Read Nduga MATIUS 13 Bible Online

MATIUS 13 - Nduga bible

MATIUS 13

¹Iri na tarem-e Yesus na-ge o iri keya buruk mberarik, yi koma eyak pem kore yij-o.

²Koreyak worasoma-ge, at eram-e ap mondok kwarat-nen at panggon obogola, at na-ge e koma arem ngguruk, kore yosola-ge, ap ereba na oboksa-ge yi koma eyak pem mendak woraiga-o.

³Woragola-ge, at-nen nden karuk wene bem wene kwarat yak ondosolat-nen yosolar-e: “Uwi pil kaso nap misig-e uwi pil kil mbirij-o.

⁴Nde, uwi na pil kasola-ge, uwi ereb-e tulabiyem mbamu-ge, towe na lobok yarig-e, woroksa ninggij-o.

⁵Nde, uwi ereb-e kerep pem, nggweyak na mariget nak me mbamu-ge, nggweyag-e lak nggal me, uwi na-ge ndag-et nak tup luk mbirij-et nde,

⁶mo pil wasolar-e, terabet yij-o. Nde, iri yid iri-ge emengen kwara mbigit lak me, terabet luk umbuk yij-o.

⁷Uwi ereb-e linggat ndumu mbamu-ge, linggat iri na luwasolar-e, perena lak tak pij-o.

⁸Uwi ereb-e nggweyak konak pem mbid iri na-nen engen posolar-e, ereb-e seratus nggal posolat, ereb-e enam pulu nggal posolat, ereb-e tiga pulu nggal posolat yij-o.

⁹Ta-nen nde eyanggo worak ala-ge, wene yu kuluwag-o!” luk yij-o.

¹⁰Iri luk, at owosirag-e Yesus eram lobok yigarik, at kin wok obogolar-e: “Kar-e noluk-nen nden karuk wene bem wene yak ondoso-o?” luk kin wok piga-o.

¹¹Yogolikma-ge, at-nen wene erep nggarosolar-e: “Kit perak nde Mbal Pem Nagawan-nen tenagaidnak wi kura wene iri kenaru momtak we wok ondoso mende wok kindij-et nde, ir-e wok indigit lag-o.

¹²Nde, at tena worasu nap iri-ge, erep na min-et tena wolmakluk, nambena wok tuwama-ge, ar-e terak mena kwarat lombok tena wolma-o. Alat nde, at marig-et nak tena worasu nap iri-ge at eram mariget tena woraidnak na mengga wanuwa-o.

¹³It iri-ge kagolar-et nde, kagit lak nggal yogolat, kologolar-et nde, kuligit lak nggal yogolat, yebet kagit lak nggal yogolat yili iri bem-nen an-e nden karuk wene bem nak yak ondoso-o.

¹⁴Iri bem-e, Yesaya-nen: ‘Iri nggal ma-o’ luk urul pid wene iri-ge it enpem ndak yusu-o. Nde, iri-ge: ‘Kir-e kologolat woragub-et nde, yebet kagup pug-o. Kir-e kagolat woragub-et nde, kagit lak yugub-o.

¹⁵It ap elem yu-ge inndi-ge ebebeyal wat yogolat, it eneyanggo lak lembeng yogolat, iri enlengen muruk tak pili-o. Iri yili iri-ge, it enlengen-nen kul naru, it eneyanggo-nen kulul naru, it inndi-nen yenggerak puruk, kondok yogola, an-nen ki rak unpuwa naru iri yili-o.’

¹⁶Alat nde, kir-e kenlengen kali bem na, keneyanggo-nen kulili bem na, kir-e kenalen kali-o.

¹⁷An-nen yak kendeyeg-o: Mbal Pem Nagawan ene lomboksa yugwi nap kwarat min lud tak nak kwarugwi nap kwarat min-e kit-nen kali mende iri na kudtag-e inndingen kwarat yiga-t nde, kagit lak yiga-o. Nde, kit-nen kulili wene iri na kulurag-e inndingen kwarat yiga-t nde, kuligit lak yiga-o.”

¹⁸“Iri ala-ge, nden karuk wene uwi pil kaso nap-nen uwi pil kaidnak wene ebe na yak kondosola, kwara koler-o.

¹⁹Ap misig-e Mbal Pem nagawan-nen tenagaidnak wi wene iri kulidnag-et nde, indi-nen yebet kasu buk ala-ge, Sere na lobok luk, at arem pil kaidnak uwi iri na mengga waruk mburusu iri-ge uwi tulabiyem mbidnak iri nggal-nen yusu-o.

²⁰Nde, kerep pem nggweyak mariget nak me mbidnak uwi iri nggal ap-nen aid wene na kulurug-e, ereya na-net enalen min-et wanili-o.

²¹Alat nde, ap iri na enarem-e emengen kundigit lak me, we mariget nak op woragwi-o. Nde, aid wene iri na bem ala angin pangin mende enpem mbosolat lel mberel onpogola-ge, ereya na-net wene keya bugwi-o.

²²Nde, linggat ndumu mbidnak uwi iri nggal ab-e aid wene kulurug-et nde, unmud nggweyak ma mende bem pogolat, uwang nak nggok tak pili iri-nen-e wene iri na perena lak tak posola, engen-e pili bug-o.

²³Nde, nggweyak konak pem mbidnak uwi iri nggal-e ap-nen aid wene kuluruk, inndi-nen yebet karuk, engen pogolar-e, ereb-e seratus nggal pogolat, ereb-e enam pulu nggal pogolat, ereb-e tiga pulu nggal pogolat yili-o” luk yij-o.

²⁴Yesus-nen nden karuk wene misik it yak ondosolar-e: “Mbal Pem Nagawan-nen tenagaidnak wi iri-ge ap mbi-nen konak uwi at eyapmu pil kagaid iri nggal-nen yusu-o.

²⁵Alat nde, kubu nggwe ap pidsa nene yogola-ge, ap iri imin sirid nap misik lobok yosolar-e, mbato enggenggerak ereba na kuri uwi pil karuk, mbirij-o.

²⁶Nde, mbato iri na yup tup mbutluk, nggeret ebe yosola ereya na-nen-e kuri na-ge nam agaij-o.

²⁷Alama-ge, yabu winde iri na ndegel ubugwi nap na at eram lobok yogolat-nen yak togolar-e: ‘Nap wa-e. Kar-e mbato uwi nak pil kaigen-et nde, kuri iri-ge nggesa-nen yak yij-o?’ luk yiga-o.

²⁸Yogolikma-ge, at-nen wene erep nggarosolar-e ‘Lag-o. An nimin sirid nap misik-nen yu kwarij-o’ luk yij-o. Yosoloma-ge, at ndegel ubugwi nap-nen at kin wok pogolar-e: ‘Kuri iri konak pil mbururag-e op, lak?’ luk yiga-o.

²⁹Alat nde, at-nen yosolar-e: ‘Lag-o. Kir-e kuri kunukmu-ge, mbato min konok ma naru, kuri iri kunurak pug-o.

³⁰Are, lambuksa mborosolat worasoma, engen mbarurak tarem wok yosola-ge, an-nen engen mbarugwi nap yak ondosolar-e: “Nandug-e kuri iri na kona ut nggetla mbo kan purak pem per-o. Iri luk, mbato iri na ndok wosa an poso sa ondoro iri me per-o” luk yak indimin-o’ yij-o.”

³¹Yesus-nen nden karuk wene misik yak ondosolar-e: “Mbal Pem Nagawan-nen tenagaidnak wi iri-ge sawi uwi nggal-nen yusu-o. Nde ap misik-nen sawi uwi iri-ge at eyapmu yagaidj-o.

³²Sawi uwi-ge e kujo uwi nggal mondok marik komosa-t nde, iri na tup yosolar-e, erep ereba na ari-ge nggulog-et nde, sawi na ari-ge terak mena mondok nggulok laso-o. Lasoma-ge, ari mot me, towe lobok yosolar-e, inggi bem uwi woroso-o” luk yij-o.

³³Yesus-nen nden karuk wene misik yak ondosolar-e: “Mbal Pem Nagawan-nen tenagaidnak wi iri-ge oroti lomboroso mende nggal-nen yusu-o. Kwe misik-nen oroti lomboroso mende waga mbato togolwak kenan kobong tag-et nde, imin puruk, omok worosola-ge, pidsa lomboroso-o” luk yij-o.

³⁴Yesus-nen ap kwarat iri na mul ondosolar-e, oboksa nden karuk wene bem nak mul ondosolat woragaij-o. Nde, mariget ter-o luk we wene bem mbi yak indigit lag-o.

³⁵Iri kwarid iri-ge, Mbal Pem Nagawan ene lomboksa yoso nap-nen yosolar-e: “Nde, an-nen it yak ondosolar-e, nden karuk wene bem nak yak indimin-o. Nggweyak ndak wirid kuri-net enaru buk woragwi wene na yak indi-min-o” luk yid iri na ndak ndak tak posolat-nen kwarij-o.

³⁶Iri luk, Yesus na-ge ap kwarat iri na keya unpuruk, o ma iri me nggwarik worasoma-ge, at owosirak na at eram lobok yigarik at yak togolar-e: “Nden karuk yidnak wene mbato in kuri yapmu yak yid na ebe-ge ngge yosolat-nen yigen-o? Kwara mirik ninpi-o” luk yak tiga-o.

³⁷Yak togolikma-ge, Yesus-nen wene erep nggarosolar-e: “Ndemeret mbato uwi yagaid nap iri-ge Ap Ambara-net yusu-o.

³⁸Nde, yabu iri-ge nggweyak ma yu-net yusu-o. Nde, uwi konak ereba-ge Mbal Pem Nagawan-nen tenagaidnak wi winde yili nab-er-o. Nde, kuri ereba-ge Sere ilirak-nen yili-o.

³⁹Nde, sirid nap kuri uwi pil kagaid iri na-ge Sere-net yusu-o. Nde, engen mbarurak tarem iri-ge i worok yuwa tarem-er-o. Nde, engen mbarugwi nap na-ge aid nab-er-o.

⁴⁰Iri ala-ge kuri na-ge ndok wosa kan pugwi nggal, i worok yuwa tarem-e iri nggal-et kwaruwa-o.

⁴¹Nde, Ap Ambara-ge at-nen idnak aid nap ereya na wirik unpuwama-ge, it-nen-e at-nen tenagaidnak wi iri me-nen-e ap inndi kabak tak pugwi nap min meya nak kwarugwi nap oboksa min ndok worak unpuruk,

⁴²kan mabidnak yong tak arem inpil ngguwama-ge, iri me-ge sa nggwa nak mbogolat, eneyak nggirit nak marogolat wolma-o.

⁴³Iri na tarem-e it lud tak nak kwarugwi nab-e it Ineid-nen tenagaidnak wi iri me woragolar-e, molengen nggal enabinal worak wolma-o. Iri bem-e, ta-nen nde eyanggo worak ala-ge, wene yu kwara kuluwag-o.”

⁴⁴“Mbal Pem Nagawan-nen tenagaidnak wi iri-ge yapmu nggweyak arem kura worasoma onggo nggulok pugwi silobulo mbi ap misik-nen silobulo iri kwat kasoluk, tuguruk ondolma purug-e, alin alen karuk mborosolar-e, at arengge oboksa wene wosa onggo wanuruk, uwang iri na bem yabu iri na onggo pid iri nggal-nen yusu-o.”

⁴⁵“Iri nggal-et Mbal Pem Nagawan-nen tenagaidnak wi iri-ge onggo waga paga kwaroso nap iri-nen onggo nggulok pugwi mutiara kerep kore yoso nggal-nen yusu-o.

⁴⁶Kore yosoma, kerep misik mondok konak lombok iri kwat kasoluk, at arengge oboksa onggo wanuruk, kerep misiget iri na onggo poso-o.”

⁴⁷“Iri nggal-et Mbal Pem Nagawan-nen tenagaidnak wi iri-ge keyane wanugwi sum misik yi koma arem mberak pogola, keyane nin tak nan tak yat yoso sum iri nggal-nen yusu-o.

⁴⁸Nde, sum iri na kobong yosola-ge, keyane wanugwi nap ereya-nen sum iri na-ge yi koma eyak pem lit yaga pil warug-e, korelug-e, keyane ereba na lonogolar-e, keyane konak ala-ge, it sum arem yarogolat, nde, keyane meya ala-ge, mbo bogolat yugwi-o.

⁴⁹Nde, i worok yuwa tarem-e iri nggal aid nap lobok yogolar-e, lud tak nak kwarugwi nap ennggenggerak-nen meya kwarugwi nap na lenak unpuruk,

⁵⁰kan mabidnak yong tak arem mbo inpil nggogola-ge, sa nggwa mbogolat, eneyak nggirit marogolat wolma-o” luk yij-o.

⁵¹Yuruk, Yesus-nen it kin wok onposolar-e: “Wene yu oboksa-ge kir-e yenggerak pili, lak?” luk kin wok onposoloma-ge, it-nen-e: “Ye, yenggerak pili-o” luk yiga-o.

⁵²Yogolikma-ge, at-nen it yak ondosolar-e: “Iri ala-ge, engga aru nab-et nde, Mbal Pem Nagawan-nen tenagaidnak wi wene wanoso nap kwat yosolar-e, o winde-nen at-nen ndok worak poso sa iri arem-nen at arengge ngget mende nde obi mende nde wirik poso iri nggal-nen yusu-o” luk yij-o.

⁵³Iri luk, Yesus-nen nden karuk wene yu na woroksa yak ondosoluk yarik, o iri me keya buruk,

⁵⁴at ambik ama elem ma iri me mbirij-o. Mberarik, it-nen tepan yugwi ma iri me yak ondolat worasola-ge, at-nen yak indidnak wene iri kuliga nab-e wi langgu mbarogolat-nen yogolar-e: “At yu-ge indi nggat nggat elem min kwiye worak mende kwarurak amawi min-e ngge me-nen wanij-o?

⁵⁵At yu-ge o woroso nap ambara-t nde, at ija unu-ge Maria-t nde, at owottag-e Yakobus min Yusup min Simon min Yuras min yu-t nde,

⁵⁶at iridtak li kwami na pidsa nit ninmin yu me worali yu-t nde, yu mende yu oboksa-ge ngge me-nen aru yid kali?” luk yiga-o.

⁵⁷Iri yogolar-e, it-nen at insili rak piga-o. Alat nde, Yesus-nen it yak ondosolar-e: “Mbal Pem Nagawan ene lomboksa yoso nab-e yi wi ndi wi-nen kek tak pugwi-t nde, at ambik ama-nen na, at ambik ama woragwi nap-nen na, at kek tak ubugwi bug-o” luk yij-o.

⁵⁸Iri ala-ge, it iri na inndi angin tubu yugwi buk ala karuk, iri me-ge at-nen kwiye worak mende kwarat kwarigit lak yij-o.