Read Nduga MATIUS 24 Bible Online

MATIUS 24 - Nduga bible

MATIUS 24

¹Yesus na-ge Mbal Pem Nagawan ama-nen mborosola-ge, at owosirak lobok yigarik, Mbal Pem Nagawan uwi wiridnak abage na mirik piga-o.

²Alama-ge, at-nen it yak ondosolar-e: “Ye. Kir-e o yu pidsa kwara ker-o. An-nen yak kendeyeg-o: O yu worogolat kona mendagil laidnak kerep yeba-ge ebem lud lud misiget tet iniksa wolma-ge lag-o. Pidsa mijarak puwa-o” luk yij-o.

³Yesus na-ge Saitun ndobo bem koreyak worasoma-ge, at owosirak ereba na enarikmu-nen wene yuwokluk, at eram lobok luk-nen at kin wok obogolar-e: “Kat yigen iri na-ge mepme tarem-nen kwat ma-o? Nde, no mende karuk-nen kat lobok yurak min i worok yurak tarem min-e panggo yusu-o luk yenggerak pul-o? Yak nindi-o” luk yiga-o.

⁴Iri yogolikma-ge, Yesus-nen wene erep nggarosolar-e: “Ap-nen konmbol pem lujwa naru, kwil kwawlsa wolmer-o.

⁵Ap kwarar-e an nggal kwasa lobok yuwarig-e: ‘Kerisut na-ge an-er-o’ luk yogolar-e, ap kwarat onmbol pem lujwa-o.

⁶Kit-nen-e wim pogolat san ene tup min kologolat-e, wim obok kologolat yugub-et nde, kwiye kudtak pug-o. Iri nggal kwat ma-t nde, i worok tak posolat-nen kwat ma-ge lag-o.

⁷Ap enlem misik-nen-e ap enlem misik inmin wim mbarogolat, nagawan misik-nen tenagaidnak wi woragwi-nen-e nagawan misik-nen tenagaidnak wi woragwi inmin wim mbarogolat ma-o. O nin me nan me nogoro mbud yosolat, o lele yosolat ma-o.

⁸Alat nde, kwami-nen li ndaguwokluk yane witli iri nggal iri kwaruwa iri oboksa-ge tel korosolar-net kwat yuwa-o.

⁹Iri tarem-e andi bandi rak kunpuwakluk ap ininggem wesera konpogolat, mondok kondogolat ma-o. An nunu bem ala, ap enlem oboksa-nen insili rak kunpuwa-o.

¹⁰Nde, iri tarem-e ap kwarat-nen inndi angin tubu yidnak na keya buwa-o. It na it-net enare pegerak mbogolat, it na it-net nisili kisili yogolat ma-o.

¹¹Nde, enesiget Mbal Pem Nagawan ene lomboksa yugwi nap kwarat men yogolar-e, ap kwarat onmbol pem lujwa-o.

¹²Nde, wene kuruk tugwi na mondok wigak yil mborosolar-e, ap kwarat-nen ap enabuwa kagwi na inndi kol ma-o.

¹³Alat nde, ta-nen nde irit momak puruk worasoma, woroksiyem wok yuwa nab-e imiri yuwa-o.

¹⁴Nde, Mbal Pem Nagawan-nen tenagaidnak wi wene, aid wene iri-ge ap pidsa-nen enaru makluk, yi wi ndi wi oboksa yak indil nuwa-o. Iri rak puruk-net woroksiyem-e wok ma-o.”

¹⁵“(Engga yu wonarusu nab-e no yosolat-nen yij-o luk kwara yebet kudtag-o.) Nde, kit-nen yik kagolar-e, Mbal Pem Nagawan ene lomboksa yoso nap Ndaniel-nen: ‘Iri nggal ma-o’ luk yidnak na ndak ndak tak posolar-e, lak tak onposo mondok meya mende iri-ge o marak ma iri me mendak worala yik kagupndig-e,

¹⁶o Yurea woragwi nab-e kwiye-nen ndobo bem ereba mbururag-o.

¹⁷Ab-e erema worasoma, at arengge silabaga wolma na-ge wil ludtak pug-o.

¹⁸Yapmu wolma nap-nen na at usum wil ijok lem lobok yurak pug-o.

¹⁹Iri tarem-e kwami enabila wolma min li kamo mak undugwi min-e enabuwa-o!

²⁰Nde, kwiye mburugup tarem iri-ge o sumbat yosolat, we woragwi tarem nde kwat yosolat ma naru, tepan yogolat wolmer-o.

²¹Iri tarem andi bandi mondok nggulok kujwa iri-ge ndak worak pid kuri-nen yawo kuri-ge andi bandi iri mende-ge mondok kagwi bug-o. Abok na iri nggal tuguruk kujwa bug-o.

²²Nde, Mbal Pem Nagawan-nen iri kwarurak tarem-e poro rak pigit lak yid nggal-e, ap misiger-o luk tet imiri yigit lak yeleb-o. Alat nde, at-nen len inpidnak nap enmanggim-e iri kwarurak tarem-e poro rak puwa-o.

²³Iri ala-ge, a misik-nen kit yak kondosolar-e: ‘Yu ker-o. Kerisut-e yeba worasu-o. Are, Kerisut-e ereba worasu-o’ luk yak kondosola-ge, ndemerer-o luk yebet kudtak pug-o.

²⁴Enesiget siget Kerisut min enesiget siget Mbal Pem Nagawan ene lomboksa yugwi nap min nam marig-e, it-nen-e wi yurak mende min kwiye worak mende min kwarat kwarogolar-e, Mbal Pem Nagawan-nen len inpidnak nap ereba na onmbol pem ludtag-e ndak nggal-e, irit kwatleb-o.

²⁵Kwara kinndi yebet ker-o. Awo kwarigit lak ma-net yak kindigi nar-o.

²⁶Nde, ap-nen yak kodogolar-e: ‘Yu ker-o. At iri-ge karu me worasu-o’ luk yogola-ge, iri nggwe mbururak pug-o. Are, ‘Yu ker-o. Iri me kura worasu-o’ luk yak kondogola-ge, ndemerer-o luk purak pug-o.

²⁷Nde, o pinel-e mo luwaso sa-nen yebek yidnak pem mo mboso sa yebek yil mburusu nggal, iri nggal-et Ap Ambara na lobok yuwa-o.

²⁸Ontogwak woraso sage ontogwak naso towe-nen nil ndok woroso-o.”

²⁹“Andi bandi rak unpuwa tarem iri na lak yosoluk ereya na-net molengen ndamuk yosolat, waneya na eyaya pil wagit lak yosolat, wonaru na mbal pem-nen mbuwasolat, teram amawi rak poso mende na nari wari mbosolat ma-o.

³⁰Iri rak puruk, mbal pem-nen Ap Ambara lobok yusu-o. Yenggerak purak mende iri-ge nam ma-o. Iri ala-ge, nggweyak ma woragwi nap enlem pidsa-ge yip togolat-nen yik kujwa nggal-e, Ap Ambara-ge mbal pem woraso nggan nggan pem amawi min abinal kwarat min lobok yosola, yik kujwa-o.

³¹Nde, posid poba nggulok na ene yosola-ge, at-nen-e at-nen idnak aid nap ereba wirik unpuwama-ge, at-nen len inpidnak nab-e nggweyak unggut empat nggwe-nen na, o nggweyak erep worok siyem min mbal erep woroksiyem min-nen na ndok worak unpuwa-o.”

³²“E ara-nen kwaroso yu kenaru mer-o: At ambarok puluruk, angga lebarosola-ge, o kibi yurak tarem-e panggo yij-o luk kenaru yili-o.

³³Nde, iri nggal-et an-nen yak kindigi mende na ndak ndak kwaril mborosola kagolug-e, yawo tumende bem panggorak worasu-o luk kenaru yugub-o.

³⁴An-nen yak kendeyeg-o: Yawo worali nap yeba na awo wat yigit lak ma-net an-nen yigi mende na pidsa ndak ndak kwat ma-o.

³⁵Mbal min nggweyak min-e lak ma-t nde, an-nen yidnak wene-ge lag-e ma bug-o.

³⁶Alat nde, iri kwarurak tarem min jam min ap misiger-o luk tet aru bug-o. Aid arem woragwi aid nap-nen na, Ambara-nen na enaru bug-o. Eid ariget nak aru-o.”

³⁷“Nde, Nu worala kwariga nggal, Ap Ambara lobok yuwa tarem na iri nggal-et kwaruwa-o.

³⁸Yi na awo kobong yigit lak ma-ge ap ereba-nen-e nunggwi mende min yi min nonggolat, ap min kwami min wok kerak mbogolat kwat tenak worakmu, Nu na e koma arem nggwid tarem wok yij-o.

³⁹Nde, iri tarem-e it enaru buk worakmu, yi na lobok yosolat ereya na-net it oboksa lak tak inpij-o. Nde, Ap Ambara na lobok yuwa tarem-e iri nggal-et kwat ma-o.

⁴⁰Iri na tarem-e ap mberen nde yapmu worakmu-ge misig-e wok uburuk mborosolat, misig-e keya bosolat ma-o.

⁴¹Nde, kwami mberen nde enmberek mburu marukmu, misig-e wok uburuk mborosolat, misig-e keya bosolat ma-o.

⁴²Iri bem-e kit Nagawan Indo lobok yuwa tarem-e kenaru buk me, kwara-t yik karok wolmer-o.

⁴³Wene yu nde kenaru wolmer-o: O winde iri-nen-e yariya wanurak nap lobok yurak jam aru woragaid nggal-e, at ama ngguwa naru, nene yigit lak, yik karok nak woraleb-o.

⁴⁴Iri bem-e, Ap Ambara na mimo kir-e peragit lak ma lobok yuwa me, kit-nen na irit mondok lid lud tak puruk wolmer-o.”

⁴⁵“Iri ala-ge, mot mot kwaroso indi kwid pidnak ndegel poso nab-e ta-o? At eid iri-nen-e at ama woragwi ndegel ubugwi nap ereb-e at iri na inggem onposolar-e, norak tarem ndak ndak yosola mak unduwakluk at ebem-et poso nap iri-nen yusu-o.

⁴⁶Nde, ndegel poso nap iri-nen nde at eyabu wok tenak worasoma, eid wok yuwarig-e, ndegel poso nap na-ge alen kwarat kujwa-o.

⁴⁷An-nen yak kendeyeg-o: At eid iri-nen at arengge oboksa-ge ndegel poso nap na inggem puwa-o.

⁴⁸Alat nde, ndegel poso nap meya kwaroso iri-nen-e at indi arem-nen perasolar-e: ‘An neid iri-ge ndaget lobok yuwa bug-o’ luk,

⁴⁹at-nen-e yabu misiget erep wanugwi anggamirak ereba na linggamburok ondosolat, anggut engen amburu ndonggosa nunggwi nap inmin-e nasolat, yi nasolat worasoma-ge,

⁵⁰‘Jam iri bem wok ma-o’ peragit lak ma, at eid iri na mimo wok marig-e,

⁵¹eid na-nen-e ndegel poso nap iri na mbarep parepsa keya buruk, enesiget siget kwarugwi nap ennggendumu lesa wirik puwa-o. Iri me-ge sa nggwa mbogolat, eneyak nggirit marogolat wolma-o” luk yij-o.