Read Nduga MATIUS 3 Bible Online

MATIUS 3 - Nduga bible

MATIUS 3

¹Iri tarem-e Yoanes, ap yi mat onposo nap na lobok yarik, Yurea karu me woralat-nen aid wene yoso tel korosolat-nen yosolar-e:

²“Mbal Pem Nagawan-nen tenagaidnak wi-ge panggo yusu me, kit meya yugwi keya buruk, kondok yer-o” luk yij-o.

³Mbal Pem Nagawan ene lomboksa yoso nap Yesaya-nen yosolar-e: “Ap misik karu me-nen ene nggoksa yosolar-e: ‘Nagawan Indo urula lid lud tak per-o. At mbururak urula ndung tak per-o’ ” luk yid iri-ge at Yoanes min-et yij-o.

⁴At Yoanes na usum-e unta wam usu-nen konidnak, nde, usum ngonok tak poso tani are-ge aboro-nen konidnak, nde, at naso mende-ge sil min tamuk amburu min naso-o.

⁵Nde, at eram ndok worogolar-e, Yerusalem woragwi nap min Yurea nggweyak pem woragwi nap oboksa min Yorodan eyak ele bem yu bem woragwi nap oboksa min at eram panggonogolat,

⁶it nen meya yidnak parogola-ge, Yoanes-nen yi Yorodan arem yi ma onposolat woragaij-o.

⁷Nde, Yoanes-nen it yikeneyagaidnggal-e, Parisinap nde, Saruki nap nde kwarat at-nen yi ma unpuwakluk at eram lobok yogola, at-nen yak ondosolar-e: “Kit waro-nen wigarak wa-e. Mbal Pem Nagawan isilepma abok kenpem mbosola, inggem-nen mengga mbururag-e ta-nen yak kindij-o?

⁸Meya kwarugwi keya buruk, kondok luk-nen kwarugwi mende mbi nam tak per-o.

⁹Kit-nen peragolar-e: ‘Abaram iri-ge nit nonmbo-nen yusu-o’ luk purudtak pug-o. An-nen yak kendeyeg-o. Mbal Pem Nagawan-nen-e kerep yeba bem-nen Abaram-nen wigarak nap nggal kwasa ndak worak unpurag-e ndak-net yusu-o.

¹⁰E mengen min tebera mbo beyekluk ije-ge ebem lud tak puruk worasu-o. Engen konak yoso buk e oboksa-ge ndara kanduk arem pil ngguwa-o.

¹¹Kit meya yidnak keya buruk, kondok yili iri bem-net an-nen yi ma kunpusu-t nde, an nimbirik lobok yuwa nap-nen perak nde Konak Indi bem kanduk pem yi ma kunpuwa-o. At iri-ge an nggal-e lag-o. Amawi worak terak minik me, an nggal-nen at ijok sum na waruk nurak tet meya-o.

¹²Nggandum mbato ebe min ababul min lena arik tak pugwi mende-ge at inggem worasu-o. Lena arik tak purug-e, nggandum mbato ebe-ge ndok wosa pil nggugwi sa posolat, abapno-ge nigi yoso buk kanduk iri na me kan puwa-o” luk yij-o.

¹³Iri tarem-e Yesus na-ge Nggalilea-nen yi Yorodan arem Yoanes-nen yi ma ubuwakluk at eram lobok yij-o.

¹⁴Alat nde, Yoanes na-ge at indi-n pidnak na logud tak peyekluk-nen yosolar-e: “Kat-nen an yi ma nuburak perak ob-et nde, kar-et nde an neram lobok yusu-a?” luk yij-o.

¹⁵Yosoloma-ge, Yesus-nen yak tosolar-e: “Irit nde, yawo-ge ereba mag-o. Iri nggal kwarogolar-e, Mbal Pem Nagawan indi-n pidnak obok ndak ndak pogolat-nen kwarul-o” luk yak tosoloma-ge, Yoanes na-ge at-nen yidnag-et kwarij-o.

¹⁶Nde, Yesus na yi ma obosoloma, yi ma-nen pilaksa men yosola, ereya na-net mbal ngak yosoloma, Yesus erengen lik kagaidnggal-e, Mbal Pem Nagawan Indi-ge towe nggwende nggal yebaluk at ebem mbuwasola kagaij-o.

¹⁷Iri lug-e, ene misik aid arem-nen pil mbuwasolat-nen yosolar-e: “Yu-ge an Nambara nindi kundik-nen yusu-o. At ebem an nalen kwarat yusu-o” luk yosola, kuliga-o.