Read Nduga MATIUS 11 Bible Online

MATIUS 11 - Nduga bible

MATIUS 11

¹Yesus na-ge at owosirak duabelas iri na wene abu mul ondosuluk yarig-e, o iri me keya buruk mborosolar-e, o siri korok korok ereba na aid wene yosolat, wene mirik onposolat kwaril waring kagaij-o.

²Yoanes na-ge o kubu me woralat-nen Kerisut-nen kwarusu wene na obok kolosoluk yarik, at owosirak ereb-e wene yu kin wanuwakluk Yesus eram wirik inpij-o.

³Kin wok obogolar-e: “Abok lobok yuwa-o yili na-ge kar-et, lak? Are, nin mbi yik karok wulmul-a, ngge-o?” luk kin wok ibiga-o.

⁴Yogolikma-ge, Yesus-nen wene erep nggarosolar-e: “Kit kunuwok lem mburugupndik, kit keneyanggo-nen kulili wene min kenlengen-nen kali wene min at Yoanes yak til mberer-o.

⁵Enlengen ngguru nap na enlengen kuwarak posolat, onowak wat yidnak nap na tula nugwi rak onposolat, ndigiril laso mbijap enpem mbidnak nap na ambut tak onposolat, eneyanggo lak nap na wene kologolat, wat yidnak nap na unluk tak posolat insilobulo lak nap na aid wene yak ondosolat kwarusu-o.

⁶Nde, an nebem ala indi mberen yugwi buk nab-e enalen kujwag-o” luk yak indij-o.

⁷Nde, Yoanes imin nugwi nap iri na mborogola ereya na-net Yesus-nen ap kwarat iri na Yoanes owene yak ondosolar-e: “Kir-e no kujwokluk-nen karu me mbirigeb-o? Obube-nen yorowa urugup eregap tak pusu ereba na kujwokluk mbirigep, lak?

⁸Are, no mende nde kujwokluk mbirigeb-o? Usum konik konak yiridnak nap nde kil mbirigep, lak? Nde unsum konak yurugwi nab-e nagawan woragwi sa nak woragwi-o.

⁹Nde, no mende nde kujwokluk mbirigeb-o? Mbal Pem Nagawan ene lomboksa yoso nap kujwokluk mbirigep, lak? Ye, an-nen yak kendeyeg-o. At iri-ge Mbal Pem Nagawan ene lomboksa yoso nap iri nag-e lag-o. At iri-ge nggulok terak minik-net yusu-o.

¹⁰Mbal Pem Nagawan Engga mbarak pem-nen Yoanes na imin yosolar-e: ‘Yu nde ki-o. Mbal Pem Nagawan nap iri na-ge kat kabuwok nanduk wirik ubumu-ge, at-nen-e kat kurula mondok ya kubuwa-o’ luk yij-o.

¹¹An-nen ndemeret yak kendeyeg-o: Kwami-nen ndet inpidnak nap misig-e Yoanes nggal mbi woragwi bug-o. At iri-ge terak minik mondok kek tak-nen yusu-t nde, obok lak narik woraso nap Mbal Pem Nagawan-nen tenagaidnak wi worasu nap iri perak nde Yoanes nggal-e lag-o. Terak minik nggulok-nen yusu-o.

¹²Ap yi maroso nap Yoanes na lobok yid kuri-nen yawo kuri-ge Mbal Pem Nagawan-nen tenagaidnak wi iri na winde yuwokluk enmawi kondogolar-e, Mbal Pem Nagawan elem nap pela mbo mbo rak inpili-o.

¹³Nde, Mbal Pem Nagawan enelomboksa yugwi nap oboksa-nen na, imiri mbarak pidnak wene-nen na abok-nen kwarurak wene nam tak pogolar-e, Yoanes nam agaid kuri ereya-nen urul piga-o.

¹⁴Nde, kir-e it-nen urul piga iri na ebem kinndi angin tubu yugup nde ala-ge, abok-nen lobok yuwa Elia iri-ge Yoanes at-net yusu-o luk yebet kagub-o.

¹⁵Ta-nen nde eyanggo worak ala-ge, wene yu kuluwag-o.

¹⁶Nde, yawo unluk worali nap yu-ge no min ndak wirimin-o? It iri na-ge onggo wanugwi sa li marik marik koreyak woragolat-nen enne nggoksa yak kerak mbogolar-e:

¹⁷‘Nir-e ndawi ebe yobokluk, ndawi imid yige-t nde, kir-e ebe yigit lag-o. Nir-e yip tobokluk, yip lilan wanige-t nde, kir-e yip tigit lag-o’ luk yugwi iri nggal-nen yili-o.

¹⁸Nde, Yoanes na lobok yarik, mburu min yi min ninggit lak worasola karuk, it-nen yogolar-e: ‘At iri-ge kugi arem nggwidnak nap-nen yusu-o’ luk yiga-o.

¹⁹Nde, Ap Ambara an lobok yosolar-e, mburu min yi min nasola karuk, it-nen yogolar-e: ‘Nunggwi mende karum karum naso nap, anggut engen amburu ndonggosa naso nap, pemerinta enmanggim tol ndok wurugwi nap min meya yugwi nap min ennggam iri nde ker-o!’ Mbal Pem Nagawan indi tenggerak iri-ge at-nen kwaroso bem-nen enaru rak poso-o” luk yij-o.

²⁰Iri luk, Yesus-nen kwiye worak mende kwarat it ennggendumu-nen kwaridnag-et nde, it iri na-ge kondok yigit lak ala karuk, o siri ereba na met onposolar-e:

²¹“O Korasin woragwi min Mbetsaira woragwi min wa-e. Kenpem mbuma mende bem kenabuwa-o! Kit kendam woralat-nen kwiye worak mende kwarigi iri na-ge o Tirus min Siron min endam-nen kwatlep nggal-e, o iri me nap-nen-e obi-net it meya yidnak keya buruk kondok yogolar-e, sum meya yorogolat, mabe enanggul pem ndarogolat yeleb-o.

²²Iri ala-ge, an-nen yak kendeyeg-o: Ap pidsa enpem wene mbaruwa tarem-nen-e Tirus nap min Siron nap min enpem wene te-t mbaruwa-t nde, kit kenpem-e angin worag-et mbaruwa-o.

²³Nde, Kaperenaum yu-ge wa-e! Kit kunnu-ge nggigisa aid arem wok ma perali-a? Lag-o. Kit perak nde kan mare arem peleksa kinpil ngguwa-o. Kit kendam-nen kwaridnak kwiyek worak mende iri-ge Sorom nap endam-nen kwarigi nggal-e Sorom iri-ge yawo na woraleb-er-o.

²⁴Alat nde, an-nen yak kendeyeg-o: Ap pidsa enpem wene mbaruwa tarem-nen-e Sorom nap enpem wene te-t mbaruwa-t nde, kit kenpem-e angin worag-et mbaruwa-o” luk met inpij-o.

²⁵Iri na tarem-e Yesus-nen yosolar-e: “Neid wa-e. Kar-e aid arem min nggweyak ma min tena woraso Nagawan Indo-nen yusu-o. Kat-nen-e inndi nggat nggat worak nap min inndi pindong tak nap min endam-nen kura bigen mende iri-ge enaru buk nap na nam-et yak indigen iri bem-e an-e wa yak kurusu-o.

²⁶Ye, Neid wa-e. Iri-ge kat kindi-n pidnak ndak ndag-et kwarij-o.

²⁷An Neid-nen-e yi mende ndi mende oboksa-ge an ninggem-et pij-o. Eid arig-et nak-nen Ambara aru yusu-o. Nde, Ambara an-nen na irit, Ambara an-nen: ‘Neid iri enaru mag-o’ luk eberamin nap-nen na irit, Eid na enaru yili-o.

²⁸Kenpabok lak yugwi nap min angin worak mende pijanuruk nugwi nap min-e kit pidsa an neram lobok yer-o. An-nen-e kenpabok kwasa wok kindimin-o.

²⁹An-nen yidnak yidnak nak kwarogolat, an-nen kwaroso na mul kora yer-o. An-e ap yanggonak, nindi teberak nak woraso me, kit kinndi yamuk ma-o.

³⁰An-nen kwarobokluk yak kondoso wene iri-ge enalen tak poso wene-nen yusu-o. Nde, an-nen kud toso mende kenpem pimin iri-ge angin worag-e lag-o” luk yij-o.