Read Ndebele-IBhayibhili Elingcwele 2006 Ujakopo 2 Bible Online

Ujakopo 2 - Ndebele-IBhayibhili Elingcwele 2006 bible

Ujakopo 2

¹Bazalwane bami, kungeyisikho ngokubandlulula abantu libe lokholo lweNkosi yethu uJesu Kristu, iNkosi yenkazimulo.

²Ngoba uba kungena emhlanganweni wenu indoda elendandatho yegolide lesembatho esikhazimulayo, besekungena longumyanga olesembatho esingcolileyo,

³beselinanzelela ogqoke isembatho esikhazimulayo beselisithi kuye: Wena hlala lapha kuhle, beselisithi kongumyanga: Wena mana lapho; loba: Hlala lapha ngaphansi kwesenabelo senyawo zami;

⁴pho, kalibandlululi phakathi kwenu, njalo laba ngabahluleli abalemicabango emibi yini?

⁵Zwanini, bazalwane bami abathandekayo. UNkulunkulu kabakhethanga yini abayanga balumhlaba, benothile ekholweni, njalo bezindlalifa zombuso awuthembisayo kwabamthandayo?

⁶Kodwa lina libadumazile abayanga. Abanothileyo kabalicindezeli yini, njalo bona balidonsele ekwahlulelweni yini?

⁷Bona kabalihlambazi yini ibizo elihle elibizwa ngalo?

⁸Uba liphelelisa umlayo wobukhosi, ngokombhalo othi: Wothanda umakhelwane wakho njengalokhu uzi thanda wena, lenza kuhle;

⁹kodwa uba libandlulula abantu, lenza isono, lilahlwa ngumlayo njengabaweqayo.

¹⁰Ngoba loba ngubani ogcina umlayo wonke, kodwa akhubeke kokukodwa, uba lecala kuyo yonke.

¹¹Ngoba owathi: Ungafebi; wathi futhi: Ungabulali; uba-ke ungafebi, kodwa ubulala, usungumeqi womlayo.

¹²Khulumani ngokunjalo lenze njalo, njengabazakwahlulelwa ngomlayo wenkululeko.

¹³Ngoba ukwahlulelwa okungelasihawu kungokwalowo ongenzanga isihawu; njalo isihawu sizincoma kukho ukwahlulela.

¹⁴Kusizani, bazalwane bami, uba umuntu esithi ulokholo, kodwa engelamisebenzi? Lolokholo lungamsindisa yini?

¹⁵Uba-ke umzalwane loba umzalwanekazi behambaze njalo beswela ukudla kwensuku ngensuku,

¹⁶omunye wenu abesesithi kibo: Hambani ngokuthula, likhudumale lisuthe; kodwa engabaniki izinto ezidingwa ngumzimba, lokho kusizani?

¹⁷Kunjalo lokholo, uba lungelamisebenzi, lufile ngokwalo.

¹⁸Kodwa omunye uzakuthi: Wena ulokholo, mina-ke ngilemisebenzi: Ngitshengisa ukholo lwakho ngaphandle kwemisebenzi yakho, lami emisebenzini yami ngizakutshengisa ukholo lwami.

¹⁹Wena uyakholwa ukuthi uNkulunkulu munye; wenza kuhle; lamadimoni ayakholwa, njalo athuthumele.

²⁰Kodwa uyathanda ukwazi yini, O siphukuphuku, ukuthi ukholo olungelamisebenzi lufile?

²¹UAbrahama ubaba wethu kalungisiswanga yini ngemisebenzi, esenikele indodana yakhe uIsaka phezu kwelathi?

²²Uyabona ukuthi ukholo lwalusebenza kanye lemisebenzi yakhe, lokuthi ukholo lwapheleliswa ngemisebenzi,

²³kwasekugcwaliswa umbhalo othi: LoAbrahama wakholwa uNkulunkulu, kwasekubalelwa kuye ukuthi kuyikulunga, wasebizwa ngokuthi ngumngane kaNkulunkulu.

²⁴Ngakho-ke liyabona ukuthi umuntu uyalungisiswa ngemisebenzi, futhi kungesikuthi ngokholo kuphela.

²⁵Ngokunjalo-ke loRahabi isifebe kalungisiswanga ngemisebenzi yini, esezemukele izithunywa, ese zi phumise ngenye indlela?

²⁶Ngoba njengalokhu umzimba ngaphandle komoya ufile, ngokunjalo lokholo ngaphandle kwemisebenzi lufile.