Read Nduga MATIUS 19 Bible Online

MATIUS 19 - Nduga bible

MATIUS 19

¹Nde, Yesus na-ge wene iri na yaga keya buruk yarik, o Nggalilea-nen yi Yorodan eyak ele bem o Yurea mbirij-o.

²Mborosola-ge, ap mondok kwarat at imbirik nogola-ge, ereba me-n at-nen-e it ki rak onposolat woragaij-o.

³Iri luk, Parisi nap ereb-e at eram lobok yigarik, at abut mbaruwokluk at kin wok obogolar-e: “Ap-nen we elem lak ma-t nde at ogwe keya burak iri-ge op, lak?” luk yiga-o.

⁴Yogolikma-ge, Yesus-nen wene erep nggarosolar-e: “Kit-nen-e Mbal Pem Nagawan engga mbarak pem-nen wene yu wonarugwi bug-a? Wene iri-nen yosolar-e: ‘Tel korosolat-net Ndak wirid Nap-nen-e ap min kwe min ndak wat unpuruk-nen

⁵yosolar-e: “Iri bem-e ap-nen-e eid min ija min keya unpuruk, at ogwe imin lambuk luk, it enmbereg-e mondok enpe misiget mag-o” luk yij-o.’

⁶Iri ala-ge, it iri enpe mberen-e lag-o. Are, misiget nak-net yusu-o. Iri bem-e, Mbal Pem Nagawan-nen misiget tak inpidnak iri-ge ap-nen-e arik tak unpurag-e mondok meya-o” luk yij-o.

⁷Iri yosoloma-ge, it Parisi nap-nen at yak togolar-e: “Irit nde, Musa-nen ene amawi min yosolar-e: ‘Ap-nen-e kat keya kibigi-o luk ogwe na engga mbal turag-o’ yid iri-ge noluk-nen iri yij-o?” luk yak tiga-o.

⁸Yak togolikma-ge, Yesus-nen wene erep nggarosolar-e: “Kit kinndi amawi ala-nen Musa-nen-e: ‘Konkwe keya burag-e ob-er-o’ luk yak kindij-o. Alat nde, nanduk-nen-e ndemerer-e iri nggal kwaruwag-o luk yigit lag-o.

⁹Iri ala-ge, an-nen yak kendeyeg-o: Ogwe na nin nap-nen yebigit lag-et nde, we irit at ogwe nde keya buruk, kwe misik wanuwa nab-e, kwe iri imin mbabi yusu-o” luk yak indij-o.

¹⁰Nde, at owosirak-nen at yak togolar-e: “Ap min kwe min wok kerak mbugwi bem iri nggal ala-ge, we wolmomtak ob-o” luk yiga-o.

¹¹Yogolikma-ge, Yesus-nen wene erep nggarosolar-e: “Wene yu-ge ap pidsa-nen wanurak wene-ge lag-o. Are, Mbal Pem Nagawan-nen wene iri kwaruwakluk we wok ondoso mende wok indidnak nap nak-nen kwarurak wene-nen yusu-o.

¹²Nde, kwe wanigit lak woragwi iri-ge ap ereb-e iniya arem-nen iri kwarag-et ndesa mbidnak me, we woragwi-o. Nde, ap ereb-e ap-nen iniyiri wabidnak me, we woragwi-o. Nde, ap ereb-e Mbal Pem Nagawan-nen tenagaidnak wi bem ala, it inndi-nen we woragwi-o. Iri nggal-et kwareyeg-a yidnak nap-nen wene yu kwarosolar-e ndag-o” luk yij-o.

¹³Nde, Yesus inggi-nen tena unpuruk, tepan unpuwakluk, ap-nen-e li marik marik at eram inpil lobok yogola-ge, at owosirak-nen it met inpiga-o.

¹⁴Alat nde, Yesus-nen yosolar-e: “Mbal Pem Nagawan-nen tenagaidnak wi iri-ge li marik yu nggal woragwi nap-nen winde yili me, li marik marik iri-ge an neram lobok yuwag-o. Langgal eneyali-ge meyog-o” luk yij-o.

¹⁵Iri yuruk, at inggi-nen it tena unpuruk yarik, mbirij-o.

¹⁶Nde, misik tarem ap misig-e Yesus eram lobok luk-nen at kin wok obosolar-e: “Mul Nondoso Nap wa-e. Pem-et nuruk wolmomtak elem winde yekluk, mondok konag-e no mende nde kwarimin-o?” luk kin-wok ibij-o.

¹⁷Yosoloma-ge, Yesus-nen at yak tosolar-e: “Kar-e noluk-nen konak kwarurak wene iri an kin wok nubusu-o? Konag-e misiget nak Mbal Pem Nagawan-et worasu-o. Kar-e kuruk wolmomtak elem iri wanurak kindi perasolar-e, imiri mbarak pidnak wene iri-ge mondok kwarosolat wolmin-o” luk yak tij-o.

¹⁸Yak tosoloma-ge, at-nen kin wok obosolar-e: “Imiri mbarak pidnak wene ngge nde yigen-o?” luk yij-o. Yosoloma-ge, Yesus-nen wene erep nggarosolar-e: “Ap wururak pug-o. Ap onkwe yeburak pug-o. Yariya wanurak pug-o. Kenesiget wene yurak pug-o.

¹⁹Keid kiya-nen yidnak yidnak kwarosolat wuri-o. Kat kambik kabuwa kasu nggal-et kat kimin woragwi nap enabuwa ki-o” luk yij-o.

²⁰Yosoloma-ge, ap sugwe iri-nen wene erep nggarosolar-e: “Wene ereya oboksa-ge an-e kwat tenak woraso-o. Nde, an-nen kwaroso bug-e no mende-o?” luk yij-o.

²¹Yosoloma-ge, Yesus-nen at yak tosolar-e: “Kar-e iminep mbarak wolmomtak kindingen ala-ge, mburugundik, kisilobulo pidsa onggo waga uwang ndok wurugun iri-ge insilobulo lak nap tembesa wok undugunmu-ge, lobok yugundik, an nimin ni-o. Iri yugundik pem-e aid arem-nen karengge mondok kwarat winde yugun-o” luk yak tij-o.

²²Yak tosoloma-ge, ap sugwe iri na-nen wene iri kuluruk yarik, at isilobulo-ge, mondok kwarat me, indi angin-nen indi puru luk mbirij-o.

²³Mborosoloma-ge, Yesus-nen at owosirak yak ondosolar-e: “An yak kendeyeg-o: Insilobulo kwarat winde nab-e Mbal Pem Nagawan-nen tenagaidnak wi nggurag-e angin worak-nen yusu-o.

²⁴Nde, tuguruk yak kendeyeg-o: Sapi wam-nen luruk erel uru nggwe nggurag-e te nggal-nen yusu-o. Nde, insilobulo kwarat winde-nen-e Mbal Pem Nagawan-nen tenagaidnak wi nggurag-e angin worak-nen yusu-o” luk yak indij-o.

²⁵Yak ondosoloma-ge, owosirak-nen wene iri na kulurug-e, mondok inndi yok pok mbogolat-nen at kin wok obogolar-e: “Iri ala-ge tarak nggal-nen nde inmiri yuwa-o?” luk yiga-o.

²⁶Yogolikma-ge, Yesus na it yik eneyasolat-nen yak ondosolar-e: “Ki nap-nen iri kwarurag-e meya-t nde, Mbal Pem Nagawan-nen-e yi mende ndi mende kwarurag-e ndak-net yusu-o” luk yij-o.

²⁷Yosoloma-ge, Peterus-nen yosolar-e: “Nde, nit perak nunggwirig-o? Nir-e yi mende ndi mende oboksa keyap tak puruk, kat kimin nili-o. No mende nde wanul-o?” luk yij-o.

²⁸Yosoloma-ge, Yesus-nen it yak ondosolar-e: “An yak kendeyeg: O ngget ndak worak puwa iri me-nen-e Ap Ambara na-ge at-nen idnak nagawan ebem koreyak woraso sa abinal worak na bem kore yuwarig-e, an nimin nili nap kir-e nagawan-nen kore yugwi ondoro duabelas na ebem kore luk, Isarael nap enlem duabelas iri na enpem wene mbarugub-o.

²⁹Nde, an nebem ala at uwi worak nde owe owot nde iridtak nde eid ija nde ilirak nde eyabu nde keya buruk nuwa nab-e, iri mende ondolmasa seratus pem wanosolat, pem-et uruk wolmomtak elem winde yosolat ma-o.

³⁰Alat nde, ap kwarat-nen yawo yu-nen nanduk yili nab-e abok ma-o. Nde, yawo abok yili nab-e nanduk ma-o” luk yak indij-o.