Read Ndebele-IBhayibhili Elingcwele 2006 1 Uthimothi 4 Bible Online

1 Uthimothi 4 - Ndebele-IBhayibhili Elingcwele 2006 bible

1 Uthimothi 4

¹UMoya-ke utsho ngokucacileyo ukuthi ngezikhathi zokucina abanye bazahlehlela emuva ekholweni, balalele omoya abaduhisayo lemfundiso zamadimoni,

²ekuzenziseni kwabaqambimanga, betshiswe kwezabo izazela ngensimbi etshisayo,

³besalela ukuthathana, bezila ukudla uNkulunkulu akudalileyo ekwemukelweni lokubonga ngabakholwayo labazi iqiniso;

⁴ngoba sonke isidalwa sikaNkulunkulu sihle, kakulahlwa lutho, uba lwemukelwa kanye lokubonga;

⁵ngoba luyangcweliswa ngelizwi likaNkulunkulu la ngo mkhuleko.

⁶Uba ubeluleka lezizinto abazalwane uzakuba yisikhonzi esihle sikaJesu Kristu, wondliwe emazwini okholo, lawemfundiso enhle oyilandelayo ngokunanzelela.

⁷Kodwa wale inganekwane ezimbi lezezalukazi. Uzejwayeze ukukhonza uNkulunkulu;

⁸ngoba ukwejwayeza umzimba kulokusiza okuncinyane; kodwa ukukhonza uNkulunkulu kusiza ezintweni zonke, kulesithembiso sempilo yalamuhla lezayo.

⁹Lithembekile ilizwi njalo lifanele konke ukwemukelwa.

¹⁰Ngoba ngalokho lathi siyasebenza nzima futhi siyathukwa ngoba sithembele kuNkulunkulu ophilayo onguMsindisi wabo bonke abantu, ikakhulu wabakholwayo.

¹¹Laya nga lezizinto ufundise.

¹²Kungabi lamuntu odelela ubutsha bakho, kodwa woba yisibonelo kwabakholwayo elizwini, ekuhambeni, ethandweni, emoyeni, ekholweni, ekuhlambulukeni.

¹³Ngize ngifike, nanzelela ekubaleni, ekulayeni, ekufundiseni.

¹⁴Ungadeleli isiphiwo esikuwe, owasiphiwa ngesiprofetho kanye lokubekwa izandla zobudala.

¹⁵Nakana ngalezizinto, ube kulezizinto, ukuze ukuqhubeka kwakho kubonakale phakathi kwabo bonke.

¹⁶Zinanzelele wena lemfundiso. Hlala kulezizinto; ngoba ngokwenza lokho uzazisindisa wena kanye lalabo abakuzwayo.