Read Ndebele-IBhayibhili Elingcwele 2006 Utitosi 3 Bible Online

Utitosi 3 - Ndebele-IBhayibhili Elingcwele 2006 bible

Utitosi 3

¹Bakhumbuze ukuthi bazehlisele ngaphansi kwababusi leziphathamandla, ba ba lalele, balungele wonke umsebenzi omuhle,

²bangahlebi muntu, bangabi yizilwi, babekezele, batshengise bonke ubumnene ebantwini bonke.

³Ngoba lathi kade sasiyiziphukuphuku, singalaleli, sikhohliswa, sisebenzela inkanuko lentokozo ezinenginengi, sihlezi ebubini lemoneni, sizondeka, sizondana.

⁴Kodwa lapho sekubonakele umusa lothando lukaNkulunkulu uMsindisi wethu kubantu,

⁵kungeyisikho okuvela ezenzweni zokulunga esazenzayo thina, kodwa njengokwesihawu sakhe wasisindisa, ngokugeziswa kokuzalwa kutsha lokuvuselelwa koMoya oNgcwele,

⁶owamthulula ngokwengeziweyo phezu kwethu, ngoJesu Kristu uMsindisi wethu,

⁷ukuze silungisiswe ngomusa wakhe, sibe yizindlalifa ngokwethemba lempilo elaphakade.

⁸Lithembekile ilizwi, njalo ngithanda ukuthi uqinise isibili ngalezizinto, ukuze abakholwa kuNkulunkulu bakhuthalele ukuma emisebenzini emihle. Lezi yizinto ezinhle ezilosizo ebantwini;

⁹kodwa xwaya imibuzo yobuthutha lendaba zosendo olokuzalana lombango lokuphikisana ngomlayo; ngoba kazisizi futhi ziyize.

¹⁰Umuntu obhazukayo emva kwesilayo sokuqala lesesibili, mdele,

¹¹usazi ukuthi onjalo uphambukile, uyona, uyazilahla yena.

¹²Nxa ngizathuma uArtema kuwe loba uTikiko, khuthala uze kimi eNikapoli; ngoba ngizimisele ukuhlala khona ebusika.

¹³Khuthala uncedise uZena isazumthetho loApolosi ekuhambeni kwabo, ukuze kungabi lalutho oluswelakalayo kubo.

¹⁴Abakithi-ke labo kabafunde ukuma emisebenzini emihle yokudingekayo kusweleka, ukuze bangabi ngabangelazithelo.

¹⁵Bonke abalami bayakubingelela. Bingelela abasithandayo ekholweni. Umusa kawube lani lonke. Ameni.