Read Ndebele-IBhayibhili Elingcwele 2006 Amahebheru 5 Bible Online

Amahebheru 5 - Ndebele-IBhayibhili Elingcwele 2006 bible

Amahebheru 5

¹Ngoba wonke umpristi omkhulu, othathwa ebantwini, umiselwa abantu ezintweni ezimayelana loNkulunkulu, ukuze anikele izipho lemihlatshelo ngenxa yezono;

²ongababekezelela abangaziyo labaduhayo, lokhu laye egonjolozelwe yibuthakathaka;

³njalo ngenxa yalokhu kufanele ukuthi anikelele izono, njengokwabantu, kunjalo langokwakhe.

⁴Futhi kakulamuntu ozithathela le inhlonipho, kodwa obizwa nguNkulunkulu, lanjengoAroni.

⁵Ngokunjalo loKristu kazidumisanga yena ukuba ngumpristi omkhulu, kodwa lowo owathi kuye: Wena uyiNdodana yami, lamuhla mina ngikuzele.

⁶Njengoba esitsho futhi kwenye indawo ukuthi: Wena ungumpristi kuze kube phakade ngokohlobo kaMelkizedeki.

⁷Owathi ensukwini zenyama yakhe, esenikele imikhuleko kanye lokunxusa elokukhala okukhulu langezinyembezi kuye olamandla okumsindisa ekufeni, futhi wezwiwa ngenxa yokwesaba kwakhe uNkulunkulu,

⁸loba eyiNdodana, wafunda ukulalela ezintweni ahlupheka ngazo,

⁹esephelelisiwe waba ngumthombo wosindiso olulaphakade kibo bonke abamlalelayo;

¹⁰ebizwa nguNkulunkulu ngokuthi ngumpristi omkhulu ngokohlobo kaMelkizedeki.

¹¹Esilokunengi esingakutsho ngaye futhi okulukhuni ukulichasisela, lokhu selaba buthundu ekuzweni.

¹²Ngoba lapho ebelifanele ukuba ngabafundisi, ngenxa yesikhathi, liswela futhi ukuthi kube khona olifundisayo, ukuthi ziyini izimiso zakuqala zamazwi kaNkulunkulu; selingabafanele uchago, kungeyisikho-ke ukudla okuqinileyo.

¹³Ngoba wonke odla uchago kalalwazi olupheleleyo elizwini lokulunga; ngoba uyingane.

¹⁴Kodwa ukudla okuqinileyo kungokwabakhulileyo, asebesebenzise izingqondo ngokwejwayela ekwehlukaniseni konke okuhle lokubi.