Read Ndebele-IBhayibhili Elingcwele 2006 1 Usamyela 3 Bible Online

1 Usamyela 3 - Ndebele-IBhayibhili Elingcwele 2006 bible

1 Usamyela 3

¹Umfana uSamuweli wayesebenzela i Nkosi phambi kukaEli. Lelizwi le Nkosi laliligugu ngalezonsuku; kwakungekho lombono osabaleleyo.

²Kwasekusithi ngalolosuku uEli elele endaweni yakhe, lamehlo akhe eseqala ukufiphala engelakubona,

³lesibane sikaNkulunkulu sasingakacitshwa, njalo uSamuweli wayelele ethempelini le Nkosi, lapho okwakukhona umtshokotsho kaNkulunkulu,

⁴i Nkosi yambiza uSamuweli, owathi: Khangela ngi lapha.

⁵Wasegijimela kuEli, wathi: Khangela ngi lapha, ngoba ungibizile. Wasesithi: Kangibizanga, buyela ulale. Wasesiyalala.

⁶I Nkosi yasibuya imbiza uSamuweli futhi. USamuweli wasevuka waya kuEli, wathi: Khangela ngi lapha, ngoba ungibizile. Kodwa wathi: Kangibizanga, ndodana yami; buyela ulale.

⁷Kodwa uSamuweli wayengakayazi i Nkosi, lelizwi le Nkosi lalingakembulwa kuye.

⁸I Nkosi yasimbiza futhi uSamuweli ngokwesithathu. Wasevuka waya kuEli wathi: Khangela ngi lapha, ngoba ungibizile. UEli waseqedisisa ukuthi i Nkosi imbizile umfana.

⁹Ngakho uEli wathi kuSamuweli: Hamba uyelala; kuzakuthi-ke nxa ikubiza uzakuthi: Khuluma Nkosi, ngoba inceku yakho iyezwa. Wasehamba uSamuweli, walala endaweni yakhe.

¹⁰I Nkosi yasisiza, yema, yabiza njengakwezinye izikhathi: Samuweli, Samuweli! Wasesithi uSamuweli: Khuluma, ngoba inceku yakho iyezwa.

¹¹I Nkosi yasisithi kuSamuweli: Khangela, ngizakwenza into koIsrayeli ezakhenceza indlebe zombili zalowo wonke oyizwayo.

¹²Ngalolosuku ngizakwehlisela uEli konke engakukhuluma ngendlu yakhe; ngiqalise ngiqede.

¹³Ngoba ngimtshelile ukuthi ngizagweba indlu yakhe kuze kube nininini ngesiphambeko asaziyo, ngoba amadodana akhe aziqalekisa, kodwa kawakhuzanga.

¹⁴Ngakho-ke ngifungile kuyo indlu kaEli ukuthi ububi bendlu kaEli isibili kabuyikuhlangulwa ngomhlatshelo langomnikelo kuze kube phakade.

¹⁵USamuweli waselala kwaze kwasa; wavula iminyango yendlu ye Nkosi, kodwa uSamuweli wesaba ukumtshela uEli umbono.

¹⁶UEli wasembiza uSamuweli, wathi: Samuweli, ndodana yami. Wasesithi: Khangela ngi lapha.

¹⁷Wasesithi: Yinto bani eyikhulume kuwe? Ake ungangifihleli; kenze njalo uNkulunkulu kuwe, ngokunjalo engezelele, uba ungifihlela ulutho lwazo zonke izinto akutshele zona.

¹⁸Ngakho uSamuweli wasemtshela zonke izinto, kamfihlelanga lutho. Wasesithi: Yi Nkosi, kayenze lokho okulungileyo emehlweni ayo.

¹⁹Wakhula-ke uSamuweli, le Nkosi yayilaye, kayiyekelanga lelilodwa lamazwi ayo liwele emhlabathini.

²⁰UIsrayeli wonke-ke kusukela koDani kuze kube seBherishebha wazi ukuthi uSamuweli uqinisiwe ukuthi abe ngumprofethi we Nkosi.

²¹I Nkosi yaphinda yabonakala eShilo, ngoba i Nkosi yazibonakalisa kuSamuweli eShilo ngelizwi le Nkosi.