Read Nduga MATIUS 22 Bible Online

MATIUS 22 - Nduga bible

MATIUS 22

¹Iri luk, Yesus na-ge nden karuk wene bem tuguruk it yak ondosolar-e:

²“Mbal Pem Nagawan-nen tenagaidnak wi-ge yu nggal-nen yusu-o: Nagawan misig-e at ambara na kwe wanosola-ge, nunggwi mende nggulok sagaij-o.

³Saga buruk, at ndegel ubugwi nap wirik enpamu, it yonggo inpidnak nap na wene mbo inpiga-t nde, it-nen nil lobok yurag-e larok yiga-o.

⁴Iri ala-ge, at-nen ndegel ubugwi nap erep wirik onposolat-nen yonggo inpidnak nap na yak unduwakluk, wene yu enpem posolar-e: ‘Nunggwi mende nggulok na saga lid lud tak pigi-o. Sapi wam iye nde sapi wam omok worak nde wosa sabigirik, oboksa lid lud tak pigirik worasu-o. Kwe wanogola sagaidnak nunggwi mende nil lobok yer-o’ luk yak ender-o luk yij-o.

⁵Alat nde, yonggo inpidnak nap ereba-nen-e wene na kuligit lak, eneyak nggal tak pogolar-e, at misik iri-ge eyapmu nggwe mborosolat, at misik iri-ge at-nen kwaroso sa ereba na kwarurak pem mborosolat,

⁶worakmu-ge, it erep-nen-e at ndegel ubugwi nap tena unpuruk, andi bandi rak unpuruk, mondok indiga-o.

⁷Iri kwarogola karuk, nagawan iri na-ge isilepma mondok kwarat luk, at-nen san winde na wirik enpamu mbirigarik, ap indiga nap ereba na mondok lak tak unpuruk, it unuwi siri na kan piga-o.

⁸Iri rak puruk, at-nen at ndegel pugwi nap yak ondosolar-e: ‘Kwe wanogola nunggwi mende nggulok saga lid lud tak worasu-t nde, it yonggo inpidnak nap iri na-nen norak perak meya agaij-o.

⁹Iri bem-e, tu nandogol kandogol ma ereba me mburugupndik, eneyagup nap oboksa-ge kwe wanogola nunggwi mende nggulok yu nil lobok yuwakluk, yak ender-o’ luk yak indij-o.

¹⁰Yak ondosoloma-ge, ndegel pugwi nap ereba na tula waring kagolar-e, it eneyaiga nap oboksa, meya kwarugwi nap min konak nap min ndok worak unpuruk, nunggwi mende nil lobok yogolar-e, norak sa o iri na me ap-nen yebet yij-o.

¹¹Nde, nagawan na-ge yonggo inpidnak nap ereba na eneyekluk nggwidnggal-e, ap misig-e kwe wanogolat-nen yurugwi sum-e yirigit lak karuk,

¹²nagawan-nen ap iri na yak tosolar-e: ‘Nanggam wa-e. Kar-e kwe wanogolat-nen yurugwi sum iri-ge yirigit lag-et nde, nggesa-nen ma yu me ngguwaigen-o?’ luk yak tosoloma, ap iri na ene lak nak yij-o.

¹³Iri ala-ge, nagawan na-nen ndegel ubugwi nap yak ondosolar-e: ‘At yu-ge inggi ijok kere kamarak puruk ndamuk nak woraso sa iri me mbo bil nggwer-o. Iri me-ge yip nggu marogolat, eneyak nggirit marogolat woragwi sa-o’ luk yak indij-o.

¹⁴Iri bem-e, ap kwarat wene mbo inpidnag-et nde, ab-e wonarak nak len unpusu-o” luk yij-o.

¹⁵Iri luk, it Parisi nap na mborogolar-e: “Yesus yu-ge wene kin wanugwi ngge bem-nen are puwog-o?” luk wene mbariga-o.

¹⁶Iri luk, it-nen wirik onpogolar-e, it inmin nugwi nap ereb-e Eroriani nap inmin luk, Yesus eram wok luk, at yak togolar-e: “Nggomo Ondoso Nap wa-e. Kar-e lud tak nak yoso nap-nen yusu-o luk nir-e nenaru-o. Nde, Mbal Pem Nagawan urula mburugwi wene-ge nam-et nak ap mirik onposolat, ap entare mbenaroso buk me, kar-e kwiye lag-et mirik onposo-o.

¹⁷Iri bem-e, wene yu bem kat kindi-n perasu iri yak nindi-o: Nit-nen-e Kaisat amanggim tol purag-e op, lak ngge-o?” luk yiga-o.

¹⁸Yogolikma-ge, Yesus na it inndi-n perali meya iri na aru me, it yak ondosolar-e: “Kenesiget siget kwarugwi nap wa-e. Kir-e noluk-nen an nindi ngatli-o?

¹⁹Iri mende pugwi kerep tol misik an kayek-nen nuk ker-o” luk yosoloma-ge, it-nen-e kerep tol misik wok togola,

²⁰at-nen it yak ondosolar-e: “Tol yu bem-e ta erare ndak worak nde, ta unu mbarak nde worasu-o?” luk yij-o.

²¹Yosoloma-ge, it-nen yogolar-e: “Kaisat-nen idnak-nen yusu-o” luk yiga-o. Yogolikma-ge, Yesus-nen it yak ondosolar-e: “Iri ala-ge, Kaisat arengge iri-ge Kaisar-et wok turag-o. Nde, Mbal Pem Nagawan arengge iri-ge Mbal Pem Nagawan-et wok turag-o” luk yak indij-o.

²²Yak ondosoloma, wene iri kuluruk yigarig-e, wi yuruk at keya buruk mbiriga-o.

²³Iri tarem-e Saruki nap ereb-e Yesus eram lobok yiga-o. (It iri-nen yogolar-e: “Wat yidnak nab-e unluk yugwi bug-o” luk yugwi-o.) It ereba-nen Yesus kin wok obogolar-e:

²⁴“Nggomo Ondoso Nap wa-e. Musa-nen yosolar-e: ‘Ap misik nde ondolma pigit lak wat yosola-ge, owe wat yid na ondolma puwakluk, owot na-nen at owe ogwe togwe iri na mondok wanurag-o’ luk yij-o.

²⁵Nde, nit nennggendumu yu me-ge ap enpe tuju nderak woraiga-o. Woragolar-e, onowe manggu iri na kwe wanij-et nde, la ndakit lak, we wat yosola-ge, ogwe togwe iri-ge owot-nen wanij-o.

²⁶Iri luk, owot na iri nggal-et kwarij-o. Nde, at imbirik mende-nen na iri nggal-et kwaril irit tit enpe tuju na oboksa li ndakit lak irit wat yiga-o

²⁷Iri luk, abok nggwe-ge kwe na wat yij-o.

²⁸Iri bem-e, ap tuju ereya na oboksa-nen kwe iri wanigarik me, ap unluk ma tarem-nen-e ta ogwe nde ma-o?” luk kin wok ibiga-o.

²⁹Yogolikma-ge, Yesus-nen wene erep nggarosolar-e: “Kir-e Mbal Pem Nagawan engga mbarak iri kenaru buk, Mbal Pem Nagawan amawi na kenaru buk yili me, kir-e mondok kabak yili-o.

³⁰Ap unluk ma tarem-nen-e ap min kwami min-e wok kerak mbuwa bug-o. Are, aid arem woragwi aid nap nggal-et wolma-o.

³¹Alat nde, ap wat yidnak unluk momtak wene-ge Mbal Pem Nagawan-nen yak kindidnak wene engga bem mbarak pid na kir-e wonarugwi bug-a? At-nen yosolar-e:

³²‘An-e Abaram min Isak min Yakup min Enmbal Pem Nagawan-nen yusu-o’ luk yij-o. At iri-ge wat yidnak nap Enmbal Pem Nagawan-e lag-o. Are, unluk woragwi nap Enmbal Pem Nagawan-net yusu-o” luk yij-o.

³³Iri yosoloma kuluruk, at-nen mirik inpid iri na bem ap kwarat ereba-nen wi langgu mbariga-o.

³⁴Iri luk, Yesus-nen it Saruki nap ereba na wene onggo yurag-e kabak tak inpidnak wene na kuluruk yigarig-e, it Parisi nap-nen ndok wutluk,

³⁵it ennggendumu-nen imiri mbarak pidnak wene aru nap misik-nen at abut mbareyekluk at kin wok obosolar-e:

³⁶“Mul Ondoso Nap wa-e. Imiri mbarak pidnak wene enggendumu imiri mbarak pidnak wene nggulog-e ngge-o?” luk kin wok ibij-o.

³⁷Yosoloma-ge, Yesus-nen wene erep nggarosolar-e: “ ‘Nagawan Indo kit Kenmbal Pem Nagawan abuwa kagolar-e, kinndi oboksa min kenpe oboksa min kinndi nggat nggat oboksa min-net at abuwa kudtag-o.’

³⁸Imiri mbarak pidnak wene mondok nggulok, nanduk tak pidnak wene-ge irir-o.

³⁹Nde, imiri mbarak pidnak wene iri min ndak ndak wene nggok misig-e: ‘Kat kambik kabuwa kasu nggal, kat kimin woragwi nap na enabuwa ki-o.’

⁴⁰Nde, imiri mbarak pidnak wene erep oboksa ereba na min Mbal Pem Nagawan ene lomboksa yugwi nap-nen yidnak wene oboksa ereba na min-e wene mberen yu bem nak worasu-o” luk yij-o.

⁴¹Nde, Parisi nap na iri me ndok worak worakmu-ge, Yesus-nen it kin wok onposolar-e:

⁴²“Kerisut iri-ge kir-e ngge nde eberali-o? Ar-e ta ambara-nen yusu-o?” luk kin wok onposoma-ge, it-nen at yak togolar-e: “Ar-e Ndaud ambara-nen yusu-o” luk yiga-o.

⁴³Yogolikma-ge, Yesus-nen it yak ondosolar-e: “Iri ala-ge, Konak Indi-nen at yak tosolat-net Ndaud na-nen-e Kerisut imin-e ‘An-nen idnak Nagawan Indo-o’ yid iri-ge noluk-nen iri yij-o? At Ndaud-nen yosolar-e:

⁴⁴‘Nagawan Indo-nen an-nen idnak Nagawan Indo yak tosolar-e: Kat kimin wim nab-e kat kuwok unggutmu teberak inpigit lak ma, kar-e an ninggi kigit nggwe koreyak wolmin-o’ luk yij-o.

⁴⁵Nde, Ndaud-nen at imin-e ‘An-nen idnak Nagawan Indo-o’ luk yidnak nde ala-ge, at Kerisut iri-ge nggesa-nen Ndaud ambara-o yurag-o?” luk yij-o.

⁴⁶Nde, ap misiger-o luk tet at ene onggo yigit lak yiga-o. Nde, iri tarem-nen-e Yesus kin wok uburag-e kwiye yiga-o.