Read Nduga MATIUS 5 Bible Online

MATIUS 5 - Nduga bible

MATIUS 5

¹Yesus-nen-e ap mondok kwarat iri na eneyaruk yarig-e, ndobo amun pem lagarik, iri me-nen koreyak worasoma-ge, at owosirak na-ge at eram ndok wiril lobok yiga-o.

²Nde, lobok yogola-ge, Yesus-nen wene mul ondosolat-nen wene yu yij-o:

³“Mbal Pem Nagawan imbiri bem inndi tebeluk worali nab-e, Mbal Pem Nagawan-nen tenagaidnak wi iri winde-nen yili me, enalen kali-o.

⁴Nde, inndi puru pera worali nab-e Mbal Pem Nagawan-nen it inndi yangunuwa me, enalen kali-o.

⁵Nde, inndi yanggonak worali nab-e Mbal Pem Nagawan-nen urul yak indidnak irit wanuwa me, enalen kali-o.

⁶Nde, lud tak nak kwarurak ukwe kwarat kali nab-e Mbal Pem Nagawan-nen inndi teyok tak unpuwa me, enalen kali-o.

⁷Nde, nin nap unpud kali nab-e Mbal Pem Nagawan-nen it unpud kujwa me, enalen kali-o.

⁸Nde, inndi marak kopkap lak worali nab-e it-nen Mbal Pem Nagawan kujwa me, enalen kali-o.

⁹Nde, lambuk tak unpugwi wene ndamili nab-e Mbal Pem Nagawan-nen it inmin-e ‘An nilirag-o’ luk yuwa me, enalen kali-o.

¹⁰Nde, lud tag-et kwarogola-t nde, lel mberel inpli nab-e Mbal Pem Nagawan-nen tenagaidnak wi iri winde-nen yili me, enalen kali-o.

¹¹An nebem ala ap-nen insili rak konpogolat, lel mberel konpogolat, enesiget wene bem konpok pogola-ge, kir-e kenalen ker-o.

¹²Kit woragit lak ma-nen nanduk Mbal Pem Nagawan ene lomboksa yugwi nap na iri nggal-et lel mberel inpikma me, aid arem-nen kit wok kundurak onggo nggulok worasu me, kenalen pen-et woragolat, kijik kijak wolmer-o.”

¹³“Kir-e nggweyak ma yu me mayu-nen yili-o. Nde, mayu iri nde undu lak ala-ge, no bem-nen undu worak tak puwa kali-o? Ebe lak mende yidnak me, mbo puwama, ap inijok-nen lul lul wuruwa-o.

¹⁴Kir-e ki nap ennggendumu yaya nen yili-o. Ndobo bem wiridnak o siri iri-ge kurak momtag-e meya-o.

¹⁵Ap-nen-e tal paga togolwak tud tak arem pugwi bug-o. Are, o ma iri me woraidnak nap oboksa yaya bem wolmakluk, tal pugwi ondolma iri me-t pugwi-o.

¹⁶Nde, iri nggal-et kit-nen konak nak kwaridnak na karuk yuwarig-e, it-nen-e Kineid aid arem woraso iri erembel wanuwakluk, kit keneyaya-ge ap ennggendumu yaya yuwag-o.”

¹⁷“Nde, kit kenarem-nen yebet kagolar-e, ‘At yu lobok yij-e imiri mbarak pidnak wene min Mbal Pem Nagawan ene lomboksa yugwi nap-nen yidnak wene min lak tak peyekluk-nen lobok yij-o’ luk peragub-o. Nde, an-e iri lak tak peyekluk-nen lobok yigi-ge lag-o. Are, wene na ndak tak peyekluk-net lobok yigi-o.

¹⁸An-e ndemeret yak kundusu-o: Mbal min nggweyak min lak yigit lak ma-ge, imiri mbarak pidnak wene arem mbarid-nak hurup marik komosa min titik mariget ter-o luk min-e iri arem mbarid-nak wene mondok pidsa ndak tak pigit lak ma-ge mondok lag-e ma bug-o.

¹⁹Iri bem-e, ta-nen nde imiri mbarak pidnak wene enggendumu-nen wene marik komosa iri na kuruk turuk, kuruk tugwi iri na nin nap na mul unduwa nap iri-ge Mbal Pem Nagawan-nen tenagaidnak wi iri me-ge iri yidnak nab-e unu lak, teberak irit wolma-o. Alat nde, ta-nen nde imiri mbarak pidnak wene-nen yidnak yidnak nak kwarosolat, nde, iri kwarugwi-ge nin nap na mul unduwa nap iri-ge Mbal Pem Nagawan-nen tenagaidnak wi iri me-ge ap kek tak irit wolma-o.

²⁰Nde, an-nen yak kendeyeg-o: Engga enaru nap min Parisi nap min-nen lud tak nak kwarugwi-t nde, kit-nen-e it-nen kwarugwi na mondok ombol nggwe terak minik nggal lud tak nak kwarigit lak yugupndig-e, Mbal Pem Nagawan-nen tenagaidnak wi-ge nggugup pug-o.

²¹Nde, nit nineid nonmborak yak ondogolar-e: ‘Ab-e wururak pug-o. Nde, ap wuruwa nab-e eyanggo wat makluk wene ebem mbarurag-o’ luk yugwi wene-ge kir-e kulugwi nar-o.

²²Alat nde, an-nen yak kondosolar-e: Ta-nen nde at anggam imin isilepma yuwa nap iri na ebem-e wene mbarurag-o. Nde, ta-nen nde mondok meya wene at anggam yak tuwa nap iri na ebem-e wene mbarugwi nap yok nggok na-nen ebem wene mbarurag-o. Nde, ta-nen nde at anggam yak tosolar-e: ‘Wid num kum tak yu-ge wa-e’ luk yak tuwa nap iri na-ge kan mare wulok tenak woraso sa iri na me pil ngguwa-o.

²³Iri bem-e, kat-nen nde Mbal Pem Nagawan amanggim purak mende iri posolar-e, wam wosa kan pugwi sa iri me peyekluk yosoma, kat-nen kanggam indi puru rak pidnak iri na yebet karug-e,

²⁴purak mende iri-ge wam wosa kan pugwi sa eralu iri me keya buruk, ereya na-net kanggam na eram wene teyok tak pil mbutluk-nen tuguruk lobok yosolar-e, purak mende iri-ge Mbal Pem Nagawan amanggim purag-o.

²⁵Ap mbi-nen-e kit meya yidnak pem wene mbarugwi nap endam kinpil mbereyekluk yosola-ge, tundumu mborogolat-net kir-e ndaget nak awo ma-net konak wene yak turuk imin lambuk yurag-o. Iri yigit lak yugupmu-ge, at-nen-e wene mbaroso nap eram keya konposola, wene mbaroso nap-nen-e san ombo inggem kunpuwama, o kubu me kinpil nggugu-o.

²⁶An-nen yak kendeyeg-o: O kubu me kunpuwarig-e, namat iri na mondok oboksa uwi yakit lak ma-ge wirik kunpuwa bug-o.

²⁷Nde, ‘Ap onkwe yeburak pug-o’ luk yidnak wene iri-ge kir-e kulugwi nar-o.

²⁸Alat nde, an-nen yak kendeyeg-o: Ap-nen-e kwe mbi yik karuk, indi-net kwe na ukwe eberasola-ge, at indi-nen kwe na yebusu-o.

²⁹Nde, kerengen kigit nggwe iri-nen ndowaga meya rak kobosola-ge, kerengen na kela mbo bi-o. Kat kebe ebis-et kan mare arem mbo kubuwa naru, kat kerengen misiget iri lak tak purak perak nde ob-o.

³⁰Nde, kinggi kigit nggwe-nen ndowaga meya rak kobosola-ge, mbara mbo bi-o. Kat kebe ebis-et kan mare arem mbo kubuwa naru, kat kinggi misiget iri lak tak purak perak nde ob-o.

³¹Nde, nanduk-nen na yogolar-e: ‘Ap-nen ogwe keya peyeklug-e, “Keya kibigi-o” luk engga mbara wok tuwag-o’ luk yidnak worasu-t nde,

³²an-nen yak kendeyeg-o: At ogwe na-ge nin nap-nen yebigit lag-et nde, ap-nen at ogwe iri na keya bosola-ge, kwe iri na-nen nin nap wanuwama-ge, un iri na-nen ogwe na mbabi kwaroso rak pusu-o. Nde, kwe keya bidnak iri na wanuwa nab-e mbabi-t yusu-o.

³³Nde, nit nonmborak yak ondosolar-e: ‘Irit timin-o luk owak mbarid-nak na-ge kwarigit lak yurak pug-o. Are, Nagawan Indo imbiri bem “Irit kwarimin-o” luk owak mbaridnak iri na ndak ndag-et kwarurag-o’ luk yidnak wene iri-ge kit-nen kulugwi nar-o.

³⁴Alat nde, an-nen yak kendeyeg-o: Kit-nen owak mbarurak pug-o. Owak mbarogolar-e, aid arem-e Mbal Pem Nagawan koreyak woraso sa-nen yusu me, aid arem unu luk owak mbarurak pug-o.

³⁵Nde, nggweyak yu-ge Mbal Pem Nagawan ijok ondoro-nen yusu me, nggweyak yu unu luk owak mbarurak pug-o. Nde, Yerusalem iri-ge Nagawan nggulok uwi siri-nen yusu me, Yerusalem unu luk owak mbarurak pug-o.

³⁶Kat kanggulsu misiger-o luk tet loro rak purak na, miri rak purak na, kamawi-ge lak me, kat kanggulwak unu luk owak mbarurak pug-o.

³⁷‘Ye’ yogolar-e, ‘Ye’ yurag-o. Nde, ‘Lag-o’ yogolar-e, ‘Lag-o’ nak yurag-o. Nde, wene nin tak nan tak yili iri-ge Sere eram-nen lobok yidnak wene yili-o.

³⁸Nde, ‘Enlengen kilidnak ala-ge, ondolma enlengen kulurag-o. Nde, eneyak ndamiridnak ala-ge, ondolma eneyag-et ndamururag-o’ luk yugwi iri-ge kir-e kulugwi nar-o.

³⁹Alat nde, an-nen yak kendeyeg-o: Kit meya rak konpogola-ge, kit-nen na onggo it meya rak unpurak pug-o. Are, ap misik-nen nde kerabengan kigit nggwe nde lel kasola-ge, kar-e kerabengen ponok nggwe na min-et nuk kudtag-o.

⁴⁰Ap misik-nen-e kat kabare sum waneyekluk kebem wene mbarosola-ge, kat-nen-e lambuksa amberam sum min-et wok ti-o.

⁴¹Ap misik-nen ene amawi bem lembesa yak korosolar-e: ‘An narengge wanuruk wandag-et mbururag-o’ luk yak korosola-ge, kat-nen-e iri wanuruk mbururag-o yak kirid sa na wok lug-e, mburugun iri na nggal-et terak mena mbururag-o.

⁴²Nde, ap-nen nde kat karengge mbi kebem nggi yosola-ge, wok turag-o. Nde, ap-nen nde kat karengge luru tena woramindik wok kirimin-o luk yosola-ge, ene kola keya burak pug-o.

⁴³Nde ‘Kat kanggamirak nde enabuwa kudtag-o. Nde, kat kimin sirid nap perak nde kisili rak unpurak-o’ luk yidnak wene yu-ge kir-e kulugwi nar-o.

⁴⁴Alat nde, an-nen yak kendeyeg-o: Kit kinmin sirid nap iri-ge enabuwa ker-o. Nde, kit lel mberel kunpugwi nap iri enmanggim na tepan yer-o.

⁴⁵Iri kwarugup pem-e kit kineid aid arem woraso ilirak tugub-o. Kineid iri-nen at omolengen yemberak pil lobok yosolar-e, meya nap enpem na irit, konak nap enpem na irit, poso-o. Nde, talme engen pil mbuwasolar-e, lud tak nak kwarugwi nap enpem na irit, meya nak kwarugwi nap enpem na irit, pil mbuwaso-o.

⁴⁶Nde, kit-nen nde kit kenabuwa kagwi nap iri na nak enabuwa kagola-ge, no bem Mbal Pem Nagawan-nen onggo wok kunduwa-o? Pemerinta enmanggim tol ndok wurugwi nap-nen na iri nggal kwarugwi-net yusu-o!

⁴⁷Nde, kit-nen-e kit kennggamirak nak wa yak indili iri-ge ap erep-nen na iri nggal kwarugwi me, terak minig-e ngge-o? Mbal Pem Nagawan enaru buk nap-nen na iri nggal-et kwarugwi-nen yusu-o!

⁴⁸Iri bem-e kit Kineid aid arem woraso iri-ge iminep mbarak nak woraso nggal, kit na mondok iminep mbarak irit wolmer-o” luk yak indij-o.