Read Nduga MATIUS 28 Bible Online

MATIUS 28 - Nduga bible

MATIUS 28

¹We woragwi tarem nene luk, Hari Minggu tarem o nda yosoloma, o Magaralena kwe Maria min Maria misik iri min-e yapma pidnak sa na kil mbiriga-o.

²Kil mbiriganggal-e, aid arem-nen Nagawan Indo-nen idnak aid nap na mbuwasola-ge, mimo ereya-t o lele kwarat yij-o. Aid nap na lobok yarig-e, kerep na lembera waburuk, iri bem-et koreyak woragaij-o.

³At erare-ge obinel nggal, at usum-e loro lombok ndugu ndugu nggal woragaij-o.

⁴Nde, san ombo ereba na-ge kwiye kwarat luk, kot kot luk, wat yidnak nggal yiga-o.

⁵Alat nde, aid nap iri-nen kwami na yak ondosolar-e: “Kir-e kwiye kali-ge meyog-o. Kir-e e lang pang tak pem panggarak ibiga nap Yesus irit ogore yili iri-ge an-e naru-o.

⁶At iri-ge yu me-ge lag-o. At-nen-e: ‘Nuruk yimin-o’ luk yoso nggal-et uruk agaij-o. At mbinggirik woragaid sa na kil lobok yer-o.

⁷Karug-e, ndaget nak at owosirak yak indil mborogolar-e: ‘At iri-ge wat yidnak nap ennggendumu-nen uruk lug-e, kit kentaremok nggwe Nggalilea mburusu-o. Iri me-nen kagub-o’ luk yak ender-o. Wene iri-ge ndemeret yak kindigi-o” luk yak indij-o.

⁸Iri rak puruk, kwami na kwiye min-et nde, enalen kwarat luk at owosirak wene na yak unduwokluk ndaget nak puburak mbiriga-o.

⁹Mburukmu, mimo ereya-t Yesus na it inmin lid pid luk-nen yak ondosolar-e: “Wiwa-o” luk yak ondosoloma-ge, kwami na-ge at ijok tenaguruk at erembel waniga-o

¹⁰Alama-ge, Yesus-nen it yak ondosolar-e: “Kwiye kali-ge meyog-o. Mburugupndig-e, an naggamirak na-ge Nggalilea mberer-o luk yak indil mberer-o. Iri me-nen an niyujwa-o” luk yak indij-o.

¹¹Kwami ereba mborogola ereya na-net kerep ndo yik karok woraiga san ombo erep na o silmu mbirigarig-e, iri nggal kwat yosola kaiga wene na kenggera tepan omborak nagawan nagawan yak indiga-o.

¹²Yak ondogolikma-ge, it tepan omborak nagawan nagawan-nen ogore yidnak nap inmin ndok wirigarik, it-nen kwarurak wene mbatluk, it-nen-e san ombo na onggo kwarat wok ondogolat-nen

¹³yak ondogolar-e: “Kir-e wene-ge yu nggal yurag-o: ‘Nit kubu nggwe nene yogola-ge, at owosirak ereba na lobok yigarik, at orogwak iri yariya wanikma-o’ luk yurag-o.

¹⁴Nde, gubernor-nen wene yu kuluwarik, kit kenpem angin worak mende mbuwa naru, nit-nen at indi yanggunul-o” luk yak indiga-o.

¹⁵Yak ondogolikma-ge, san ombo na-ge tol na wanurug-e, it yak indidnak iri na nggal-et kwariga-o. Iri ala-ge, it Yawuri nap ennggendumu wene na wigak yid na-ge yawo na wigak yusu-o.

¹⁶Nde, at owosirak sebelas na-ge o Nggalilea mborogolar-e, Yesus-nen mirik inpid ndobo iri na me-t mbiriga-o.

¹⁷Mbirigarik, at karug-e, at erembel waniga-t nde, it ereb-e inndi-ge mberen nggal woraiga-o.

¹⁸Nde, Yesus na it endam panggo yosolat-nen it yak ondosolar-e: “Aid arem amawi min nggweyak ma amawi min oboksa-ge an ninggem pidnak-nen yusu-o.

¹⁹Iri bem-e, kit mburugupndig-e, ap enlem oboksa-ge an nowosirak tak unpuruk, yi mat onpogolar-e, Eid unu bem, Ambara unu bem, Konak Indi unu bem yi mat unpuruk,

²⁰an-nen ‘Iri nggal mer-o’ luk yak kindigi wene oboksa-ge it mul ender-o. Yebet yebet tak wolmer-o. An-e pempa-t kit kinmin irit worasoma, woroksiyem wok ma-o” luk yak indij-o.