Read Ndebele-IBhayibhili Elingcwele 2006 Abakhokheli 2 Bible Online

Abakhokheli 2 - Ndebele-IBhayibhili Elingcwele 2006 bible

Abakhokheli 2

¹Ingilosi ye Nkosi yasisenyuka isuka eGiligali isiya eBokimi, yathi: Ngalenyusa lisuka eGibhithe, ngaliletha elizweni engalifungela oyihlo, njalo ngathi: Kangiyikwephula isivumelwano sami lani kuze kube sephakadeni.

²Lani-ke kaliyikwenza isivumelwano labahlali balelilizwe, lizadiliza amalathi abo. Kodwa kalililalelanga ilizwi lami. Kuyini lokhu elikwenzileyo?

³Ngakho lami ngathi: Kangiyikuzixotsha elifeni phambi kwenu, kodwa zizakuba senhlangothini zenu, labonkulunkulu bazo babe ngumjibila kini.

⁴Kwasekusithi lapho ingilosi ye Nkosi isikhulume lamazwi kubo bonke abantwana bakoIsrayeli, abantu baphakamisa ilizwi labo bakhala inyembezi.

⁵Basebebiza ibizo laleyondawo ngokuthi yiBokimi, bayihlabela i Nkosi lapho.

⁶Kwathi uJoshuwa esebayekele abantu bahamba, abantwana bakoIsrayeli bahamba, ngulowo lalowo waya elifeni lakhe ukudla ilifa lelizwe.

⁷Abantu basebeyikhonza i Nkosi kuzo zonke izinsuku zikaJoshuwa, lazo zonke izinsuku zabadala abasala bephila emva kukaJoshuwa, ababewubonile wonke umsebenzi omkhulu we Nkosi eyayiwenzele uIsrayeli.

⁸UJoshuwa indodana kaNuni, inceku ye Nkosi, wafa-ke, eleminyaka elikhulu letshumi.

⁹Basebemngcwabela emngceleni welifa lakhe eThiminathi-Heresi entabeni yakoEfrayimi, enyakatho kwentaba iGahashi.

¹⁰Njalo lalesosizukulwana sabuthelwa kuboyise. Kwasekusukuma esinye isizukulwana emva kwabo esasingayazi i Nkosi njalo lomsebenzi eyayiwenzele uIsrayeli.

¹¹Abantwana bakoIsrayeli basebesenza okubi emehlweni e Nkosi, bakhonza oBhali.

¹²Batshiya i Nkosi, uNkulunkulu waboyise, eyabakhupha elizweni leGibhithe, balandela abanye onkulunkulu, kubonkulunkulu bezizwe ezazibazingelezele, bakhothama kibo, bayithukuthelisa i Nkosi.

¹³Bayidela i Nkosi, bakhonza uBhali laboAshitarothi *.

¹⁴Ngakho ulaka lwe Nkosi lwavutha kuIsrayeli, yabanikela esandleni sabaphangi ababaphangayo; yabathengisa esandleni sezitha zabo inhlangothi zonke, ukuze bangabe besaba lakho ukuma phambi kwazo.

¹⁵Loba bephuma besiya ngaphi, isandla se Nkosi samelana labo ngokubi, njengokutsho kwe Nkosi lanjengokufunga kwe Nkosi kibo, njalo bacindezeleka kakhulu.

¹⁶I Nkosi yasimisa abahluleli ababophula esandleni salabo ababaphangayo.

¹⁷Kanti kababalalelanga labahluleli babo, kodwa baphinga ngokulandela abanye onkulunkulu, bakhothama kibo; baphambuka masinyane endleleni oyise ababehamba kuyo, belalela imilayo ye Nkosi. Bona kabenzanga njalo.

¹⁸Lalapho i Nkosi ibamisela abahluleli, i Nkosi yayilomahluleli, yabophula esandleni sezitha zabo zonke izinsuku zikamahluleli; ngoba i Nkosi yazisola ngenxa yokububula kwabo ngenxa yalabo ababacindezelayo lababahlukuluzayo.

¹⁹Kwasekusithi ekufeni kukamahluleli, babuyela emuva baxhwala okwedlula oyise, ngokulandela abanye onkulunkulu, ngokubakhonza langokubakhothamela; kabalahlanga okwemisebenzi yabo lokwendlela yabo yenkani.

²⁰Ngakho ulaka lwe Nkosi lwavutha kuIsrayeli, yathi: Ngoba lesisizwe seqe isivumelwano sami engasilaya oyise, kasilalelanga ilizwi lami,

²¹lami kangisayikuxotsha loba ngubani elifeni phambi kwabo ezizweni uJoshuwa azitshiya ekufeni kwakhe,

²²ukuze ngihlole ngazo uIsrayeli ukuthi bazagcina yini indlela ye Nkosi ukuhamba kuyo njengaboyise ba yi gcina, kumbe hatshi.

²³Ngakho i Nkosi yaziyekela lezozizwe, ukuze ingazixotshi elifeni masinyane, njalo kayizinikelanga esandleni sikaJoshuwa.