Read Nduga MARAKUS 11 Bible Online

MARAKUS 11 - Nduga bible

MARAKUS 11

¹Yesus na owosirak inmin Yerusalem panggo panggo Saitun ndobo ayo bem o siri Mbetpage min Mbetania min wok yogolar-e, Yesus-nen at owosirak mberen-e nandug-et ndimirik onposolat-nen

²yak ondosolar-e: “O siri mondog-et nggugup sa iri me mberer-o. O iri me wok yugupnggal-e, keledai wam marik ap-nen ebem kore yugwi buk irit yilik worasoma, kagub-o. Karug-e, wesera waruk lobok yer-o.

³Nde, ap-nen nde: ‘Kir-e noluk-nen keledai wam iri wisitli-o?’ luk yak kondogola-ge, kit-nen-e: ‘Nagawan Indo-nen kwarurak mbi worasola me, waruk mbitli-o. Tuguruk yanem-et pil lobok yuwa-o’ luk yak ender-o” luk yij-o.

⁴Yak ondosoloma-ge it mberen iri na mbirigarik, keledai wam marik na-ge tumende bem tu mbanggo ma yilik worasoma, kaiga-o. Karug-e tari wisiriga-o.

⁵Wosorogolikma-ge, it iri me mendak woraidnak nap na-nen it kin wok onpogolar-e: “Kir-e no kwaruwokluk-nen keledai wam marik iri-ge wisitli-o?” luk yiga-o.

⁶Yogolikma-ge, it na-nen Yesus-nen yak indidnak wene iri na yak ondogola-ge, ap ereba na-nen keledai wam na waruk mburuwakluk keya inpiga-o.

⁷Keya onpogolikma-ge, it na-ge keledai wam marik na Yesus eram waruk mbirigarig-e, it unsum yonggora ombolwak pem ndamak pogolikma, Yesus na-ge keledai wam marik na ombolwak pem kore yil lagaij-o.

⁸Kore yosola-ge, ap kwarat-nen it unsum yonggora tulabiyem ndamak pogolat, ap erep-nen-e yapmu-nen kalidnak e sumbul tulabiyem liring kil mborogolat yiga-o.

⁹Iri lug-e, it nanduk mbitli nap min inmbirik lobok yili map min-nen ene ngguloksa-t yogolar-e: “Mbal Pem Nagawan erembel wanuwog-o! Nagawan Indo unu bem lobok yusu nap yu kek tak puwog-o!

¹⁰Nit nonmbo Ndaud-nen tenagaidnak wi lobok yuwa iri-ge kek tak puwog-o! Kek tak woraso Mbal Pem Nagawan nak erembel wanuwog-o!” luk yiga-o.

¹¹Nde, Yesus na-ge Yerusalem wok luk, Mbal Pem Nagawan uwi worak ma nggurug-e, pidsa mbenaril nosoma, o keyama alama-ge, owosirak duabelas na inmin luk o Mbetania mbirij-o.

¹²Nde, kub-e it na Mbetania-nen lobok yogolar-e, Yesus na nere ebem wok yij-o.

¹³Nde, erepma-nen e ara misik engga miri tup tak yik kil mbutlug-e, engen mbi yid, lak? lug-e korok korok mberarik, limbinidnggal-e, engen poso tarem awo me, engen pigit lak, engga nak miri tup tak kagaij-o.

¹⁴Karug-e, yesus-nen e na yak tosolar-e: “Kengen pigit lak yugunmu, ap-nen kengen mondok ninggit lak mag-o” luk yak tosola, at owosirak-nen kuliga-o.

¹⁵Iri lug-e, it na-ge Yerusalem wok lug-e, Yesus na-ge Mbal Pem Nagawan ama nggwarig-e, onggo pugwi nap min onggo wanugwi nap min pendaga sera wirik onposolat, uwang nden penden yugwi nap-nen idnak tol ondoro min towe nggwende onggo wanugwi nap-nen koreyak woragwi ondoro min nden yaga keya bosolat-nen

¹⁶it yak ondosolar-e: “Kir-e Mbal Pem Nagawan uwi mborom nggwe yu-ge yi mende ndi mende waruk lobok yurak pug-o” luk yak indij-o.

¹⁷Yak unduruk, Yesus-nen ap ereba na mul ondosolar-e: “Mbal Pem Nagawan engga bem-e yu nggal mbarak worasu-o: Mbal Pem Nagawan-nen yosolar-e: ‘An nuwi-ge ap pidsa enmanggim tepan yugwi ma-o luk yidnak worasu-o’ luk yij-et nde, ‘kit-nen-e at uwi-ge yariya wanugwi nap ondoro nggal tak pili-o’ luk mul indij-o.

¹⁸Mul ondosoloma-ge, tepan omborak nagawan nagawan min imiri mbarak pidnak wene enaru nap min-e Yesus-nen yid wene kuluruk, at-nen mul indidnak wene bem ap pidsa-nen wi langgu mbarugwi ala karuk it-nen-e at ugwiye-nen at wuruwokluk tu kore yiga-o.

¹⁹Iri luk, o ndamuk yosola-ge, Yesus owosirak inmin-e o siri iri keya buruk mbiriga-o.

²⁰Nene luk kub-e, Yesus owosirak inmin tula mborogolar-e, e ara na-ge emengen min-et obok umbuk yidnak kaiga-o.

²¹Karug-e, Yesus-nen e iri yak tid wene na Peterus-nen yebet karuk, Yesus tak tosolar-e: “Nggomo Nondoso Nap wa-e. Kat-nen imbiri lamut tak pigen e ara na-ge umbuk le yamu yu ki-o!” luk yak tij-o.

²²Yak tosoloma-ge, Yesus-nen it yak ondosolar-e: “Mbal Pem Nagawan ebem nak kinndi angin tubu yer-o.

²³Ndemeret kit-nen nde ndobo yu yak togolar-e: ‘Kat kondomok konoksa yi koma arem tabak yil mbiri-o’ luk yak togolat-nen kit kinndi mberen min-e lak, are, kit-nen yak tugup iri-ge ‘Ndemeret kwat ma-o’ peraruk-nen yak togola-ge, kwar-et ma-o.

²⁴Iri bem-e, an-nen yak kendeyeg-o: Kit-nen tepan pem nggi yugup tengge-ge ‘Mbal Pem Nagawan-nen abu wok nendamu-o’ peraruk, kinndi angin tubu yugup pem-e wok kunduwar-o.

²⁵Nde, kit-nen tepan yuwokluk yukmu, ap-nen meya rak kinpidnak pem kinndi puru yidnak mbi worala-ge, Kineid aid arem woraso-nen kit meya yidnak amberam tak puwakluk, kit-nen na meya rak kinpidnak iri-ge kenmberam tak per-o.

²⁶(Alat nde, kit-nen nde ap nin-nen meya rak kinpidnag-e kenmberam tak pigit lak ala-ge, Kineid aid arem woraso-nen na kit meya yidnag-e amberam tak puwa bug-o)” luk yak indij-o.

²⁷Iri luk, Yesus owosirak inmin-e tuguruk Yerusalem lobok yiga-o. Lobok yigarig-e, Yesus na-ge Mbal Pem Nagawan uwi worak ma waring kasola-ge, tepan omborak nagawan nagawan min imiri mbarak pidnak wene enaru nap min ogore yidnak nap min-e at eram lobok luk,

²⁸at kin wok obogolar-e: “Kar-e ta amawi bem-nen yi kwatlik ndi kwatlik kwarusu-o? Nde, ta-nen yi mende ndi mende kwarurak iri amawi wok keramu-o?” luk yak tiga-o.

²⁹Yak togolikma-ge, Yesus-nen it yak ondosolar-e: “An-nen na kit kin wok kinpimin-o. Nde, kit-nen nde wene iri onggo yogola-ge, an-nen-e iri amawi bem-nen an-e yi kwatlik ndi kwatlik kwarusu-o luk yak kindimin-o.

³⁰Yoanes-nen ap yi mat onposo iri-ge no amawi bem-nen yi mat onposo-o? Mbal Pem Nagawan amawi bem-nen lak? Are, nggweyak ma nap enmawi bem-nen-a? Onggo yak nerer-o” luk yij-o.

³¹Yosoloma-ge, it na yak kerak mbogolar-e: “Nit-nen nde: ‘Mbal Pem nagawan amawi bem-nen-o’ yulndig-e, at-nen yak nondosolar-e: ‘Iri ala-ge, kir-e noluk-nen Yoanes ebem kinndi angin tubu yigit lak yigeb-o?’ luk yak nunduwa-o.

³²Alat nde, nit-nen nde: ‘Nggweyak ma nap enmawi bem-nen-o’ yurag-e it ap pidsa-nen-e: ‘Yoanes iri-ge ndemeret Mbal Pem Nagawan ene lomboksa yoso nab-o’ luk eberagwi me-o” luk iri-ge ap ereba na inndi aye-nen larok yiga-o.

³³Iri perarug-e, it-nen Yesus yak togolar-e: “Nir-e nenaru bug-o” luk yogolikma-ge, Yesus-nen it yak ondosolar-e: “Iri ala-ge, an-nen-e iri amawi bem-nen yi kwatlik ndi kwatlik kwarusu-o luk yak kindimin pug-o” luk yak indij-o.