Read Nduga MATIUS 14 Bible Online

MATIUS 14 - Nduga bible

MATIUS 14

¹Ereya tarem-e o Nggalilea tena woraso nagawan Erores-nen-e Yesus obok kulij-o.

²Kuluruk yarik, at-nen at eyabu wanugwi nap na yak ondosolar-e: “At yu-ge ap yi maroso nap Yoanes na-ge wat yidnak nap ennggendumu-nen uruk yidnak-nen yusu-o. Uruk yidnak me, at arem-e kwiye worak mende kwarurak amawi worasu-o” luk yij-o.

³Nde, Erores na-nen-e Yoanes na tenaguruk, kere kamasa o kubu me pil nggwij-o. Iri kwarid iri-ge at owot Pilipus na ogwe Erorias na wene lit lit-nen iri kwat ibij-o.

⁴Nde, Yoanes-nen at yak tosolar-e: “Kwe Erorias wanigen yu-ge meya-t kwarigen-o” luk yak tij-o.

⁵Erores na-nen-e Yoanes na wururak peragaij-et nde, ap kwarat ereba-nen-e Yoanes na-ge Mbal Pem Nagawan ene lomboksa yoso nap-nen yusu-o yugwi alama, it inndi aye-nen larok yij-o.

⁶Alat nde, at Erores na ndesa mbidnak tarem inik inik, yogolar-e, ap kwarat iri na inmbriri bem Erorias ara na-ge ndawi ndorosolat kot kasolar-e, la kwe na-nen Erores na alen tak posoloma-ge,

⁷at-nen la kwe na yak tosolar-e: “Kat kindi-n peragun mende iri-ge mondok wok kirimin-o” luk owak mbarij-o.

⁸Iri yak tosoloma-ge, la kwe na ija-nen wene yu emndam tak posoloma-ge, la kwe iri-nen yosolar-e: “Ap yi maroso nap Yoanes na anggul mbara piring pem puruk yanem-et wok niril lobok yi-o” luk yij-o.

⁹Iri yosoloma-ge, nagawan-nen-e umud kwarat kagaij-et nde, at-nen yonggo inpid nap kwarat ereba na inmbiri bem wog-et kirimin-o luk owak mbaridnak me, at-nen-e: “La kwe yu-nen nggi yid irit kwasa wok til lobok yer-o” luk wene yak indij-o.

¹⁰Iri ala-ge, ap ndimirik enpamu, o kubu me iri me-nen Yoanes na urusu mbariga-o.

¹¹Mbarigarik, anggulwak na-ge piring pem puruk, la kwe iri na wok tikma-ge, at-nen-e ija eram waruk mbirij-o.

¹²Nde, Yoanes imin nugwi nap na lobok yigarig-e, at orogwak waga yapma puruk, iri wene-ge Yesus yak til mbiriga-o.

¹³Yesus na wene iri kuluruk yarik, e koma arem ngguruk, arig-et nak ap lak ma ereba mbirij-o. Mberamu-ge, ap kwarat-nen iri wene kuluruk, unuwi lombok-nen nggweyak tu at imbirik mbiriga-o.

¹⁴Yesus na e koma arem-nen kenangga mbidnggal-e, ap kwarat eneyaruk, at-nen it enabuwa yuruk, indi andi luk, kugi worak nap ereba na-ge ki rak inpij-o.

¹⁵Iri rak unpuruk, keyama nggwe-ge at owosirag-e at eram wok luk-nen at yak togolar-e: “O yu me-ge ap lak ma me, o na komo ki yamu me, ap yeba-ge nunggwi mende onggo paga nujwak-nen o siri lombok wirik inpi-o” luk yiga-o.

¹⁶Yogolikma-ge, Yesus-nen wene erep nggarosolar-e: “It mbururag-e lag-o. Kit-net nunggwi mende mak ender-o” luk yij-o.

¹⁷Yosoloma-ge, it-nen yogolar-e: “Nit nendam-e mburu-ge lima, keyane-ge mberen nak worasu-o” luk yiga-o.

¹⁸Yogolikma-ge, Yesus-nen yosolar-e: “An neram yu me waruk lobok yer-o” luk yij-o.

¹⁹Yurug-e, ap ereba na yak ondosolar-e: “Tusuwangge bem kore yer-o” luk yak unduruk-nen mburu lima ereya na min keyane mberen ereya min wanuruk yarik, erengen aid arem nggwe lik karok woralat-nen-e Mbal Pem Nagawan wa yak tij-o. Iri luk, mburu ereya na ndek pendeksa at owosirak ininggem pamu-ge, it-nen-e ap ereba na tembesa mak indiga-o.

²⁰Mak ondogolikma-ge, it pidsa inmbitsa nonggola karuk, erep minggirik ereba na-ge ndok wiriganggal-e, mul sum duabelas irit kobong yij-o.

²¹Nde, mburu iri ningga nab-e ap nag-e limaribu-o. Nde, mburu ningga kwami min li marik min-e wonarigit lag-o.

²²Iri rak purug-e, Yesus-nen ap kwarat iri na “Kenma mberer-o” luk yak ondosolat-net at abuwok nanduk eyak ele bem ndil lujwakluk, Yesus-e at owosirak na-ge e koma arem inpil nggwij-o.

²³It iri na wirik onposoluk, at ariget nak tepan yekluk ndobo misik pem lagaij-o. Lagarik, at ariget nak iri me worala, o ndamuk yamu,

²⁴at owosirak nggwiga e koma na-ge yi koma enggendumu nggal wok yukmu-ge, obube kwarat puk kil lobok yosolar-e, e koma na-ge yi-nen logus perel tak pij-o.

²⁵Nde, kubu o nda nda jam tiga nggal, Yesus na-ge yi ombolwak pem it iri na endam lobok yij-o.

²⁶Lobok yosola-ge, at owosirak-nen yik kaiga nggal, ar-e yi ombolwak pem lobok yosola-ge, “Iri-ge ngena-o!” luk, kwiye kwarat luk, ene ya nga mbiga-o.

²⁷Mbogolikma-ge, ereya na-net Yesus-nen it yak ondosolar-e: “Kinndi tugup lak wolmer-o! An-net yusu-o. Kwiye kali-ge meyog-o” luk yak indij-o.

²⁸Yak ondosoloma-ge, at Peterus-nen wene erep nggarosolar-e: “Nagawan Indo wa-e. Ndemeret kar-et nde ala-ge, ‘Yi ombolwak pem an neram lobok yi-o’ luk yak niri-o” luk yij-o.

²⁹Yosoloma-ge, Yesus-nen yosolar-e: “Lobok yi-o” luk yij-o. Yosoloma-ge, Peterus na-ge e koma arem-nen kenangga mburuk yarik, yi ombolwak pem Yesus eram mbirij-o.

³⁰Alat nde, at-nen obube amawi kwarat iri kasolar-e, kwiye karuk, yi arem yubuk yosolat-nen: “Nagawan Indo wa-e. Nimiri yi-o!” luk ene ngguloksa yij-o.

³¹Yosoloma-ge, Yesus na ereya na-net at inggi pil mbarik, at tenaguruk-nen yosolar-e: “Kwara kindi angin tubu yoso buk nap wa-e. Kar-e noluk-nen kindi angin tubu yigit lak yigen-o?” luk yij-o.

³²Iri luk, it enmberek na e koma arem nggogola-ge, obube na kondok yij-o.

³³Kondok yosoloma-ge, it e koma arem woraiga nap-nen Yesus erembel wanogolar-e: “Kar-e ndemeret Mbal Pem Nagawan Ambara-nen yusu-o” luk yiga-o.

³⁴It iri na-ge yi koma bem eyak ele bem ndil laigarig-e, o Nggenesaret wok yogola-ge,

³⁵o iri me woragwi nap-nen Yesus lobok yidnak karug-e, at lobok yidnak wene-ge o iri me wigaril mborogola-ge, kugi indidnak nap oboksa-ge at eram inpil lobok yiga-o.

³⁶Iri luk, it-nen-e: “Kusum unggut marig-et tenabuwog-o” luk at emengen mbarogolat woraiga-o. Nde, at usum erep ininggi pidnak nap oboksa-ge ki yiga-o.