Read Ndebele-IBhayibhili Elingcwele 2006 2 Ujwanisi 1 Bible Online

2 Ujwanisi 1 - Ndebele-IBhayibhili Elingcwele 2006 bible

2 Ujwanisi 1

¹Umdala kunkosikazi ekhethiweyo lakubantwana bayo, mina engibathanda ngeqiniso, njalo kungeyisimi ngedwa kodwa labo bonke asebelazi iqiniso,

²ngenxa yeqiniso elihlala kithi, lelizakuba lathi kuze kube nininini:

³Kakube lani umusa, isihawu, ukuthula okuvela kuNkulunkulu uYise, leNkosini uJesu Kristu iNdodana kaBaba, eqinisweni lethandweni.

⁴Ngathokoza kakhulukazi ukuthi ngithole ebantwaneni bakho abahamba eqinisweni, njengoba semukela umlayo kuYise.

⁵Khathesi-ke ngiyakuncenga, nkosikazi, kungenjengokuthi ngikubhalela umlayo omutsha, kodwa lowo esasilawo kusukela ekuqaleni, ukuze sithandane.

⁶Njalo yilolu uthando, ukuthi sihambe ngokwemilayo yakhe. Yilo umlayo, njengoba lezwa kusukela ekuqaleni, ukuthi lihambe kiwo.

⁷Ngoba abakhohlisi abanengi sebengene emhlabeni abangavumiyo ukuthi uJesu Kristu weza enyameni. Lo ngumkhohlisi lomphikuKristu.

⁸Ziqapheleni ukuthi singalahlekelwa yizinto esesizisebenzile, kodwa semukele umvuzo opheleleyo.

⁹Wonke oweqayo njalo angemi emfundisweni kaKristu, kalaNkulunkulu; ohlala emfundisweni kaKristu, lowo ulabo bobabili uYise leNdodana.

¹⁰Uba kufika umuntu kini, njalo engalethi le imfundiso, lingamemukeli endlini, futhi lingambingeleli;

¹¹ngoba lowo ombingelelayo, uhlanganyela lemisebenzi yakhe emibi.

¹²Ngilezinto ezinengi zokulibhalela, kangithandanga ukubhala ngephepha leyinki; kodwa ngithemba ukuza kini, ngikhulume lani umlomo ngomlomo, ukuze intokozo yethu igcwale.

¹³Abantwana bakadadewenu okhethiweyo bayakubingelela. Ameni.