Read Ndebele-IBhayibhili Elingcwele 2006 2 Uthimothi 4 Bible Online

2 Uthimothi 4 - Ndebele-IBhayibhili Elingcwele 2006 bible

2 Uthimothi 4

¹Ngakho mina ngiyalayisisa phambi kukaNkulunkulu, leNkosi uJesu Kristu, ozakwahlulela abaphilayo labafileyo, ekubonakaleni kwakhe lembusweni wakhe,

²tshumayela ilizwi, ulunge ngesikhathi esilungileyo, ngesikhathi esingalunganga, sola, ukhuze, weluleke, ekubekezeleni konke lemfundisweni.

³Ngoba kuzakuba lesikhathi lapho bengayikuvuma imfundiso ephilileyo, kodwa ngokowabo umhawu bazazibuthelelela abafundisi, belunywa zindlebe;

⁴njalo bazafulathelisa indlebe zabo eqinisweni, bazaphambukela ezinganekwaneni.

⁵Kodwa wena qonda ezintweni zonke, ubekezelele inhlupheko, wenze umsebenzi womvangeli, ugcwalise inkonzo yakho.

⁶Ngoba mina sengithululwe njengomnikelo wokunathwayo, lesikhathi sokusuka kwami sesifikile.

⁷Ngilwile ukulwa okuhle, ngiqedile uhambo, ngilondolozile ukholo;

⁸kusukela khathesi, ngibekelwe umqhele wokulunga, ezanginika wona ngalolosuku iNkosi, umahluleli olungileyo; kodwa kungeyisimi ngedwa, kodwa labo bonke abathanda ukubonakala kwayo.

⁹Khuthala ukuza kimi masinyane;

¹⁰ngoba uDema ungihlamukile, ethande umhlaba wakhathesi, waya eThesalonika; uKresena eGalathiya, uTitosi eDalmathiya.

¹¹ULuka yedwa ulami. Thatha uMarko ubuye la ye; ngoba uloncedo kakhulu kimi enkonzweni.

¹²Kodwa uTikiko ngimthume eEfesu.

¹³Ulethe isembatho engasitshiya kuKarpo eTrowasi, nxa ubuya, lezingwalo, ikakhulu incwadi zesikhumba.

¹⁴UAleksandro umkhandi wethusi wangitshengisa okubi okunengi; sengathi iNkosi ingambuyisela njengokwemisebenzi yakhe;

¹⁵umnanzelele lawe, ngoba wamelana kakhulukazi lamazwi ethu.

¹⁶Ekuziphenduleleni kwami kwakuqala kwakungekho muntu owangimelayo, kodwa bonke bangihlamuka; sengathi kungebalelwe kibo.

¹⁷Kodwa iNkosi yangimela, yangipha amandla, ukuze ngami ukutshumayela kupheleliswe, lezizwe zonke zizwe; ngasengikhululwa emlonyeni wesilwane,

¹⁸njalo iNkosi izangikhulula kuwo wonke umsebenzi omubi, njalo iza ngi sindisela umbuso wayo wezulu; kakube kuyo ubukhosi kuze kube phakade laphakade. Ameni.

¹⁹Bingelela uPriska loAkwila, lendlu kaOnesiforo.

²⁰UErastu wasala eKorinte; kodwa uTrofimu ngamtshiya eMilethu egula.

²¹Khuthala ufike ubusika bungakafiki. UYubulu uyakubingelela, loPudeni, loLino, loKlawudiya, labo bonke abazalwane.

²²INkosi uJesu Kristu kayibe lomoya wakho. Umusa kawube lani. Ameni.