Read Nduga MATIUS 15 Bible Online

MATIUS 15 - Nduga bible

MATIUS 15

¹Iri luk, Parisi nap erep min imiri mbarak pidnak wene enaru nap erep na min Yerusalem-nen Yesus eram lobok yigarik, at kin wok pogolar-e:

²“Kat kowosirak ereba-ge noluk-nen nit nenlawingga-nen kwarugwi na kuruk togolar-e, ininggi marigit lak-nen mburu nili-o” luk yiga-o.

³Yogolikma-ge, at-nen wene erep nggarosolar-e: “Nde, kir-e noluk-nen kit kenlawingga-nen kwarugwi iri na nak kwarogolar-e, Mbal Pem Nagawan-nen ‘Iri nggal kwaru-o’ yidnak wene na kuruk tili-o?

⁴Mbal Pem Nagawan-nen yosolar-e: ‘Kineid kiniya enne kulurag-o’, nde, ‘ta-nen nde eid iya onpok puwa nab-e mondok wururag-o’ luk yij-et nde,

⁵kit-nen-e yu nggal yak indili-o: ‘Ap-nen at eid ija yak ondogolar-e: “An narengge iri-ge kit yongga kundurag-et nde, iri-ge Mbal Pem Nagawan amanggim pukmu-o” luk

⁶yoso nap iri-ge at eid ija enne kulusu buk iri-ge ob-o’ luk yili-o. Nde, kit-nen iri nggal yogolar-e, kit kenlawingga-nen kwarugwi nak kwarogolar-e, Mbal Pem Nagawan-nen yidnak wene na lak tak pili-o.

⁷Kenesiget siget kwarugwi nap wa-e! Yesaya-nen kit-nen kwarurak urul pid na-ge ndemeret yij-o. At-nen yosolar-e:

⁸‘It ap elem yu-ge enmende nak-nen an nggok tak nibili-t nde, it inndi-ge erepma worasu-o.

⁹It-nen mirik unpugwi wene owak iri-ge ki nap-nen yidnak wene nak mirik inpili me, it-nen an nerembel wanili-t nde, ebe lak mende-nen yusu-o’ ” luk yij-o.

¹⁰Iri luk, Yesus-nen ap kwarat iri-ge at eram lobok yuwakluk wene mbo unpuruk, lobok yikma, it yak ondosolar-e: “Wene yu kuluruk, kwara kinndi yebet ker-o.

¹¹Ap enemnde nggwe nggoso mende iri-nen ap kopkap tobok lak onposo bug-o. Are, ap enemnde nggwe-nen wirik pugwi wene iri-net ap kopkap tobok tak onposo-o” luk yak indij-o.

¹²Yak ondosoloma-ge, at owosiraag-e at eram lobok luk at yak togolar-e: “Kat-nen yigen wene iri na kulurug-e, it Parisi nap-nen insili rak kibiga iri-ge eneyaigen, lak, ngge-o?” luk yiga-o.

¹³Yogolikma, Yesus-nen wene erep nggarosolar-e: “An Neid aid arem woraso-nen uwi yakit lak mende iri-ge emengen min-et kunuwa-o.

¹⁴It Parisi enlengen ngguru-nen ap lit eneyaruk mbitli iri-ge keyap tak enper-o. Nde, enlengen ngguru-nen enlengen ngguru ininggi waruk mburukmu-ge, it enmbereg-et mbunmu yoboksa mbuwa-o” luk yij-o.

¹⁵Yosoloma-ge, Peterus-nen yosolar-e: “Nden karuk wene iri-ge nam-et mirik ninpi-o” luk yij-o.

¹⁶Yosoloma, Yesus-nen wene erep nggarosolar-e: “Kit tet awo kinndi yebet kagit lak yili-a?

¹⁷Kenmende nggwe-nen ninggidnak mende-ge unlum arem ngguruk, enal wangge ma-nen wirik pugwi na-ge kir-e yebet kali bug-a?

¹⁸Alat nde, ap inndi arem woraso wene ap enemnde nggwe-nen mburusu wene iri-nen ap kopkap tobok tak onposo-o.

¹⁹Nde, meya yebet kagwi elem ap enarem-nen mborosolar-e, ap wurugwi min ap onkwe yebugwi min kwami terak yenpugwi min yariya wanugwi min enesiget wene ap enpem pugwi min ap onpok pugwi min mburusu-o.

²⁰Nde, iri mende kwarugwi iri-net ap kopkap tobok tak onposo-o. Alat nde, ininggi marigit lak-nen nunggwi mende nili iri-nen ap kopkap tobok tak onposo bug-o” luk yij-o.

²¹Iri luk, Yesus na-ge o iri me-nen o Tirus min Siron min nggwe mbirij-o.

²²Nde, o iri me woraso Kanan kwe misik na lobok luk, ene nggoksa yosolar-e: “Nab-o. Ndaud Ambara wa-e. ‘An nabuwa ki-o’ An nara-ge kugi meya misik at arem worasolat kwarat andi bandi rak ubusu-o” luk yak tij-et nde,

²³Yesus-nen-e kwe na ene erep nggarigit lak, larok nak yosoloma-ge, at owosirak na-ge at eram lobok luk, at emengen mbarosolar-e: “Ene nggwa arem nit ninmbirik nusu me, kwe iri-ge langgara wirik pi-o!” luk emengen mbarogolikma-ge,

²⁴Yesus-nen wene erep nggarosolar-e: “Enlem Isarael nap lomba wam nggal kabak yidnak it enarig-et nak enmanggim wirik nibil lobok yamu-o” luk yij-et nde,

²⁵kwe iri na at eram lobok yarik, at ijok eralu owak yunggusa kore yosolat-nen yosolar-e: “Nagawan Indo wa-e. Yongga niri-o” luk yij-o.

²⁶Yosoloma-ge, Yesus-nen wene erep nggarosolar-e: “Li marik marik enmanggim pidnak mburu-ge waga yengge eram mbo wok tugwi bug-o” luk yij-o.

²⁷Yosoloma-ge, kwe iri-nen yosolar-e: “Ndemeret nde, nab-o. Alat nde, ombo naso sa-nen mberak pidnak mburu abapno iri-ge yengge-nen-e naso nar-o” luk yij-o.

²⁸Iri yosoloma-ge, Yesus-nen kwe iri na yak tosolar-e: “Kwe yu-ge wa-e. Kat kindi angin tubu yigen-e ijar-o! Kat kindi-n pigen irit kwat mag-o” luk yak tosoloma, ereya na-net at ara na-ge ki agaij-o.

²⁹Nde, Yesus na-ge o iri me keya buruk, Nggalilea Koma eyak pem wok luk, ndobo bem lagarik, iri me koreyak worasoma-ge,

³⁰ap kwarat at eram ndok worogolar-e, unuwok ya landok nugwi nap min unuwok kambung puk tak woragwi nap min enlengen ngguru min enne lak woragwi min kugi worak nap erep na kwarat wok unpuruk lobok yigarik, at eram onpogola-ge, at-nen ki rak inpij-o.

³¹Iri ala-ge, ap kwarat iri-nen yik eneyaiga nggal, enne lak yidnak nap na enne yogolat, unuwok kambung puk tak woragwi na ki yogolat, ya landok nugwi na motsa mborogolat, enlengen ngguru na enlengen-nen kagwi jogolat eneyaruk, it-nen-e Isarael nap Enmbal Pem Nagawan erembel waniga-o.

³²Iri rak puruk, Yesus-e at owosirak iri na wene mbo unpuruk-nen yak ondosolar-e: “Ap kwarat yu-ge an-e enabuwa kwarat kasu-o. Ir-e an nimin-e kenan tarem woraidnak me, yawo-ge it-nen norak mende-ge mondok lak yamu me, an-e nunggwi mende mak indigit lak-nen wirik unpurak iri-ge meya-t kasu-o. Mborogolar-e, tulabiyem nere-nen mbud ma-o” luk yak indij-o.

³³Yak ondosoloma-ge, at owosirak-nen at yak togolar-e: “Nde, ap lak ma yu me-nen-e ap kwarat yu ndak mak undurak mburu-ge ngge menen wanul-o?” luk yiga-o.

³⁴Yogolikma-ge, Yesus-nen it kin wok onposolar-e: “Kit kendam-e mburu-ge nunggwirik worasu-o?” luk kin wok onposoma-ge, it-nen yogolar-e: “Mburu-ge tuju min keyane marik siyak min worasu-o” luk yiga-o.

³⁵Yogolikma-ge, Yesus-nen ap kwarat iri na ene amawi min-et yak ondosolar-e: “Nggweyak pem kore yil mberer-o” yuruk,

³⁶mburu tuju ereya na min keyane min wanosoluk, Mbal Pem Nagawan wa yak turuk, mbara ligik purug-e, at owosirak iri na wok ondosola, it-nen-e ap kwarat iri na tembesa mak indiga-o.

³⁷Mak ondogolikma-ge, it oboksa-nen inmbitsa nonggola karuk, erep minggirik iri na ndok wosa mul sum arem yarak piganggal-e, mul sum tuju irit kobong yij-o.

³⁸Nde, mburu iri ningga nab-e ap nag-e empat ribu-o. Nde, kwami min li marik min-e wonarigir-e lag-o.

³⁹Iri luk, Yesus-nen ap kwarat iri na “Kenma mberer-o” yak undurug-e, e koma arem ngguruk, o Magaran nggwe mbirij-o.