Read Nduga MARAKUS 1 Bible Online

MARAKUS 1 - Nduga bible

MARAKUS 1

¹Mbal Pem Nagawan Ambara Yesus Kerisut owene konak wene-ge yu-o.

²Konak wene iri tel korosolar-e, Mbal Pem Nagawan ene lomboksa yoso nap Yesaya-nen engga mbarosolar-e: “Mbal Pem Nagawan an-nen wirik ibil lobok yimin nap yu-nen-e kat kurula yaguwakluk nandug-et kat kabuwok ibil mbirimin-o.

³Karu me ap lak ma-nen ap-nen ene nggoksa mbo bosolar-e: ‘Nagawan Indo urula lid lud tak pogolat, at mbururak tula mot tak per-o’ luk yij-o” luk Yesaya-nen mbarij-o.

⁴Iri yid iri na nggal-et ap yi maroso nap Yoanes na karu me ap lak ma wok yosolat-nen yosolar-e: “Kit meya yidnak keya buruk, kondok yer-o. Kondok yogola-ge, Mbal Pem Nagawan-nen kit meya yidnak amberam tak puwakluk, yi mat kunpurak kinndi mer-o” luk yij-o.

⁵Yosoloma-ge, Yurea nggweyak pem woragwi nap min o Yerusalem woragwi nap min pidsa at eram lobok yogolar-e, it meya yidnak parogola-ge, yi Yorodan arem yi ma onposolat woragaij-o.

⁶Woralar-e, Yoanes usum-e unta wam usu-nen yaidnak sum yorosolat, ubugulwak kere-ge aboro ngarak-nen logoksa yirik woralat, nde, at naso-ge sil min tamuk amburu min naso-o.

⁷Nde, at-nen it yak ondosolar-e: “An nimbirig-e an nggal-e lag-o. Ap nggulok amawi worak irit lobok yusu-o. Nde, an nggal-nen-e tebe luk, at ijok sum wusururag-e mondok meya-o.

⁸An-e we yi bem yi mat kunpusu-o. Nde, at-nen-e Konak Indi bem mat kumpuwa-o” luk yak indij-o.

⁹Ereya tarem Yesus-e Nggalilea nggweyak pem o Nasaret-nen mbosoloma-ge, Yoanes-nen yi Yorodan arem yi ma bij-o.

¹⁰Yi ma-nen pilaksa men yosolat ereya na-net lik kagaidnggal-e mbal ngak yosolar-e, Konak Indi-ge towe nggwende nggal at ebem yebaluk mbuwasola kagaij-o.

¹¹Iri lug-e, aid arem-nen ene pil mbuwasolar-e: “Kar-e an Nambara nindi kundik-nen yusu-o. Kat kebem an nalen kasu-o” luk yij-o.

¹²Ereya na-net Konak Indi-nen Yesus na-ge karu me ap lak ma wok uburuk mbirij-o.

¹³Nde, Sere-nen at indi nggarosolar-e, karu me ap lak ma iri me empat pulu nene yij-o. At iri me worasolar-e, eyak wirik eyak worak mende enggendumu worasola, aid nap-nen-e at ndegel obogolat woraiga-o.

¹⁴Yoanes na o kubu me pikma worala-ge, Yesus na-ge o Nggalilea wi Mbal Pem Nagawan-nen yidnak aid wene yak indil indil mborosolat-nen

¹⁵it yak ondosolar-e: “Mbal Pem Nagawan-nen tenagaidnak wi kwat momtak tarem-e abu wok yusu-o. Kit meya yidnak keya buruk, kondok yogolat, aid wene bem kinndi angin tubu yogolat wolmer-o” luk yak indij-o.

¹⁶Yesus na yi Nggalilea eyak pem waring kasolat-nen yik eneyagaidnggal-e, Simon owot Andereas enmberek ir-e keyane wanugwi nap me, keyane wanugwi sum yi koma arem ya pil nggwilik waring kakmu, eneyagaij-o.

¹⁷Eneyarug-e, Yesus-nen it yak ondosolar-e: “Lobok yugupndik, an langgal nuburuk nogola-ge, keyane wanugwi nggal, ap wanugwi nap tak kinpimin-o” luk yak indij-o.

¹⁸Yak ondosoloma ereya na-net it na-ge keyane wanugwi sum na yumbuk karuk, at imin mbiriga-o.

¹⁹Ereya-t mborosolat-nen yik eneyagaidnggal-e, Sebendeus ilirak Yakobus min owot Yoanes min na-ge keyane wanugwi sum panggarogolat e koma arem koreyak worakmu, eneyagaij-o.

²⁰Eneyarug-e, ereya na-net wene mbo onposola-ge, it mberen na-ge ineid Sebendeus min at ndegel ubugwi nap min e koma arem irit keya unpuruk, Yesus imin mbiriga-o.

²¹It na-ge mbirigarig-e o Kaperenaum wi wok yil nggwiga-o. Nde, we woragwi tarem Yesus-e Yawuri nap tepan yugwi ma nggwarik, ap mul ondosolat woragaij-o.

²²Nde, mul ondosola kuliga nab-e at-nen mul ondoso iri-ge imiri mbarak pidnak wene enaru nap-nen mul undugwi nggal-e lag-o. Are, amawi worak nap-nen mul undugwi nggal irit mul ondosola karuk, wi yiga-o.

²³Iri tarem-e Yawuri nap tepan yugwi ma iri me-ge kugi arem nggwid-nak nap mbi nggwarik-nen ene nggok pem yosolar-e:

²⁴“Yesus Nasaret nap wa-e. Kar-e ngge rak nunpugun-o? Nit lak tak nenpeyekluk lobok yigen-a? Kar-e an naru-o. Kar-e Mbal Pem Nagawan-nen kibil lobok yidnak karik lenak nap-net yusu-o” luk yij-o.

²⁵Yosoloma-ge, Yesus-nen ene amawi bem-et kugi na yak tosolar-e: “Kene lag-et ap yu arem-nen mbiri-o” luk yak tij-o.

²⁶Yak tosoloma-ge, kugi na mborosolar-e, ap iri na kendam polosolar-e, ene nggwa luk, ap na arem-nen mbirij-o.

²⁷Mborosoloma-ge, ap ereba pidsa wi langgu mbatluk, kin wok kerak mbogolar-e: “Yu-ge no mende-o? Wene yu-ge arig-er-o! At ene amawi bem kugi na ‘Mbiri-o’ yak tosola-ge, at-nen yidnag-et kuluruk, kugi ereba na mbirij-o” luk yiga-o.

²⁸Alama-ge, Yesus obog-e ndag-et nak Nggalilea wi pidsa wigak yij-o.

²⁹Iri lug-e, Yawuri nap tepan yugwi ma-nen mborogolar-e, Yakobus min Yoanes min inmin lug-e, Simon min Andereas min enma nggwiga-o.

³⁰Nggwiganggal-e, Simon owan na-ge embem wuloksa wiridnak me, mbinggirik worasoma karug-e, obog-e Yesus yak tiga-o.

³¹Yak togolikma-ge, Yesus na lobok luk, kwe na inggi tena buruk, mendak obosoloma-ge, embem wuloksa wiridnak na-ge lak yij-o. Iri lug-e, kwe na-ge it ndegel inpij-o.

³²O na ndamuk yosola, keyama nggwe-ge kugi worak nap min kugi enarem lin yidnak nap min wok unpuruk, Yesus eram lobok yiga-o.

³³O iri woragwi nap pidsa-nen tumende bem ndok wiriga-o.

³⁴Ndok worogola karug-e, kugi nin tak nan tak worak nap na ki rak onposolat, enarem lin yidnak nap na enarem-nen kugi kwarat wirik posolat, nde, kugi na-nen Yesus enaru me, “Kir-e kenne yurak pug-o” luk yak indij-o.

³⁵Kuplilasa, o kil posola, Yesus-e men luk yarik, tepan yekluk ap lak ma irit mbirij-o.

³⁶Mberamu-ge, Simon min anggamirak erep inmin-e Yesus ijok mbaluk mbiriga-o.

³⁷Mbirigarik, Yesus kagoluk-nen at yak togolar-e: “Ap pidsa-nen kat kogore yili-o” luk yak tiga-o.

³⁸Yak togoloma-ge, Yesus-nen it na yak ondosolar-e: “Nir-e siri nin me nin me korok endeba me mburuwog-o. An lobok yigi-ge Mbal Pem Nagawan-nen yidnak wene yak undurak pem lobok yidnak me, an-e mondok endeba me yak indil mbirimin-o” luk yak indij-o.

³⁹Iri lug-e, Yesus na-ge Nggalilea wi oboksa waring kasolar-e, Yawuri nap-nen tepan yugwi ma ya nggwilik aid wene yak indil waring kasolat, kugi wirik pil nosolat woragaij-o.

⁴⁰Ndigiril laso mbijap ebem yidnak nap mbi-ge Yesus eram lobok yarig-e, endaru yunggusa kore luk, Yesus emengen mbarosolar-e: “An mbijap ud yu nde ambut tak nuburak neberasolar-e, ambut tak nubugun-o” luk yak tij-o.

⁴¹Yak tosoloma-ge, Yesus na at abuwa-nen indi andi luk, inggi mbung tak puruk, at tena bosolat-nen yak tosolar-e: “Kat ambut tak kuburak iri-ge an nindingen-er-o” luk yak tij-o.

⁴²Yak tosola ereya na-net mbijap ud na lak luk, ambut yij-o.

⁴³Iri lug-e, Yesus-nen ap na nggomo amawisa wutluk, wirik pij-o.

⁴⁴Wirik posolat-nen yak tosolar-e: “Kar-e wene yu-ge ap misiger-o luk tet yak undurak pug-o. Are, tepan ombo-nen mbenat kubuwakluk, tepan ombo eram-et mbururag-o. Mbenat kobosola-ge, ap erep-nen ambut yamu-o luk yenggerak kubuwaklug-e, Musa-nen: ‘Mbal Pem Nagawan amanggim purag-o’ yidnak mende iri na-ge purag-o” luk yak tij-o.

⁴⁵Iri yak tij-et nde, at na mborosolar-e, at kwat ibidnak wene wigaril mberamu alama-ge, Yesus na-ge nam-et o silmu nggwigit lag-o. Are, ap lak ma irit woragaij-o. Alat nde, ab-e nin me nin me-nen at eram lobok yogolat nak woraiga-o.