Read Ndebele-IBhayibhili Elingcwele 2006 Ufilimoni 1 Bible Online

Ufilimoni 1 - Ndebele-IBhayibhili Elingcwele 2006 bible

Ufilimoni 1

¹UPawuli isibotshwa sikaKristu Jesu loTimothi umzalwane, kuFilimoni othandekayo lesisebenzi kanye lathi,

²lakuApifiya othandekayo, lakuArkipho owebutho kanye lathi, lakubandla elisendlini yakho:

³Umusa kawube kini lokuthula okuvela kuNkulunkulu uBaba wethu leNkosini uJesu Kristu.

⁴Ngiyambonga uNkulunkulu wami, ngikuphatha ngezikhathi zonke emikhulekweni yami,

⁵ngisizwa ngothando lwakho langokholo olalo eNkosini uJesu lakubo bonke abangcwele,

⁶ukuze ukuhlanganyela kokholo lwakho kube lamandla elwazini lwento yonke enhle ekini kuKristu Jesu.

⁷Ngoba silentokozo enkulu lenduduzo ethandweni lwakho, ngoba imibilini yabangcwele yavuselelwa ngawe, mzalwane.

⁸Ngalokho, lanxa ngilesibindi esikhulu kuKristu sokuthi ngikulaye into efaneleyo,

⁹kanti ngenxa yothando kungcono ukuthi ngincenge, nginjengonje, uPawuli omdala, esengiyisibotshwa futhi sikaJesu Kristu.

¹⁰Ngiyakuncenga ngomntanami, engimzeleyo kuzibopho zami, uOnesimo,

¹¹okade engelasizo kuwe, kodwa khathesi-ke ulosizo kuwe lakimi,

¹²engimbuyisela kuwe; kodwa wena, memukele, okuyikuthi imibilini yami;

¹³ebengifisa mina ukumbamba abe lami, ukuze angisebenzele esikhundleni sakho kuzibopho zevangeli;

¹⁴kodwa kangithandanga ukwenza ulutho ngaphandle kwemvumo yakho, ukuze okuhle kwakho kungabi ngokokubanjwa ngamandla, kodwa njengokwesihle.

¹⁵Ngoba mhlawumbe wehlukaniswa lawe okwesikhatshana ngenxa yalokhu, ukuze ubuye umemukele phakade;

¹⁶angabe esaba njengesigqili, kodwa ngaphezu kwesigqili, umzalwane othandekayo, ikakhulu kimi, kodwa kakhulu kangakanani kuwe konke enyameni leNkosini.

¹⁷Ngakho uba usithi ngingumhlanganyeli lawe, memukele njengami.

¹⁸Kodwa uba ekone ng olutho kumbe elomlandu, lokho kubalele kimi;

¹⁹mina Pawuli ngibhale ngesandla sami, mina ngizakuhlawula; ukuze ngingatsho kuwe ukuthi ulomlandu oseleyo kimi lawe uqobo.

²⁰Yebo, mzalwane, sengathi ngingaba lentokozo ngawe eNkosini; uvuselele imibilini yami eNkosini.

²¹Ngikubhalele ngithemba ukulalela kwakho, ngisazi ukuthi lawe uzakwenza okungaphezu kwalokho engikutshoyo.

²²Futhi ngesikhathi esifananayo ungilungisele lami indawo; ngoba ngiyathemba ukuthi ngemikhuleko yenu ngizanikwa kini.

²³Uyakubingelela uEpafra oyisibotshwa kanye lami kuKristu Jesu,

²⁴uMarko, uAristako, uDema, uLuka, izisebenzi kanye lami.

²⁵Umusa weNkosi yethu uJesu Kristu kawube lomoya wenu. Ameni.