwathwale lichaphe lawo, liwabeke endaweni yokulala lapho elizalala khona ebusuku.

⁴UJoshuwa wasebiza amadoda alitshumi lambili ayewalungisile ebantwaneni bakoIsrayeli, indoda yabanye kuleso lalesosizwe.

⁵UJoshuwa wasesithi kuwo: Dlulani phambi komtshokotsho we Nkosi uNkulunkulu wenu, lingene phakathi kweJordani, lizithathele, lowo lalowo, ilitshe elilodwa, ale tshate ehlombe, njengokwenani lezizwe zabantwana bakoIsrayeli,

⁶ukuze lokhu kube yisiboniso phakathi kwenu. Nxa abantwana benu bebuza kusasa besithi: Ayini lamatshe kini?

⁷Lizabatshela-ke: Ngoba amanzi eJordani aqunywa phambi komtshotsho wesivumelwano se Nkosi. Lapho uchapha iJordani, amanzi eJordani aqunywa. Ngakho lamatshe azakuba yisikhumbuzo ebantwaneni bakoIsrayeli kuze kube nininini.

⁸Labantwana bakoIsrayeli benza njalo njengokulaya kukaJoshuwa, bathatha amatshe alitshumi lambili phakathi kweJordani, njengokutsho kwe Nkosi kuJoshuwa, ngokwenani lezizwe zabantwana bakoIsrayeli; bawathwala bachapha lawo, baya endaweni lapho abalala khona, bawabeka khona.

⁹UJoshuwa wasemisa amatshe alitshumi lambili phakathi kweJordani endaweni lapho inyawo zabapristi ababethwele umtshokotsho wesivumelwano ezazimi khona. Njalo asekhona lapho kuze kube lamuhla.

¹⁰Ngoba abapristi ababethwele umtshokotsho bema phakathi kweJordani kwaze kwaphela yonke into i Nkosi eyayimlaye yona uJoshuwa ukuyitshela abantu, njengakho konke uMozisi ayekulaye uJoshuwa. Labantu baphangisa bachapha.

¹¹Kwasekusithi bonke abantu sebeqedile ukuchapha, umtshokotsho we Nkosi wachapha, labapristi phambi kwabantu.

¹²Njalo abantwana bakoRubeni labantwana bakoGadi lengxenye eyodwa kwezimbili yesizwe sakoManase bachapha behlomile phambi kwabantwana bakoIsrayeli, njengokubatshela kukaMozisi.

¹³Phose izinkulungwane ezingamatshumi amane behlomele impi, bachapha phambi kwe Nkosi ukuya empini, emagcekeni eJeriko.

¹⁴Ngalolosuku i Nkosi yamkhulisa uJoshuwa emehlweni kaIsrayeli wonke, njalo bamesaba njengalokhu babemesaba uMozisi insuku zonke zempilo yakhe.

¹⁵I Nkosi yasikhuluma kuJoshuwa isithi:

¹⁶Laya abapristi abathwala umtshokotsho wobufakazi ukuthi bakhuphuke eJordani.

¹⁷UJoshuwa wasebalaya abapristi esithi: Khuphukani eJordani.

¹⁸Kwasekusithi lapho abapristi ababethwele umtshokotsho wesivumelwano se Nkosi sebekhuphukile phakathi kweJordani, l engaphansi yenyawo zabapristi isiphakanyiselwe emhlabathini owomileyo, amanzi eJordani abuyela endaweni yawo, ahamba njengamandulo aphuphuma enkunjini zonke zayo.

¹⁹Labantu bakhuphuka besuka eJordani ngolwetshumi lwenyanga yokuqala, bamisa inkamba eGiligali ephethelweni lempumalanga yeJeriko.

²⁰Lalawomatshe alitshumi lambili abawathatha eJordani uJoshuwa wawamisa eGiligali.

²¹Wakhuluma kubantwana bakoIsrayeli esithi: Nxa abantwana benu bebuza kusasa kuboyise besithi: Ayini lamatshe?

²²Lizabazisa-ke abantwana benu lisithi: UIsrayeli wayichapha le iJordani emhlabathini owomileyo.

²³Ngoba i Nkosi uNkulunkulu wenu yenza amanzi eJordani atsha phambi kwenu laze lachapha, njengokwenza kwe Nkosi uNkulunkulu wenu kuLwandle oluBomvu eyalomisa phambi kwethu saze sachapha,

²⁴ukuze zonke izizwe zomhlaba zazi isandla se Nkosi, ukuthi silamandla, ukuze liyesabe i Nkosi uNkulunkulu wenu zonke izinsuku.