Read Ndebele-IBhayibhili Elingcwele 2006 Amahebheru 10 Bible Online

Amahebheru 10 - Ndebele-IBhayibhili Elingcwele 2006 bible

Amahebheru 10

¹Ngoba umlayo ulesithunzi sezinto ezinhle ezizayo, ungeyisiwo umfanekiso oqotho wezinto, ungeze waba lamandla ngaleyomihlatshelo enikelwa njalonjalo iminyaka ngeminyaka ukubenza baphelele labo abasondelayo.

²Uba kwakunjalo nga kayimanga yini ukunikelwa, ngoba abakhonzayo babengasayikuba lasazela sezono, sebehlanjululwe kanye?

³Kodwa kuleyo kukhona ukukhunjulwa kwezono umnyaka ngomnyaka;

⁴ngoba kakulakwenzeka ukuthi igazi lezinkunzi lelezimbuzi lisuse izono;

⁵ngakho esefika emhlabeni uthi: Umhlatshelo lomnikelo kawuwuthandanga, kodwa ungilungisele umzimba;

⁶iminikelo yokutshiswa leyesono kawuyithokozelanga;

⁷ngasengisithi: Khangela, ngiza (kumqulu wogwalo kulotshwe ngami) ukwenza intando yakho, Nkulunkulu.

⁸Kuqala esithi: Umhlatshelo lomnikelo leminikelo yokutshiswa leyezono kawuyithandanga njalo kawuyithokozelanga, yona enikelwa ngokomlayo,

⁹wasesithi: Khangela, ngiza ukwenza intando yakho, Nkulunkulu. Ususa okokuqala, ukuze amise okwesibili.

¹⁰Kuleyontando singcwelisiwe, ngokunikelwa komzimba kaJesu Kristu kanye.

¹¹Laye wonke umpristi kambe uyema insuku ngensuku ekhonza, njalo enikela kanengi leyomihlatshelo, engasoze yaba lamandla okususa izono;

¹²kodwa yena, esenikele umhlatshelo waba munye ngenxa yezono ephakadeni wahlala phansi ngakwesokunene sikaNkulunkulu,

¹³kusukela khathesi ulindele zize zenziwe izitha zakhe isenabelo senyawo zakhe.

¹⁴Ngoba ngomnikelo munye uphelelisile ephakadeni labo abangcwelisiweyo.

¹⁵LoMoya oyiNgcwele laye uyafakaza kithi; ngoba emva kokuthi esetshilo kuqala uthi:

¹⁶Lesi yisivumelwano engizavumelana labo ngaso emva kwalezonsuku, kutsho iNkosi: Ngizafaka imilayo yami enhliziyweni zabo, njalo ngizayibhala engqondweni zabo;

¹⁷lezono zabo lobubi babo kangisoze ngikukhumbule futhi.

¹⁸Lapho-ke okukhona uthethelelo lwalokhu, kakuselamnikelo ngesono.

¹⁹Ngakho, bazalwane, silesibindi sokungena kwezingcwele ngegazi likaJesu,

²⁰ngendlela entsha lephilayo, asidabulele yona ngeveyili, eliyinyama yakhe,

²¹futhi silaye umpristi omkhulu phezu kwendlu kaNkulunkulu,

²²kasisondele ngenhliziyo eqinisileyo ekuqinisekeni okupheleleyo kokholo, inhliziyo zifafaziwe esazeleni sokubi, lomzimba ugezisiwe ngamanzi acwebileyo;

²³kasibambisise isivumo sethemba lethu singanyikinyeki, ngoba uthembekile owathembisayo;

²⁴njalo kasiqaphelisisane ekuvuseleni uthando lemisebenzi emihle,

²⁵singayekeli ukuhlangana kwethu, njengomkhuba wabanye, kodwa kasikhuthale, futhi ikakhulu, njengoba libona usuku lusondela.

²⁶Ngoba uba sisona ngabomo emva kokuthi semukele ulwazi lweqiniso, kakusekho umhlatshelo ngezono,

²⁷kodwa ukulindela okuthile okwesabekayo kokulahlwa, lolaka lomlilo ozaqeda izitha.

²⁸Umuntu odelela umlayo kaMozisi ufa ngaphandle kwesihawu ngabafakazi ababili loba abathathu;

²⁹pho, licabanga ukuthi uzathiwa ufanele ukujeziswa kabuhlungu kanganani onyathelela phansi iNdodana kaNkulunkulu, njalo othi igazi lesivumelwano, angcweliswa ngalo, liyiluthonje, njalo odelela uMoya womusa?

³⁰Ngoba siyamazi owathi: Impindiselo ngeyami, mina ngizabuyisela, itsho iNkosi; futhi uphinde athi: INkosi izakwahlulela abantu bayo.

³¹Kuyesabeka ukuwela ezandleni zikaNkulunkulu ophilayo.

³²Kodwa khumbulani insuku zamandulo, okwathi ngazo selikhanyisiwe lakhuthazela empini enkulu yezinhlupho;

³³kokunye, lapho lenziwa umbukiso ngenhlamba langezinhlupheko; kokunye, lapho laba ngabahlanganyeli balabo ababephathwa ngokunjalo.

³⁴Ngoba lani lazwelana lezibopho zami, lavuma ngentokozo ukuphangwa kwempahla zenu, lisazi ukuthi ngaphakathi kwenu lilempahla engcono lemiyo emazulwini.

³⁵Ngakho lingalahli isibindi senu, esilomvuzo omkhulu.

³⁶Ngoba liswele ukubekezela, ukuze kuthi, seliyenzile intando kaNkulunkulu, lemukele isithembiso.

³⁷Ngoba kuseyisikhatshana nje, ozayo uzafika, njalo kazukulibala;

³⁸kodwa olungileyo uzaphila ngokholo; njalo uba ehlehlela emuva, umphefumulo wami kawuthokozi ngaye.

³⁹Kodwa thina kasisibo ababahlehlela emuva ekubhujisweni, kodwa ababakholwayo ekusindisweni komphefumulo.