Read Nduga MATIUS 16 Bible Online

MATIUS 16 - Nduga bible

MATIUS 16

¹Parisi nap min Saruki nap min lobok yigarik, Yesus abut mbaru-wokluk-nen at emengen mbarogolar-e: “Aid arem-nen kwarugwi kagwi buk mende misik mirik ninpi-o” luk emengen mbariga-o.

²Alat nde, Yesus-nen wene erep nggarosolar-e: “Mo yobok yil mbosola, kit-nen yogolar-e: ‘O-ge siga mbiga pusu me, o kibi irit ma-o’ luk yugwi-o.

³Nde, o kuplila ala: ‘O-ge angin mbud tak me, yawo-ge sumbat ma-o’ luk yugwi-o. Kit-nen-e o erare iri nggal-e yenggerak pili-t nde, yawo tarem-nen kwarurak mende iri perak nde, kir-e yenggerak pili bug-o.

⁴‘Kagwi buk mende mirik ninpi-o’ luk yugwi nab-e meya kwarugwi nap min mot mot kwarugwi buk nap min iri-net yili-o. Nde, kagwi buk mende nin mbi yak kunduwa bug-o. Are, Yunus-nen idnak kwiye worak mende iri nak mirik kunpu-wa-o” luk yak ondosoluk, it iri me woragola, at na keya unpuruk mbirij-o.

⁵Yesus owosirak ereba na-ge eyak ele bem ndil lagolar-e, oroti meme rak puruk ndil laiga-o.

⁶Alama-ge, Yesus-nen it yak ondosolar-e: “Kinndi kwara yebet kagolat wolmer-o. Parisi nap min Saruki nap min-nen idnak oroti lomboroso mende iri abiyem-o luk kwil kwalsa wolmer-o” luk yak indij-o.

⁷Yak ondosoloma-ge, it-nen wene yak kerak mbogolar-e: “Wene iri yid iri-ge nir-e oroti waruk lobok yigit lak ala-nen iri yij-o” luk yiga-o.

⁸Yogolikma-ge, Yesus na it-nen yidnak wene na aru me, it yak ondosolar-e: “Kit kinndi-ge kwara angin tubu yugwi buk nap wa-e. Kir-e noluk-nen oroti lag-o luk wene yak kerak mbili-o?

⁹Kir-e awo kinndi yebet kagit lag-et worali, lak? Nde, an-nen oroti lima ereya na ndeksa luk, ap lima ribu mak ondosola, erep minggirig-e mul sum nunggwirik arem kobongsa yarigeb-o?

¹⁰Nde, oroti tuju ereya na ap empat ribu mak ondosola, erep minggirig-e mul sum nunggwirik arem kobongsa yarigeb-o?

¹¹Ar-e ndemeret oroti min yusu-ge lag-o luk, kinndi yebet kagit lak yili-a? Are, Parisi nap min Saruki nap min-nen idnak oroti lomboroso mende iri abiyem-o luk kwil kwalsa wolmer-o” luk yak indij-o.

¹²Iri yak ondosola-ge, at owosirak-nen yebet kagolar-e, ndemeret oroti konugwi lomboroso mende iri na abiyem-o luk kwil kwalsa wolmomtak wene yij-e lag-o. Are, Parisi nap min Saruki nap min-nen mul undugwi wene iri na min yij-o luk yebet kaiga-o.

¹³Yesus na-ge o Kaisarea Pilipi nggwe wok yarik, iri me woralar-e, at-nen at owosirak ereba na kin wok onposolar-e: “Ap-nen-e Ap Ambara an-e ta-o luk neberali-o?” luk kin wok inpij-o.

¹⁴Yosoloma-ge, it-nen wene erep nggarogolar-e: “Ap erep-nen yogolar-e: Kar-e ap yi mat onposo nap Yoanes-o luk yogolat, it erep-nen-e Elia-o yogolat, erep-nen-e Yeremia-o luk yogolat, erep-nen-e Mbal Pem Nagawan ene lomboksa yosonap misig-o luk yogolat yili-o” luk yiga-o.

¹⁵Yogolikma-ge, at-nen yosolar-e: “Nde, kit-nen-e an-e ta nde neberali-o?” luk yij-o.

¹⁶Yosoloma-ge, at Simon Peterus-nen wene erep nggarosolar-e: “kar-e Kerisut, uruk nak woraso Mbal Pem Nagawan Ambara-nen yusu-o” luk yij-o.

¹⁷Yosoloma-ge, Yesus-nen wene erep nggarosolar-e: “Yunus ambara Simon wa-e Wene iri-ge nggweyak ma nap-nen yak kiriga-ge lag-o. An Neid aid arem woraso-nen yak kiridnak me, kar-e kalen kasu-o.

¹⁸Iri bem, an-nen yak kereyeg-o: Kar-e Peterus-nen yusu-o. Nde, kerep yu bem-nen an-nen idnak lambuk tak inpidnak nap iri-ge o wurugwi nggal wirimin-o. Nde, wat momtak elem amawi-nen an lambuk tak inpidnak nap iri na mondok urugwe nggwe rak unpuwa bug-o.

¹⁹Mbal Pem Nagawan-nen tenagaidnak wi tu imig worak pugwi (kunci) wok kirimin-o: Nggweyak ma yu me-nen kat-nen kamarak pugun mende iri-ge aid arem-nen na kamarag-et wolma-o. Nde, nggweyak ma yu me-nen kat-nen wisirik pugun mende iri-ge aid arem-nen na wisirig-et wolma-o” luk yak tij-o.

²⁰Yak tosolug-e, “At yu-ge Kerisut-nen yusu-o” luk ap misiger-o luk tet yak unduwa naru, Yesus-nen ene amawi min watsa at owosirak yak indij-o.

²¹Iri tarem-nen Yesus na tel korosolat, at owosirak yak ondosolar-e: “An-e mondok Yerusalem mbirimin-o. Mburumu-ge, ogore yidnak nap nde tepan omborak nagawan nde imiri mbarak pidnak wene enaru nap nde it-nen mondok lel mberel nubuwa-o. Iri luk, nuruwa-t nde, mberen nene luk, kenan tak purak pem-e nuruk tak puwa-o” luk nam-et yak indij-o.

²²Yak ondosoloma-ge, Peterus at lit karuk lagarik, ponok ereya-nen at met posolar-e: “Nagawan Indo wa-e. Mbal Pem Nagawan-nen wene iri-ge lak yaga keya buwag-o. Wene iri-ge kat kebem mburag-e mondok lik lak sa-o” luk yij-o.

²³Yosoloma-ge, Yesus na nden karuk-nen Peterus na yak tosolar-e: “Sere wa-e. Kar-e an nombol nggwe mbiri-o. Kar-e an nuwok pijaksa mbud tak nuburak kerep nggal-nen yusu-o. Kat-nen perasu mende iri-ge Mbal Pem Nagawan-nen peraso nggal-e lag-o. Nggweyak ma nap-nen peragwi mende nak perasu-o” luk yak tij-o.

²⁴Iri luk, Yesus-nen at owosirak yak ondosolar-e: “Ta-nen nde an nimin nurak indingen ala-ge, at na at ambikpebe abuwa lak tak puruk, at-nen idnak e lang pang tak iri na kud turuk, an nimin nuwag-o.

²⁵Ta-nen nde at uruk wolmomtak iri na indi angin yuwa nab-e abok at uruk wolmomtag-e pul ma-o. Alat nde, ta-nen nde an nebem ala at uruk wolmomtak iri na indi angin lak yuwa nab-e abok urug-et wolma-o.

²⁶Nde, ap mbi-nen-e o nggweyak yu oboksa winde yuwa-t nde, at ondomok indi pul marig-e, no nde lesa wanuwa-o? Mondok lag-o. At uruk wolmomtak iri na-ge yi mende ndi mende min onggo onggo rak purag-e ndag-a?

²⁷Ap Amara na-ge at Eid abinal pem at-nen idnak aid nap inmin lobok yuwarig-e, ap onggo wok ondosolar-e, it-nen kwaridnak ndak ndag-et ondomok tak onggo wok unduwa-o.

²⁸An-e ndemeret yak kendeyeg-o: Yu me worali nap ereb-e Ap Ambara na at-nen tenagaidnak wi imin lobok yosola kagit lak ma-ge wat ma bug-o” luk yij-o.