Read Ndebele-IBhayibhili Elingcwele 2006 3 Ujwanisi 1 Bible Online

3 Ujwanisi 1 - Ndebele-IBhayibhili Elingcwele 2006 bible

3 Ujwanisi 1

¹Umdala, kuye uGayusi othandekayo, mina engimthanda ngeqiniso.

²Sithandwa, kuzo zonke izinto jikelele ngifisa ukuthi uphumelele njalo uphile, njengalokhu umphefumulo wakho uphumelela.

³Ngoba ngathokoza kakhulukazi, lapho kufika abazalwane, befakazela iqiniso lakho, njengoba wena uhamba eqinisweni.

⁴Kangilantokozo enkulu edlula lezizinto, ukuthi ngizwe ukuthi abantwana bami bahamba eqinisweni.

⁵Sithandwa, wenza ngokuthembeka loba ngakuphi okwenzela abazalwane lakwabemzini,

⁶abafakazele uthando lwakho phambi kwebandla; uzakwenza kuhle uba ubaphelekezela ngokufanele uNkulunkulu.

⁷Ngoba ngenxa yebizo lakhe baphumile bengemukeli lutho kwabezizwe.

⁸Ngakho thina sifanele ukubemukela abanjalo, ukuze sibe yizisebenzi kanye leqiniso.

⁹Ngabhalela ibandla; kodwa uDiyotrefe othanda ukuba ngowokuqala kibo kasemukeli.

¹⁰Ngakho, uba ngifika, ngizakhumbuza imisebenzi yakhe ayenzayo, uyasihleba ngamazwi amabi; futhi kakholiswa yilezizinto, yena uqobo kemukeli abazalwane, uyabalela lalabo abathanda ukukwenza, njalo uya ba xotsha ebandleni.

¹¹Sithandwa, ungakulingiseli okubi, kodwa okuhle. Owenza okuhle ungokaNkulunkulu; kodwa owenza okubi kambonanga uNkulunkulu.

¹²NgoDemetriyu kufakazwe yibo bonke, langeqiniso uqobo; lathi futhi siyafakaza, lani liyazi ukuthi ubufakazi bethu buqinisile.

¹³Bengilezinto ezinengi zokubhala, kodwa kangithandi ukukubhala ngeyinki losiba;

¹⁴kodwa ngithemba ukukubona masinyane, sibe sesikhuluma umlomo ngomlomo. Ukuthula kakube kuwe. Abangane bayakubingelela. Bingelela abangane ngamabizo.