Read Ndebele-IBhayibhili Elingcwele 2006 Amahebheru 12 Bible Online

Amahebheru 12 - Ndebele-IBhayibhili Elingcwele 2006 bible

Amahebheru 12

¹Ngakho-ke lathi sigonjolozelwe liyezi elikhulu kangaka labafakazi, asilahle konke okusindayo lesono esi si thandele lula, asigijime ngokubekezela umjaho esiwumiselweyo,

²sikhangele kuJesu umqalisi lomphelelisi wokholo lwethu, owathi endaweni yentokozo ayimiselweyo, waqinisela esiphambanweni, edelela ihlazo, wahlala ngakwesokunene sesihlalo sobukhosi sikaNkulunkulu.

³Ngakho mqapheliseni yena owaqinisela kuyo impikisano engaka lezoni emelane laye, ukuze lingadinwa, liphelelwe ngamandla emiphefumulweni yenu.

⁴Kalikamelani la kho kuze kube segazini lisilwa lesono;

⁵njalo selikhohliwe inkuthazo, ekhuluma kini njengemadodaneni eyokuthi: Ndodana yami, ungadeleli ukulaya kweNkosi, njalo ungapheli amandla, nxa usolwa yiyo;

⁶ngoba iNkosi iyalaya emthandayo; njalo itshaye ngesiswepu yonke indodana eyemukelayo.

⁷Uba likhuthazela ekulayweni, uNkulunkulu uyaliphatha njengamadodana; ngoba yiyiphi indodana uyise angayilayiyo?

⁸Kodwa uba lingelakulaywa, okuthi bonke bangabahlanganyeli bakho, ngakho lingabokufetshwa njalo kalisiwo amadodana.

⁹Futhi-ke sasilabo obaba benyama yethu aba si layayo njalo sa ba hlonipha; pho, kasiyikuzehlisela ngaphansi kukaYise wemimoya kakhulu kula lokho, siphile?

¹⁰Ngoba bona kambe ba si laya okwensuku ezinlutshwana, njengokubona kwabo; kodwa yena kube yikusizakala kwethu, ukuze si hlanganyele ubungcwele bakhe.

¹¹Lakho konke ukulaywa okukhona kakubonakali angathi ngokwentokozo, kodwa ngokosizi; emva kwalokho-ke kuyabalethela isithelo sokuthula sokulunga abajeziswa ngakho.

¹²Ngakho qinisani izandla ezibuthakathaka lamadolo axegayo;

¹³njalo lenzele inyawo zenu indlela eziqondileyo, ukuze okuqhulayo kungenyeli, kodwa kulalokho kusiliswe.

¹⁴Nxwanelani ukuthula labo bonke, lobungcwele, ngaphandle kwalokho kakulamuntu ozayibona iNkosi;

¹⁵qaphelisani kungabi khona osilelayo emuseni kaNkulunkulu; kungamili lampande yokubaba ikhathaze, njalo ngayo abanengi bangcoliswe;

¹⁶kakungabi lamuntu oyisifebe kumbe ongakhonzi uNkulunkulu, njengoEsawu, owathengisa ubuzibulo bakhe ngokudla okukodwa.

¹⁷Ngoba liyazi ukuthi lemva kwalokho, esethanda ukudla ilifa lesibusiso, waliwa; ngoba kayitholanga indawo yokuphenduka, lanxa wayidingisisa ngezinyembezi.

¹⁸Ngoba kalizanga entabeni engathintwa, lemlilweni ovuthayo, lekufiphaleni, lemnyameni, lesivunguvungwini,

¹⁹lekukhaleni kophondo, lelizwini lamazwi, okwathi labo abezwayo bancenga ukuthi kungabe kusa khulunywa ilizwi kibo;

²⁰ngoba babengelakukumela lokho okwalaywayo kokuthi: Ngitsho lenyamazana uba ithinta intaba, izakhandwa ngamatshe, kumbe itshokwe ngomtshoko;

²¹njalo, kwakusesabeka kangaka lokho okwabonwayo, uMozisi wathi: Ngilovalo ngiyathuthumela.

²²Kodwa lize entabeni iSiyoni, lemzini kaNkulunkulu ophilayo, eJerusalema yasezulwini, lakuzigidi zengilosi ezingelakubalwa,

²³lemhlanganweni omkhulu lebandleni lamazibulo abhalwe emazulwini, lakuNkulunkulu umahluleli wabo bonke, lakumimoya yabalungileyo abaphelelisiweyo,

²⁴lakuJesu umlamuli wesivumelwano esitsha, legazini lokufafaza elikhuluma izinto ezingcono kulelikaAbela.

²⁵Qaphelani ukuthi lingamali okhulumayo. Ngoba uba bengaphephanga labo abala lowo owakhuluma okuvela kuNkulunkulu emhlabeni, kakhulu kangakanani thina esimfulathelayo lowo ovela emazulwini;

²⁶olizwi lakhe ngalesosikhathi lanyikinya umhlaba, kodwa khathesi uthembisile, wathi: Ngi za phinda kanye ukunyikinya kungeyisiwo umhlaba wodwa, kodwa lezulu.

²⁷Lalokhu ukuthi: Ngiza phinda kanye, kutshengisa ukususwa kwezinto ezinyikinyekayo, kungathi ezenziweyo, ukuze kusale izinto ezinganyikinyekiyo.

²⁸Ngakho njengoba sisemukela umbuso ongelakunyikinyekiswa, asibe lomusa esingamkhonza uNkulunkulu ngawo ngokwemukelekayo kanye lokuthobeka lokwesaba uNkulunkulu;

²⁹ngoba-ke uNkulunkulu wethu ungumlilo oqothulayo.