Read Nduga MARAKUS 10 Bible Online

MARAKUS 10 - Nduga bible

MARAKUS 10

¹Yesus na iri me-nen mborosolar-e, o Yurea waring kil kil-e yi Yorodan eyak ele nggwe wok yosola-ge, ap kwarat tuguruk at eram ndok worogola-ge, at-nen-e mul ondoso na nggal-et mul indij-o.

²Mul ondosoma-ge, Parisi nap erep at eram lobok yogolat, at abut mbaruwokluk it-nen kin wok obogolar-e: “Ap-nen onkwe keya burag-e op, lak?” luk kin wok obogolikma-ge,

³Yesus-nen onggo it kin wok onposolar-e: “Musa-nen-e iri kwarurak wene-ge no kwarurag-o luk yak kindij-o?” luk kin wok onposoloma-ge,

⁴it-nen yogolar-e: “Musa-nen yosolar-e: ‘Ap-nen kwe keya bogolar-e, engga mbara wok turuk-nen keya burag-e konag-o luk yij-o’ ” luk yiga-o.

⁵Yogolikma-ge, Yesus-nen it yak ondosolar-e: “Kir-e kinndi tulubuk yu ala karuk, Musa-nen: ‘Iri kwarurag-o’ luk engga mbal kendamu-o.

⁶Alat nde, tel korosolat-net yi mende ndi mende ndak worosolar-e, Mbal Pem Nagawan-nen ap min kwe min ndak wat enpamu-o.

⁷Iri bem-e ap-nen eid ija keya unpuruk, ogwe min misiget nak kwat yogolar-e,

⁸it enmbereg-e enpe misiget kwat yusu-o. Iri alar-e, ir-e mberen-e lag-o. Alat nde, enpe misiget-nen yusu-o.

⁹Iri bem-e Mbal Pem Nagawan-nen misiget tak pidnak iri-ge ap-nen pinggirik purag-e mondok meya-o” luk yij-o.

¹⁰Yurug-e, it-nen-e ma mbirigarig-e at owosirak-nen wene iri na-ge Yesus na kin wok ibiga-o.

¹¹Kin wok obogolikma-ge, at-nen it yak ondosolar-e: “Ap-nen at ogwe keya buruk, nin kwe nde wanosola-ge, nanduk ogwe iri na imin-e mbabi-t worasu-o.

¹²Nde, iri nggal-et kwenen at un keya buruk, ap nin nde wanosola-ge, iri na mbabi-t yusu-o” luk yak indij-o.

¹³Nde, Yesus inggi-nen tena unpuwakluk, ap erep-nen-e li marik marik Yesus eram wok unpuruk lobok yiga-t nde, at owosirak-nen-e ap ereba na met inpiga-o.

¹⁴Met onpogolikma karuk, Yesus na isilepma luk, at owosirak yak ondosolar-e: “Li marik marig-e an neram lobok yuwag-o. Ap inndi-ge li marik yu inndi nggal kwat ma nap-net Mbal Pem Nagawan-nen tenagaidnak wi winde momtak nap-nen yili me, langgal eneyali meyog-o.

¹⁵An-e ndemeret yak kundusu-o. Ta-nen nde Mbal Pem Nagawan-nen tenagaidnak wi na li marik-nen wanugwi nggal wanili buk nab-e ar-e iri me mondok ngguwa bug-o” luk yij-o.

¹⁶Yurug-e, li marik marik na at inggi-nen manuksa tena unpuruk yarik, imbiringgat tak inpij-o.

¹⁷Yesus na mbururak sa nggwe mborosoma-ge, ap misik at eram puburak lobok yarik, at urugom endaru yunggusa kore luk-nen kin wok obosolar-e: “Mul Nondoso Nap, Konak Nap wa-e. Nurug-et woralik nalik wolmomtak waneyek-nen an-e ngge nde kwarimin-o?” luk kin wanij-o.

¹⁸Kin wanosoloma-ge, Yesus-nen at yak tosolar-e: “Kar-e noluk-nen konak nab-o yak nirigen-o? Ap misiget ter-o luk konak nap mbi-ge lag-o Konag-e Mbal Pem Nagawan ariget nag-o.

¹⁹Mbal Pem Nagawan-nen ‘Irit kwarurag-o’ yidnak wene-ge: ‘Ap wururak pug-o. Ap onkwe yeburak pug-o. Yariya wanurak pug-o. Kenesiget wene bem ap onpok purak pug-o. Ap onmbol pem ludtak pug-o. Keid kija-nen yidnak yidnak kwarurag-o’ luk yidnak wene iri-ge kar-e karu nar-o” luk yak tij-o.

²⁰Yak tosoloma-ge, at iri-nen yosolar-e: “Mul Nondoso Nap wa-e. An-e li marik pem-net wene iri-ge kwarosolat woraso-o” luk yij-o.

²¹Yosola-ge, Yesus-nen ap iri na yik karuk, abuwa kasoluk-nen yak tosolar-e: “kat-nen kwarurak mende-ge misiget nak keya bigen-o. Kat mburugundik kisilobulo pidsa onggo wanuruk, tol iri-ge insilobulo lak nap tembesa wok unduruk, lobok yosolar-e, an nimin ni-o. Iri yugundik pem-e, aid arem-nen silobulo kwarat wanugun-o” luk yak tij-o.

²²Iri wene yak tosola karug-e, at isilobulo kwarat me, at indi kabak luk, indi puru min-et mbirij-o.

²³Mborosoloma-ge, Yesus-nen at owosirak na yik eneyasolat-nen yak ondosolar-e: “Insilobulo worak nap-nen-e Mbal Pem Nagawan-nen tenagaidnak wi-ge nggesa nggal-nen ngguwa-o!” luk yij-o.

²⁴Yosoloma-ge, at owosirag-e wene iri na kulurug-e, wi yiga-t nde, Yesus-nen tuguruk yak ondosolar-e: “Nowosirak wa-e. It inndi silobulo nak yebet kali nab-e Mbal Pem Nagawan-nen tenagaidnak wi iri me nggurag-e angin kwarar-o!

²⁵Sapi wam-nen-e luruk erel uru nggwe nggurag-e te-t nde, insilobulo worak nap-nen Mbal Pem Nagawan-nen tenagaidnak wi nggurag-e angin-nen yusu-o” luk yij-o.

²⁶Yosoloma-ge, at owosirak-nen wi langgu mbarogolat-nen yak kerak mbogolar-e: “Iri ala-ge, ab-e ta nggal nak inmiri yuwa kali-o” luk yak kerak mbiga-o.

²⁷Yogolikma-ge, Yesus-nen it yik eneyasolat-nen yak ondosolar-e: “Ki nap-nen inmiri yurag-e meya-t nde, Mbal Pem Nagawan-nen perak nde inmiri yurag-e ndak-net yusu-o. Mbal Pem Nagawan-nen yi mende ndi mende kwarurak iri-ge pidsa ndak-nen yusu-o” luk yak indij-o.

²⁸Yak ondosoloma-ge, Peterus-nen Yesus yak tosolar-e: “Yu nde ki-o. Nir-e kat kimin nurak pem yi mende ndi mende keya bige-o” luk yak tij-o.

²⁹Yak tosoloma-ge, Yesus-nen yosolar-e: “An-e ndemeret yak kundusu-o. An nebem ala na, aid wene bem ala na ap-nen at uwi nde owe owot nde iridtak nde eid ija nde ilirak nde eyabu nde keya buwa nab-e,

³⁰yawo-nen perak terak mena winde yosolar-e, uwi min owe owot min iridtak min eid ija min ilirak min eyabu min-e winde yuwa-t nde, iri-nen andi bandi min-et wanuwa-o. Nde, abok-nen perak nde unlug-et pem-et wolmomtak elem irit wanuwa-o.

³¹Alat nde, ap kwarat-nen yawo yu-nen nandug-et yili nab-e abok ma-o. Nde, yawo abok yili nab-e nanduk ma-o” luk yij-o.

³²Yesus min at owosirak min-e Yerusalem nggwe lagolar-e, Yesus na-ge it lit eneyaruk lasola-ge, owosirak na inndi nggwirik yiga-o. Nde, it inmbirik mbiriga nap-nen na kwiye kwarat kaiga-o. Kagolikma-ge, Yesus na-ge owosirak na lobok yer-o luk enarik mu-nen at kwat uburak wene yak indij-o.

³³Yak ondosolar-e: “Yu nde ker-o. Nir-e Yerusalem lali-o. Nde, Ap Ambara an-e tepan omborak nagawan nagawan nde imiri mbarak pidnak wene enaru nap nde ininggem nubuwama-ge, it-nen-e an nuruwakluk niminep wesera enlem nin nap ininggem nubuwa-o.

³⁴Iri lug-e, it-nen-e an pesel nobogolat, wusi tebal nobogolat, linggamburok norogolat tak nuburuk, e lang pang tak pem nuruwa-t nde, mberen naruk men yimin-o” luk yak indij-o.

³⁵Iri lug-e Sebendeus ilirak Yakobus min Yoanes min Yesus eram lobok yigarik,at yak togolar-e: “Nggomo Nondoso Nap wa-e. Kat-nen nit kwat nunpurak ninndi peraidnak misik worasu-o” luk yak tiga-o.

³⁶Yak togolikma-ge, Yesus-nen it yak ondosolar-e: “An-nen kwat kunpurag-e no mende nde yigeb-o?” luk yak indij-o.

³⁷Yak ondosoloma-ge, it-nen at yak togolar-e: “Kat nagawan yosola tarem-e nir-e kat kinggi kigit nggwe, kware nggwe koreyak nunpurag-e nindingen-o” luk yak tiga-t nde,

³⁸Yesus-nen it yak ondosolar-e: “Kit-nen nggi yigep iri-ge kenaru buk-nen yigeb-o. Andi bandi kagwi mende yimbe arem kenanggo an namin iri erep kit-nen norag-e ndag-a? Nde, an andi bandi kamin mende iri kit kudtag-e ndag-a?” luk yak indij-o.

³⁹Yak ondosoloma-ge, it-nen yogolar-e: “Kwarul-er-o” luk yiga-o. Yogolikma-ge, Yesus-nen it yak ondosolar-e: “Andi bandi kagwi mende yimbe arem kenanggo namin iri-ge kir-e ndemeret nonggolat, nde, andi bandi kamin mende iri na kagolat yugub-et nde,

⁴⁰an ninggi kigit nggwe, kware nggwe kore yurak iri-ge an nebem-e lag-o. Iri me kore yurak iri-ge Mbal Pem Nagawan nak-nen koreyak unpuwa-o” luk yak indij-o.

⁴¹Wene iri na kulurug-e, Yesus owosirak enpe sepulu ereya-nen-e insilepma-ge Yakobus min Yoanes min enpem piga-o.

⁴²Pogolikma-ge, Yesus-nen owosirak wene mbo unpuruk, it yak ondosolar-e: “Mbal Pem Nagawan enaru buk nap pemerinta-nen-e it-nen tenagaidnak wi woragwi nap teberak onpogolat, nde, it ap yok nggok-nen na it enne amawi bem teberak unpugwi iri-ge kir-e kenaru nar-o.

⁴³Alat nde, kir-e iri nggal kwarurak pug-o. Are, ta-nen nde kit kennggendumu yu me ap nggok yurak perasolar-e, kit ndegel konposo nap irit kwat mag-o.

⁴⁴Nde, ta-nen nde kit kennngendumu nandug-et yidnak nap kwat momtak perasolar-e, ap pidsa ndegel onposo nap kwat mag-o.

⁴⁵Nde, Ap Ambara-ge at ndegel ubuwakluk logok yij-e lag-o. Are, ap ndegel onposolat, ap pidsa inmiri yekluk at iminep wesel korayekluk lobok yamu-o” luk yij-o.

⁴⁶Ir-e o Yeriko wok yiga-o. Wok lug-e, Yesus min at owosirak min ap kwarat min inmin lug-e Yeriko-nen mburukmu-ge, Timeus ambara Mbatimeus, erengen ngguru na-ge tu mbanggo nggwe koreyak woralar-e, silobulo nggi tenak woragij-o.

⁴⁷Worasoma-ge, “Yesus Nasaret nap na lobok yusu-o” yogola kulurug-e, at iri na-nen yosolar-e: “Yesus, Ndaud Ambara wa-e. An nabuwa ki-o” luk ene ngguloksa-t yij-o.

⁴⁸Yosola-ge, it ap kwarat-nen “Kene meyog-o” luk yak tiga-t nde, at-nen-e ebem lud nde ene ngguloksa-t yosolar-e: “Ndaud Ambara wa-e. An nabuwa ki-o” irit yosolat woragaij-o.

⁴⁹Nde, Yesus na ndong luk-nen yosolar-e: “At iri wene mbo ber-o” luk yosoloma-ge, it-nen ap erengen ngguru na yak togolar-e: “Kwiye lag-et men min-o. Wene mbo kubusu-o” luk yak tiga-o.

⁵⁰Yak togolikma-ge, at na-ge at usum na yonggora mbo buruk, ndaget nak men luk, Yesus eram mbirij-o.

⁵¹Mborosola-ge, Yesus-nen at yak tosolar-e: “An-nen no kwat kuburak perasu-o?” luk kin wok obosoloma-ge, ap erengen ngguru-nen yosolar-e: “Nggomo Nondoso Nap wa-e. An nerengen-nen kudtak irit nindingen-o” luk yij-o.

⁵²Yosoloma-ge, Yesus-nen at yak tosolar-e: “Kat kindi angin tubu yigen iri na-net ki rak kebamu me, mbiri-o” luk yak tosoloma ereya na-net erengen-nen kaso kwat luk, Yesus imin mbirij-o.