Read Nduga MATIUS 25 Bible Online

MATIUS 25 - Nduga bible

MATIUS 25

¹“Iri tarem-e Mbal Pem Nagawan-nen tenagaidnak wi-ge yu nggal-et ma-o. Kwami ndugum sepulu iri-ge it ental wanogoluk, it wok unpurak nap imin lid pid yuwokluk mbiriga-o.

²Mborogolar-e, it lima-ge inndi lak woraiga-o. Nde, it lima-ge inndi nggat ponok tak woraiga-o.

³It inndi lak kwami na-ge ental owag-e waniga-t nde, abok pil nggurak yi kandug-e we mbiriga-o.

⁴Alat nde, it inndi nggat ponok tak kwami na-ge ental owak wanurug-et nde, yi kanduk mbi ondomok tak inidmbe arem kenangguruk mbiriga-o.

⁵Nde, it wok unpurak nap iri na lobok yigit lag-et lag-et worala-ge, it kwami ereba-ge enlengen lambu lambu luk, nene yiga-o.

⁶Nene yik tenak worakmu, nggiringgendumu-ge enne ngguloksa yogolar-e: ‘Wok kunpurak nap na lobok yij-o! Imin lid pid yobokluk mberer-o!’ luk yiga-o.

⁷Yogolikma-ge, kwami ereba na oboksa men yigarik, ental paiga-o.

⁸Pakolar-e, it inndi lak kwami na-nen it inndi nggat ponok tak kwami na yak ondogolar-e: ‘Nit nental-e nigi yusu me, kit kinid kanduk mbi menggasa wok nender-o’ luk yiga-o.

⁹Yiga-t nde, in inndi nggat ponok tak kwami ereba-nen wene erep nggarogolar-e: ‘Mondok lag-o. Yi kandug-e kit min nit min nenmanggim-e ndag-e lag-o. Kir-e mburugupndik, kondomok kenmanggim onggo pil mberer-o’ luk yiga-o.

¹⁰Nde, it inndi lak kwami na-ge yi kanduk onggo pil mborogola ereya na-net wok unpurak nap na lobok yij-o. Lobok yosolar-e, it lid lud tak woraiga kwami-nen at imin luk kwe wanugwi ma nggogolar-e, tu lerak pij-o.

¹¹Iri rak puruk, abok nggwe-ge kwami erep ya na lobok luk-nen yogolar-e: ‘Nap wa-e. Nap wa-e. Tu kuwarak ninpi-o!’ luk yiga-o.

¹²Yogolikma-ge, it wok unpurak nap iri-nen yosolar-e: ‘An-nen yak kendeyeg-o: Kit yu-ge an-e naru bug-o’ luk yak indij-o.

¹³Iri bem-e iri tarem min jam min-e kenaru buk me, kwara-t yik karok wolmer-o.”

¹⁴“Mbal Pem Nagawan-nen tenagaidnak wi-ge ap misig-e o nin sa mbereyekluk yosolar-e, ndegel ubugwi nap wene mbo unpuruk at arengge na at amanggim tena wolmakluk ininggem pid iri nggal-nen yusu-o.

¹⁵It-nen kwarugwi bem enmawi ndak ndag-et ondomok tak tembesa wok ondosolar-e, misik tol-e lima wok tosolat, misik tol-e mberen wok tosolat, misik tol-e misiget nak wok tosolat yij-o. Iri rak puruk nagawan na mbirij-o.

¹⁶Mborosola karuk, at tol lima wanid nap na ndaget nak wene worosola, orol iri na konogolar-e, tol-e lima nde nambena wanij-o.

¹⁷Iri nggal-et at tol mberen wanid nap na wene worosola-ge, orol na konogolar-e, tol mberen mbi nambena wanij-o.

¹⁸Alat nde, tol misiget wanid nap na mborosolar-e, nggweyak yala at eid orol na-ge kura bij-o.

¹⁹Kwarat nggal woraruk, ndegel pugwi nap na ineid nagawan na tuguruk lobok yosolar-e, at orol wok indid na bem it inmin wene mbenareyekluk yij-o.

²⁰Iri mbenarosola-ge, tol lima wanid nap na lobok yosolar-e, tol lima nambena wanid na pil lobok luk-nen yosolar-e: ‘Nap wa-e. Kar-e tol lima wok nirigen-et nde, tol na bem-e lima yu nambena wanigi yu ki-o’ luk yij-o.

²¹Yosoloma-ge, at eid-nen at yak tosolar-e: ‘Ndegel noboso nap konak mot mot nak kwaroso wa-e. Ob-et kwarigen-o. Kat-nen-e tol marik iri na bem mot mot nak kwarigendik me, nggulok mende nde kinggem pimin-o. Kat keid an nalen pem woraso yu me ngguwasug-o’ luk yak tij-o.

²²Iri luk, tol mberen wanid nap na lobok luk-nen yosolar-e: ‘Nap wa-e. Kar-e tol mberen wok nirigen-et nde, tol na mberen yu nambena wanigi yu ki-o’ luk yij-o.

²³Yosoloma-ge, at eid na-nen at yak tosolar-e: ‘Ndegel noboso nap konak mot mot nak kwaroso wa-e. Ob-et kwarigen-o. Kat-nen-e tol marik iri na bem mot mot nak kwarigendik me, nggulok mende nde kinggem pimin-o. Kat keid an nalen pem woraso yu me ngguwasug-o’ luk yak tij-o.

²⁴Iri luk, at tol misiget wanid nap na lobok yarik at yak tosolar-e: ‘Nap wa-e. Kat kisilepma yoso iri-ge an-e naru-o. Kat-nen uwi yakit lak sa-t nde, engen mbarosolat, kat-nen uwi pil kagit lak sa-t nde, engen wanosolat yoso iri-ge an-e naru me,

²⁵an mbirigirig-e kat kaye-nen kat korol na nggweyak arem kura bigi-o. Kat kangge yu-o. Tuguruk winde yi-o’ luk yak tij-o.

²⁶Yak tosoloma-ge, at eid iri-nen at yak tosolar-e: ‘Ndegel noboso nap meya keberari worak yu-ge wa-e. An-e an-nen yakit lak sa-t nde, engen mbarosolat, an-nen uwi pil kagit lak sa-t nde, engen wanosolat yoso iri-ge kar-e karu bug-a?

²⁷Iri karu nde ala-ge, an norol iri-ge uwang erep lesa wanugwi nap endam pigen nggal-e, an norol min eralu pidnak uwang min iri na nde lesa waneleb-o.

²⁸Iri bem-e, tol iri na at eram-nen waga tol sepulu wanid nap na wok ter-o.

²⁹Nde, arengge worak nab-e arengge erep min nambena wok tosola-ge, at arengge-ge kwarat lombok ma-o. Alat nde, arengge lak nab-e at eram marig-et nak woraidnak na oboksa mengga wanuwa-o.

³⁰Nde, ndegel noboso nap meya ebe lak mende yu-ge ndamuk nak woraso sa mbo ber-o. Iri me-ge yip tosolat, eneyak nggirit marosolat wolma-o.’ ”

³¹“Ap Ambara na at unu kek tak pem lobok yosolar-e, aid nap oboksa na at imin lobok yogola-ge, at-nen-e nagawan koreyak woraso sa abinal worak iri na me kore yuwa-o.

³²Iri luk, ap enlem oboksa-ge at eram ndok wuruwama-ge, lomba wam yik karok woraso nap-nen lomba wam min kambing wam min lena arik tak pugwi nggal, iri nggal-et Ap Ambara-nen-e ap enlem oboksa na lena enarik tak onposolar-e,

³³lomba wam-e at inggi kigit ambigit nggwe onposolat, kambing wam-e at inggi kware ambigit nggwe onposolat ma-o.

³⁴Iri luk, Nagawan na-nen at inggi kigit nggwe wolma nap na yak ondosolar-e: ‘An Neid-nen imbiringgat tak kinpid nap wa-e. Lobok yer-o. Nggweyak ma yu me ndak wirid kuri-nen kit kenmanggim lid lud tak pidnak nagawan-nen tenagaidnak wi yu winde yil lobok yer-o.

³⁵An nere kasoma-ge, kit-nen-e nunggwi mende mak nirigeb-o. An yi nere ala-ge, yi mak nirigeb-o. An ap sal worasola-ge, kit kenma rak nibigeb-o.

³⁶An nusum lak worasola-ge, sum wok nirigeb-o. An kugi worak worasola-ge, yongga niril lobok yigeb-o. O kubu me worasola-ge, neram lobok yigeb-o’ luk yak unduwa-o.

³⁷Yak ondosoloma, it lud tak nak kwarugwi nap-nen yak togolar-e: ‘Nagawan Indo wa-e. Nir-e mepme-nen kat nere kasola keyaruk, nunggwi mende mak korogolat, kat yi nere ala keyaruk, yi mak korogolat yige-o?

³⁸Nde, nir-e mepme-nen kat ap sal worasola keyaruk, nit nenma rak kobogolat, kat kusum lak ala keyaruk, sum wok korogolat,

³⁹kat kugi worak worala, o kubu me worala keyaruk, mepme-nen kiyil mbirige-o?’ luk yak tuwa-o.

⁴⁰Yak togolikma-ge, Nagawan na-nen wene erep nggarosolar-e: ‘An-nen yak kendeyeg-o: An nowot-tak marik komosa meya misik iri na iri nggal kwat ibigep iri-ge an-et kwat nibigeb-o!’ luk yuwa-o.

⁴¹Iri luk, Nagawan na-nen-e at inggi kware nggwe wolma nap na yak ondosolar-e: ‘Kit imbiri lamut tak kinpidnak nap yu-ge wa-e. Mberer-o. Sere min at-nen idnak aid nap min enmanggim lid lud tak pidnak nigi momtak puk kanduk arem iri me mberer-o.

⁴²An nere worala, nunggwi mende mak nirigit lak yigeb-o. Yi nere worala, yi mak nirigit lak yigeb-o.

⁴³Ap sal worala, kit kenma rak nibigit lak yigeb-o. Sum lak worala, sum wok nirigit lak yigeb-o. Kugi worak worasola, o kubu me worasola, niyil lobok yigit lak yigeb-o’ luk yak unduwa-o.

⁴⁴Yak ondosoloma-ge, it-nen wene na erep nggarogolar-e: ‘Nagawan Indo wa-e. Nir-e mepme-nen kat nere worala nde, yi nere worala nde, ap sal worala nde, kusum lak worala nde, kugi worak worala nde, o kubu me worala keyaruk, yongga kirigit lak yige-o?’ luk yak tuwa-o.

⁴⁵Yak togolikma-ge, at-nen wene erep nggarosolar-e: ‘An-nen yak kendeyeg-o: It ennggendumu marik komosa meya yu na kwat ibigit lak yigep iri-ge, an-et kwat nibigit lak yigeb-o’ luk yak unduwa-o.

⁴⁶Iri ala-ge, it iri na-ge pempa andi bandi kagolat woragwi sa inpil ngguwa-o. Nde, lud tak nak kwarugwi nap na-ge pempa unlug-et woragwi sa iri me ngguwa-o” luk yij-o.