Read Nduga MATIUS 10 Bible Online

MATIUS 10 - Nduga bible

MATIUS 10

¹Misik tarem Yesus na-ge at owosirak duabelas iri na wene mbo unpuruk, at-nen amawi wok ondosolar-e, kugi wirik purak amawi min, yi kugi ndi kugi enpem mbidnak nap nde, andi bandi kaidnak nap nde, ki rak unpurak amawi irit wok indij-o.

²Nde, at owosirak ap duabelas iri na unnu-ge yur-o: Nandug-e Simon, nde at unu misig-e Peterus min, at owot Andereas min, Sebendeus ambara Yakobus min at owot Yoanes min,

³Pilipus min, Mbatolomeus min, Tomas min, pemerinta enmanggim tol ndok woroso nap Matius min, Alpius ambara Yakobus min, Tarius min,

⁴nuwi nggweyag-o luk imiri yoso nap Simon min, Yesus onggo yarid nap Yuras Ikariot min irir-o.

⁵Yesus-nen ap duabelas iri na wirik onposolat-nen yak ondosolar-e: “Enlem nin nap endam mbururak pug-o. Nde, Samaria nap unuwi silmu na nggurak pug-o.

⁶Are, lak yidnak lomba wam, enlem Isarael nap endam mberer-o.

⁷Mborogolar-e, ‘Mbal Pem Nagawan-nen tenagaidnak wi-ge panggo yij-o!’ luk yak indil mberer-o.

⁸Kugi enpem mbidnak nap na ki rak onpogolat, wat yidnak nap na unluk tak pogolat, ndigiril laso mbijap enpem mbidnak nap na ambut tak onpogolat, ap enarem nggwidnak kugi na wirik pogolat mer-o. Kit na onggo lak wanigepndik me, onggo lag-et kwat enper-o.

⁹Emas tol nde, perak tol nde, kerep tol nde, kit kunsum mu yatluk mbururak pug-o.

¹⁰Kot manik nde, kenpe sum mberen tak nde, kunuwok sum nde, wangun nde, waruk mbururak pug-o. Yabu wanoso nab-e at-nen ukwe peraidnag-e onggo-ge wanosor-o.

¹¹Kit-nen-e o siri nggulok ala na, o siri marik ala na nggogolar-e, kit imin tak kunpurak nap ndak nggal misik ogore luk, at ama nggugupndik, imin woraruk, mbururak tarem ndak ala, mbururag-o.

¹²Kit-nen ap enma nggogolar-e: ‘Nagawan Indo-nen imbiringgat tak kumpuwag-o’ luk yak undurag-o.

¹³Nde, o iri nap-nen wok konpogola, kit-nen wa yak undugup iri-ge it enpem wolmag-o. Alat nde, it-nen nde wok kinpigit lak yogola-ge, kit-nen wa yak undugup na-ge tuguruk lit ker-o.

¹⁴Nde, it-nen nde kit wok kinpigit lak, kit-nen yidnak wene na wanigit lak yogola-ge, o ala na, o siri ala na, keya buruk mborogolar-e, kunuwok liri pil karuk mbururag-o.

¹⁵An-nen yak kendeyeg-o: Ap enpem wene mbarurak tarem-nen-e Mbal Pem Nagawan-nen-e Sorom woragwi min Nggomora woragwi min unpud kujwa-t nde, o siri iri me woragwi nap na unpuj-e kujwa bug-o.”

¹⁶“Yu nde ker-o. An-nen wirik konposolar-e, lomba wam-e ndakngge enggendumu wirik pugwi nggal wirik kunpusu-o. Iri bem-e, kir-e kinndi tenggerak waro nggal woragolat, kinndi yanggonak towe merpati nggal woragolat mer-o.

¹⁷Ap oboksa enabiyem-o luk kwil kwalsa wolmer-o. Ap erep-nen-e kit wok kunpuruk, wene mbarugwi nap endam kinpil mborogola, it-nen idnak tepan yugwi ma ereba me-nen linggamburok kunduwa-o.

¹⁸An nebem ala, kit kenpem wene mbarogolar-e, pemerinta wari nde, nagawan nagawan nde ininggem kunpuwama, nanongga kir-e an nowene it min enlem nin nap min yak undugub-o.

¹⁹Alat nde, kit kenpem wene mbaruwakluk wok kunpuruk mborogola-ge, kir-e: ‘An-e no wene nde yimin-o?’ luk kinndi kabak yurak pug-o. Nde, wene yurak tarem wok yosola-ge, kit-nen yurak wene iri-ge kenemndam tak puwa-o.

²⁰Nde, iri tarem wene yuwa iri-ge kit-nen-e lag-o, are, Kineid Indi at-nen kit kenemndam-nen wene yuwa-o.

²¹Onowe onowot-net nde, onowe onowot na unduwakluk inminep wisirik pogolat, ineidtak-net nde, inlirak unduwakluk inminep wisirik pogolat, inlirak-net nde ineid iniyarak insilepma enpem puruk, ineid iniyarak unduwakluk inminep wisirik pogolat ma-o.

²²An nunu bem ap oboksa-nen insili rak kunpuwa-t nde, momak puruk irit worasoma, woroksiyem wok ma nab-e imiri yuwa-o.

²³Nde, o siri misik me-nen lel mberel konpogola-ge, o iri me keya buruk, o siri nin me mberer-o. An-nen yak kendeyeg-o: Kir-e Isarael nap unuwi siri oboksa awo iniyil nigit lak ma, Ap Ambara na lobok yuwa-o.

²⁴Mul ondogola kulugwi nap-nen-e it mul undugwi nap nggal kek tag-e lag-o. Nde, ndegel poso nap na irit at ndugurusu nap iri nggal kek tag-e lag-o.

²⁵Iri ala-ge, mul tidnak nap iri na-ge at mul toso nap nggal ndak ndak kwat yidnak ala-ge, ndag-er-o. Nde, ndegel poso nap na irit, at ndugurusu nap nggal ndak ndak kwat yidnak ala-ge, ndag-er-o. Nde, o winde na unu nde ‘Mbelsebul-o’ luk yugwi ala-ge, at ama woragwi oboksa na iri nggal-et unnu-ge meya lombok yuwa-o.”

²⁶“Iri bem-e, ki nap enaye kudtak pug-o. Lumurak worasu mende oboksa-ge nam tak puwa-o. Nde, kura woraso oboksa na nam tak puwa-o.

²⁷An-e mom ki rak ma-nen yak kindigi wene iri-ge kir-e nam mo bem tak purag-o. Nde, kit keneyanggo ma nggumuksa pil nggwidnak wene iri-ge kit-nen-e silmu rak purag-o.

²⁸Kinndi-ge wirigit lak, we kenaboro nak wururak nap iri-ge enaye kudtak pug-o. Are, kan mare arem-nen kenpe min-et kinndi min-et lak tak kunpurak Mbal Pem Nagawan nak aye kudtag-o.

²⁹Towe wamsa mberen iri na onggo-ge satu sen nak wanugwi-t nde. Kineid indi-n peragit lak ma-ge, towe misiget ter-o luk nggweyak ma kapsa mboso bug-o.

³⁰Nde, kir-e kenanggulusu oboksa wonarak worasu-o.

³¹Iri bem-e, kwiye kali-ge meyog-o. Towe wamsa kwarat iri-ge te-t nde, kir-e ijar-o.”

³²“Nde, ap inmbiri bem-et nde, ‘Yesus iri-ge an-e naru-o’ luk nam para yuwa nab-e an-nen na an Neid aid arem woraso imbiri bem-et nde, iri yidnak nap imin-e: ‘Ap yu-ge an-e naru-o’ luk nam para yimin-o.

³³Alat nde, ap inmbiri bem-et nde, ‘Yesus iri-ge an naru bug-o’ luk nam para yuwa nab-e an-nen na an Neid aid arem woraso na imbiri bem-et nde, iri yidnak imin-e: ‘Ap yu-ge an-e naru bug-o’ luk nam para yimin-o.”

³⁴“Kit-nen peragolar-e, an lobok yigi-ge nggweyak ma yu me ap lambuk tak enpeyekluk lobok yij-o luk peragub-o. An-e ap lambuk tak unpurak pem lobok yigi-ge lag-o. Are, uguri worak enpeyekluk lobok yigi-o.

³⁵An nebem-nen ndowaga ambara-nen eid imin kuri wat yosolat, ara-nen ija imin kuri wat yosolat, ambara ogwe-nen un ija imin kuri wat makluk lobok yigi-o.

³⁶It inmin sirid nab-e it ondomok enma woragwi nap iri-net sirid nap ma-o.

³⁷Ta-nen nde eid ija enabuwa nggulok tak posolat, an nabuwa marik tak pusu nab-e an nap kwat momtag-e meya-o. Nde, ta-nen nde at ambara nde ara nde nak enabuwa nggulok tak posolat, an nabuwa marik tak pusu nab-e an nap kwat momtag-e meya-o.

³⁸Nde, at-nen idnak e lang pang tak pidnak iri na pijanuruk an nijok pem waring kasu buk nab-e an nap kwat momtag-e meya-o.

³⁹Ta-nen nde at uruk wolmomtak iri na indi angin yusu nab-e, at uruk wolmomtak iri kabak ma-o. Nde, ta-nen nde an nebem ala at uruk wolmomtak na iminep wisirik puwa nab-e, uruk wolmomtak elem irit lesa wanuwa-o.”

⁴⁰“Ta-nen nde kit wok kunpusu nab-e an-et wok nubusu-o. Nde, an wok nubusu nab-e an wirik nibil lobok yid nap na-t wok ubusu-o.

⁴¹Nde, Mbal Pem Nagawan ene lomboksa yoso nap na wok obosolar-e: ‘Yu-ge Mbal Pem Nagawan ene lomboksa yoso nap-nen yusu-o’ luk wok ubuwa nab-e Mbal Pem Nagawan ene lomboksa yugwi nap-nen wanugwi onggo iri ndak ndak wanuwa-o. Nde, lud tak nak kwaroso nap wok obosolar-e: ‘Yuge lud tak nak kwaroso nap-nen yusu-o’ luk wok ubuwa nap iri-ge lud tak nak kwarugwi nap-nen onggo wanugwi iri ndak ndak wanuwa-o.

⁴²An-nen yak kendeyeg-o: ‘yu-ge Yesus imin nugwi-o’ luk an nimbirik noso nap marik komosa-t nde, yimbe marik arem yi eyak worak kenangga mak tuwa nap iri-ge onggo lag-e lag-o. Onggo-t wanuwa-o.”