Read Ndebele-IBhayibhili Elingcwele 2006 Utitosi 2 Bible Online

Utitosi 2 - Ndebele-IBhayibhili Elingcwele 2006 bible

Utitosi 2

¹Kodwa wena khuluma izinto ezifanele imfundiso ephilileyo.

²Amadoda amadala ukuthi azithinte, ahlonipheke, engaqondileyo, ephilile ekholweni, ethandweni, ekubekezeleni;

³abesifazana abadala ngokunjalo ukuthi baziphathe ngokufanele abangcwele, bangabi ngabahlebayo, bangafuywa liwayini elinengi, abafundisi bokuhle,

⁴ukuze bafundise abesifazana abatsha ukuthi baqonde, babengabathandi babomkabo, bathande abantwana babo,

⁵abaqondileyo, bemhlophe, begcina amakhaya, belungile, bezehlisela ngaphansi kwawabo amadoda, ukuze ilizwi likaNkulunkulu lingadunyazwa.

⁶Abesilisa abatsha ngokunjalo ubakhuthaze ukuthi babe ngabaqondileyo;

⁷mayelana lazo zonke izinto zitshengise uyisibonelo sezenzo ezinhle: Ekufundiseni okungabolanga, ubunzulu, ukuqonda,

⁸ilizwi eliphilileyo, elingasolekiyo; ukuze omelana la ni abe lenhloni, aswele ulutho olubi angalukhuluma ngani.

⁹Khuthaza izigqili ukuthi zizehlisele ngaphansi kwawazo amakhosi, zikholeke ezintweni zonke, zingabi lankani,

¹⁰zingantshontshi, kodwa zitshengise konke ukuthembeka okuhle, ukuze zicecise imfundiso kaNkulunkulu uMsindisi wethu ezintweni zonke.

¹¹Ngoba ubonakele umusa kaNkulunkulu osindisayo ebantwini bonke,

¹²usifundisa ukuthi, sidele ukungakhonzi uNkulunkulu lenkanuko zomhlaba, siphile ngokuqonda langokulunga langokwesaba uNkulunkulu emhlabeni wakhathesi,

¹³silindele ithemba elibusisiweyo lokubonakala kwenkazimulo kaNkulunkulu omkhulu loMsindisi wethu uJesu Kristu,

¹⁴owazinikelela thina, ukuze asihlenge ebubini bonke, uzihlambululele isizwe esikhethekileyo, esitshisekela imisebenzi emihle.

¹⁵Khuluma lezizinto, ukhuthaze, ukhuze ulamandla wonke. Kungabi khona umuntu okudelelayo.