Read Ndebele-IBhayibhili Elingcwele 2006 Amahebheru 13 Bible Online

Amahebheru 13 - Ndebele-IBhayibhili Elingcwele 2006 bible

Amahebheru 13

¹Kalume njalo uthando lobuzalwane.

²Lingakhohlwa ukungenisa izihambi; ngoba ngalokho abanye bangenisa izingilosi bengazi.

³Khumbulani izibotshwa, ngokungathi libotshwe kanye lazo; abaphethwe kubi, ngokungathi lani liphethwe kubi emzimbeni.

⁴Umtshado uhlonitshwa kubo bonke, lombheda ungangcoliswa; kodwa uNkulunkulu uzagweba iziphingi lezifebe.

⁵Indlela yempilo kayingabi ngeyokuthanda imali, yeneliswani yizinto elilazo; ngoba yena utshilo ukuthi: Kangisoze ngakulahla, njalo kangisoze ngakutshiya.

⁶Ngakho singatsho ngesibindi sithi: INkosi ingumsizi wami, njalo kangiyikwesaba umuntu azakwenza kimi.

⁷Khumbulani abakhokheli benu, abakhulume kini ilizwi likaNkulunkulu; liqaphelise ukuphela kokuhamba kwabo, lilingisele ukholo lwabo.

⁸UJesu Kristu unguye izolo lalamuhla lephakadeni.

⁹Lingaduhiswa yizimfundiso eziyinhlobonhlobo lezingaziwayo; ngoba kuhle ukuthi inhliziyo iqiniswe ngomusa, kungabi ngokudla, abangasizwanga yikho ababebambelela kukho.

¹⁰Silalo ilathi, abangelalungelo lokudla kulo abakhonza ithabhanekele.

¹¹Ngoba lezozinyamazana, ogazi lazo langeniswa ngumpristi omkhulu e ndaw eni ezingcwele ngenxa yesono, izidumbu zazo zitshiswa ngaphandle kwenkamba.

¹²Ngakho laye uJesu, ukuze angcwelise abantu ngelakhe igazi, wahlupheka ngaphandle kwesango.

¹³Ngakho-ke asiphumele kuye ngaphandle kwenkamba, sithwele ihlazo lakhe.

¹⁴Ngoba kasilawo umuzi omiyo lapha, kodwa sidinga ozayo.

¹⁵Ngakho asinikele njalonjalo kuNkulunkulu ngaye umnikelo wendumiso, okutsho isithelo sendebe sivuma ibizo lakhe.

¹⁶Kodwa lingakhohlwa ukwenza okuhle lokuphana; ngoba uNkulunkulu uyathokoza ngeminikelo enjalo.

¹⁷Lalelani abakhokheli benu, lizehlisele ngaphansi kwabo; ngoba laba balinda imiphefumulo yenu, njengabazalandisa; ukuze bakwenze lokhu ngenjabulo, njalo bengabubuli; ngoba kungalisizi lokhu.

¹⁸Sikhulekeleni; ngoba siyathemba ukuthi silesazela esihle, sifisa ukuhamba kuhle ezintweni zonke;

¹⁹njalo ngiya li ncenga ngokwengezelelwe kakhulu ukuthi li kwenze lokhu, ukuze ngibuyiselwe kini ngokuphangisa.

²⁰Kungathi uNkulunkulu wokuthula owamkhuphula kwabafileyo uMelusi omkhulu wezimvu ngegazi lesivumelwano saphakade, iNkosi yethu uJesu,

²¹angaliphelelisa kuwo wonke umsebenzi omuhle ukuze lenze intando yakhe, esebenza kini lokho okumthokozisayo phambi kwakhe, ngoJesu Kristu, kakube kuye ubukhosi kuze kube nini lanini. Ameni.

²²Kodwa ngiyalincenga, bazalwane, lemukeleni ngesineke ilizwi lenkuthazo; ngoba ngilibhalele ngamafitshane.

²³Yazini ukuthi umzalwane uTimothi ukhululwe, uba efika masinyane, ngizalibona ngilaye.

²⁴Bingelelani bonke abakhokheli benu, labo bonke abangcwele. Abavela eIthaliya bayalibingelela.

²⁵Umusa kawube lani lonke. Ameni.