Read Ndebele-IBhayibhili Elingcwele 2006 Isambulo 7 Bible Online

Isambulo 7 - Ndebele-IBhayibhili Elingcwele 2006 bible

Isambulo 7

¹Emva kwalezizinto-ke ngabona ingilosi ezine zimi emagumbini womane omhlaba zibambe imimoya emine yomhlaba, ukuze kungavunguzi moya emhlabeni, kumbe olwandle, loba kwesisodwa isihlahla.

²Ngasengibona enye ingilosi isenyuka isuka lapho eliphuma khona ilanga, ilophawu lukaNkulunkulu ophilayo; yasimemeza ngelizwi elikhulu kungilosi ezine, okwakunikwe kuzo ukona umhlaba lolwandle,

³isithi: Lingoni umhlaba, kumbe ulwandle, kumbe izihlahla, size siphawule izinceku zikaNkulunkulu wethu emabunzini azo.

⁴Ngasengisizwa inani elababephawulwa: Zinkulungwane ezilikhulu lamatshumi amane lane abaphawulwayo ezizweni zonke zabantwana bakoIsrayeli;

⁵esizweni sakoJuda baphawulwa abazinkulungwane ezilitshumi lambili; esizweni sakoRubeni baphawulwa abazinkulungwane ezilitshumi lambili; esizweni sakoGadi baphawulwa abazinkulungwane ezilitshumi lambili;

⁶esizweni sakoAsheri baphawulwa abazinkulungwane ezilitshumi lambili; esizweni sakoNafithali baphawulwa abazinkulungwane ezilitshumi lambili; esizweni sakoManase baphawulwa abazinkulungwane ezilitshumi lambili;

⁷esizweni sakoSimeyoni baphawulwa abazinkulungwane ezilitshumi lambili; esizweni sakoLevi baphawulwa abazinkulungwane ezilitshumi lambili; esizweni sakoIsakari baphawulwa abazinkulungwane ezilitshumi lambili;

⁸esizweni sakoZebuloni baphawulwa abazinkulungwane ezilitshumi lambili; esizweni sakoJosefa baphawulwa abazinkulungwane ezilitshumi lambili; esizweni sakoBhenjamini baphawulwa abazinkulungwane ezilitshumi lambili.

⁹Emva kwalezizinto ngabona, khangela-ke, ixuku elikhulu, okungelamuntu ongalibala, elivela kuzo zonke izizwe lemihlobo labantu lezindimi, limi phambi kwesihlalo sobukhosi laphambi kweWundlu, lembethe izembatho ezimhlophe, le ngatsha zezihlahla zamalala ezandleni zabo;

¹⁰njalo limemeza ngelizwi elikhulu, lisithi: Usindiso kuNkulunkulu wethu ohlezi esihlalweni sobukhosi, lakulo iWundlu.

¹¹Lengilosi zonke zazimi zihanqe isihlalo sobukhosi labadala lezidalwa ezine eziphilayo, zasezisiwa ngobuso bazo phambi kwesihlalo sobukhosi, zasezikhonza uNkulunkulu,

¹²zisithi: Ameni. Ukudunyiswa lobukhosi lenhlakanipho lokubonga lodumo lamandla lengalo kakube kuNkulunkulu wethu kuze kube nini lanini. Ameni.

¹³Omunye wabadala wasephendula, esithi kimi: Laba abembethe izembatho ezimhlophe, ngobani, futhi bavela ngaphi?

¹⁴Ngasengisithi kuye: Nkosi, nguwe owaziyo. Wasesithi kimi: Laba yibo abaphuma ekuhluphekeni okukhulu, basebewatsha izembatho zabo benza izembatho zabo zaba mhlophe egazini leWundlu.

¹⁵Ngakho baphambi kwesihlalo sobukhosi sikaNkulunkulu, bamkhonza emini lebusuku ethempelini lakhe; lohleziyo esihlalweni sobukhosi uzabasibekela.

¹⁶Kabasayikulamba, njalo kabasayikoma, lelanga kaliyikuwela phezu kwabo, kumbe lokutshisa;

¹⁷ngoba iWundlu elingaphakathi kwesihlalo sobukhosi lizabondla, libakhokhele emithonjeni ephilayo yamanzi; loNkulunkulu uzakwesula yonke inyembezi emehlweni abo.