Read Ndebele-IBhayibhili Elingcwele 2006 Urute 4 Bible Online

Urute 4 - Ndebele-IBhayibhili Elingcwele 2006 bible

Urute 4

¹UBhowazi wasesenyukela esangweni, wahlala phansi lapho. Khangela-ke, kwedlula isihlobo esingumhlengi leso uBhowazi ayekhulume ngaso. Wasesithi: Phambuka uhlale phansi lapha, we zibanibani. Wasephambuka, wahlala phansi.

²Wasethatha amadoda alitshumi ebadaleni bomuzi, wathi: Hlalani phansi lapha. Asehlala phansi.

³Wasesithi kulesosihlobo esingumhlengi: Isiqinti sensimu esasingesomfowethu uElimeleki, uNawomi, osebuyile evela elizweni lakoMowabi, wasithengisa.

⁴Ngakho mina ngithe: Ngikwembule e ndlebe ni yakho ngisithi: Sithenge phambi kwabahlali laphambi kwabadala babantu bakithi. Uba uzasihlenga, sihlenge. Kodwa uba engekho ongasihlenga, ungitshele, ukuze ngazi; ngoba engekho ngaphandle kwakho ongasihlenga, mina-ke ngilandela wena. Wasesithi: Mina ngizasihlenga.

⁵UBhowazi wasesithi: Mhla uthenga insimu esandleni sikaNawomi, uzayithenga lakuRuthe umMowabikazi, umfazi womuyi, ukuze umise ibizo lomuyi elifeni lakhe.

⁶Lesosihlobo esingumhlengi sasesisithi: Ngingeke ngazihlengela sona, hlezi ngone ilifa lami. Zihlengele wena ilungelo lami lokuhlenga, ngoba kangilamandla okuhlenga.

⁷Lokhu-ke kwakukhona mandulo koIsrayeli mayelana lokuhlenga lokuntshintsha, ukuqinisa lonke udaba: umuntu akhiphe inyathela lakhe, alinike umakhelwane wakhe; lokhu-ke kwakuyibufakazi koIsrayeli.

⁸Ngakho isihlobo esingumhlengi sathi kuBhowazi: Zithengele yona; sasesikhipha inyathela laso.

⁹UBhowazi wasesithi kubadala lakubo bonke abantu: Lingabafakazi lamuhla bokuthi ngithengile konke okwakungokukaElimeleki lakho konke okwakungokukaKiliyoni lokukaMaheloni esandleni sikaNawomi.

¹⁰LoRuthe laye umMowabikazi, umkaMaheloni, ngizithengele ukuze abe ngumka mi, ukuze ngimise ibizo likamuyi elifeni lakhe, ukuze ibizo lomuyi lingaqunywa lisuke phakathi kwabafowabo lesangweni lendawo yakhe. Lingabafakazi lamuhla.

¹¹Bonke abantu ababesesangweni labadala basebesithi: Singabafakazi; kungathi i Nkosi ingamenza lo owesifazana ongena endlini yakho abe njengoRasheli lanjengoLeya abakha bobabili indlu kaIsrayeli. Njalo wenze ngamandla eEfratha, uzenzele ibizo eBhethelehema,

¹²lendlu yakho ibe njengendlu kaPerezi uTamari amzalela uJuda, ngenzalo i Nkosi ezakunika yona ngalo owesifazana omutsha.

¹³Ngakho uBhowazi wamthatha uRuthe, waba ngumkakhe; wasengena kuye, i Nkosi yamnika ukuthi athathe isisu, wazala indodana.

¹⁴Abesifazana basebesithi kuNawomi: Kayibusiswe i Nkosi engakutshiyanga ungelaso isihlobo esingumhlengi lamuhla, ukuthi ibizo laso limenyezelwe koIsrayeli!

¹⁵Uzakuba kuwe ngumbuyisi wempilo lomondli wobudala bakho, ngoba umzele umalokazana wakho okuthandayo, ongcono kuwe kulamadodana ayisikhombisa.

¹⁶UNawomi wasemthatha umntwana, wamfaka esifubeni sakhe, waba ngumlizane wakhe.

¹⁷Omakhelwanekazi basebemutha ibizo besithi: Kulendodana ezalelwe uNawomi. Babiza ibizo layo uObedi; nguyise kaJese, uyise kaDavida.

¹⁸Lalezi yizizukulwana zikaPerezi. UPerezi wazala uHezironi,

¹⁹uHezironi wasezala uRamu, uRamu wasezala uAminadaba,

²⁰uAminadaba wasezala uNashoni, uNashoni wasezala uSalimoni,

²¹uSalimoni wasezala uBhowazi, uBhowazi wasezala uObedi,

²²uObedi wasezala uJese, uJese wasezala uDavida.