Read Nduga MARAKUS 13 Bible Online

MARAKUS 13 - Nduga bible

MARAKUS 13

¹Yesus na-ge Mbal Pem Nagawan ama-nen mbepme mborosola-ge, at owot misik-nen at yak tosolar-e: “Mul Nondoso Nap wa-e. O wiriga yeba ki-o. Kerep na amawi worak nak, o na konak nak yeba ki-o!” luk yij-o.

²Yosoloma-ge, Yesus-nen at yak tosolar-e: “Kar-e o nggulok wiridnak yeba nde kasu-a? Kerep kona mendagil laidnak yeba-ge iniksa kona wolma bug-o. Pidsa mijara lak tak puwa-o” luk yak tij-o.

³Yesus-e Saitun ndobo bem kore yosolar-e, urugwe-ge Mbal Pem Nagawan uwi ambigit nggwe rak puruk koreyak worasoma-ge, Peterus min Yakobus min Yoanes min Andereas min na-nen enarikmu-nen kin wok obogolar-e:

⁴“Kat yigen na-ge mepme tarem-nen kwaruwa-o? E! Yawo kwat momtak tarem-e panggu yusu-o luk yenggerak purak mende-ge no bem-nen yenggerak purag-o? Yak nindi-o” luk yiga-o.

⁵Yogolikma-ge, Yesus-nen it yak ondosolar-e: “Ap-nen kit konmbol pem lujwa naru, kwil kwalsa wolmer-o.

⁶Ap kwarat-nen an nggal kwasa lobok yogolar-e, ‘Kerisut na an-er-o’ yogolar-e, ap kwarat onmbol pem lujwa-o.

⁷Wim ngarogolat san ene tup min wim kirimbi min kulurug-e, wendet yurak pug-o. Iri-ge ndemeret kwat ma-t nde, worok tak purak tarem panggo yosolar-nen kwat ma-ge lag-o.

⁸Nin nap enlem-nen-e nin nap enlem min wim mbarogolat, nagawan misik-nen tenagaidnak wi woragwi nap-nen-e nagawan misik-nen tenagaidnak wi woragwi nap inmin wim mbarogolat, o nin me nan me o lele yosolat, nogoro kwarat mbud yosolat ma-o. Alat nde, iri oboksa-ge kwami-nen li ndaguwokluk yane witli iri nggal anggun panggun kenpem mbumom iri na tel korosolat-nen kwat ma-o.

⁹Alat nde, kir-e mondok kwara wolmer-o. Tenaga lit kunpuruk mburuwarik, wene mbarugwi nap ininggem konpogolat, Yawuri nap tepan yugwi ma-nen mbut kondogolat, an nebem ala, pemerinta nap min nagawan nagawan min ininggem kunpuwa-o. Nde, iri kunpuwa iri-ge an-nen yidnak wene it kenggera yak undurak tarem nanongga-nen yusu-o.

¹⁰Nde, aid wene na-ge mondok nandug-et ap pidsa yak undurag-o.

¹¹Nde, it-nen tena kunpuruk, ap enpem wene mbarugwi sa lit kunpuruk mborogola-ge, ‘An-e no yimin-o?’ luk kunmud kudtak pug-o. Kat-nen yurak tarem wok yosola-ge, ereya-net kemendam tak pidnak irit yurag-o. Nde, kat-nen yugun iri na-ge kat-nen-e lag-o. Are, Konak Indi-nen kemendam tak pidnak wene-nen yusu-o.

¹²Onowe onowot-nen nde, onowe onowot na unduwakluk inminep wisirik pogolat, ineidtak-net nde, inlirak unduwakluk inminep wisirik pogolat, inlirak-net nde ineid iniyarak insilepma enpem puruk, ineid iniyarak na unduwakluk inminep wisirik pogolat ma-o.

¹³Kir-e an nimin nugwi nap me, ap pidsa-nen insili rak kunpuwa-o. Alat nde, ta-nen nde momak puruk irit worasoma, worok tak puwa tarem wok ma nab-e imiri yuwa-o.

¹⁴Kit-nen yik kagolar-e, lak tak onposo mende meya na imiri worak at wolmomtak puk sa-t nde, men yosola kagub-o. (Engga yu kasu nab-e no yosolat-nen yij-o luk kwara yebet kudtag-o.) Iri tarem-e Yurea woragwi nab-e mondok kwiye ndobo bem mbururag-o.

¹⁵Nde, erema wolma nab-e isilobulo silabaga wolma na-ge o ma wil nggurak pug-o.

¹⁶Nde, yapmu wolma nab-e tuguruk usum wil mbereyekluk, ma mbirigit lak mag-o.

¹⁷Iri tarem-e kweyap enabila wolma min li kamo mak undugwi min-e enabuwa-o!

¹⁸Nde, o sumbat tarem-nen kwat ma naru, tepan yogolat wolmer-o.

¹⁹Iri tarem-e andi bandi kagwi mende mbuma iri-ge nanduk Mbal Pem Nagawan-nen nggweyak yu ndak wiridnak kuri-net yawo kuri-ge andi bandi iri nggal-e kagwi-ge bug-o. Nde, woragolat nagolat na andi bandi iri nggal-e wok ma bug-o.

²⁰Nde, Nagawan Indo-nen iri yurak tarem nde poro rak pigit lak nggal-e, ap misiget tet imiri yelep pug-o. Alat nde, at indi-nen len inpidnak nap enmanggim-e iri yurak tarem-e poro rak pij-o.

²¹Iri tarem ap-nen kit yak kondogolar-e: ‘Kerisut-e yu-o Kerisut-e iri-o’ luk yak kondogola-ge, ndemerer-o luk yebet kudtak pug-o.

²²Enesiget siget Kerisut min enesiget siget Mbal Pem Nagawan ene lomboksa yugwi nap min-e men ma-o. Nam yogolar-e, Mbal Pem Nagawan ilirak na enmberam ludtak ndak ala-ge, enmberam lujwoklug-e, wi yurak mende min kwiye worak mende min kwaruwa-o.

²³Iri bem-e, kwil kwalsa wolmer-o. Awo kwat yigit lak ma-net yak kindigi nar-o.

²⁴Nde, anggun panggun tarem na worarug-e, molengen ndamuk yosolat, waneya na eyaya lak yosolat,

²⁵wonaru na mbal pem-nen yap kap mbuwasolat, teram amawi rak poso mende na nari wari mbosolat ma-o.

²⁶Iri tarem-e, Ap Ambara-ge kek tak amawi worak irit nggan nggan arem lobok yosola, kujwa-o.

²⁷Lobok yosolar-e, at ilirak o nggweyak unggut empat nggwe-nen na o nggweyak erep woroksiyem min mbal erep worksiyem min-nen na oboksa ndok wat unpuwaklug-e, aid nap iri wirik unpuwa-o.

²⁸E ara-nen kwaroso mende-ge kwara kenaru mer-o. Angga peyekluk ambarok posola-ge, E! Yawo o kibi yusu-o luk peragwi nar-o.

²⁹Iri nggal-et wene yak kindigi abam nggwe ya kwat yosola-ge, E! At lobok yurak tarem komo panggo yusu-o luk yebet ker-o.

³⁰Kenaru mer-o. Ap yawo worali yu wat yigit lak ma-net wene yu-ge kwat ma-o.

³¹Mbal min nggweyak min lak ma-t nde, an-nen yidnak wene-ge lag-e ma bug-o.

³²Alat nde, iri kwaruwa tarem min jam min ap misiger-o luk tet enaru bug-o. Aid arem woragwi aid nap-nen na enaru buk, Ambara-nen na aru bug-et nde, Neid nak aru-o.

³³At lobok yurak tarem-e kenaru buk me, kunlug-et woragolat, kwil kwalsa wolmer-o.

³⁴Iri-ge yu nggal-nen yusu-o. Ap misig-e at uwi keya buruk, o nin sa mbereyeklug-e, at ndegel ubugwi nap-nen enarik tak wanogolat wolmomtak mende enpem puruk, tumende yik karok woraso nap iri na yak tosolar-e: ‘Kwara yik karok worasolar-e, kurug-et wolmin-o’ luk yak turuk, mbirij-o.

³⁵O winde iri-ge keyama lak, nggiringgendumu lak, o nda nda lak, kubu kabu lak, at lobok yuwa tarem-e kenaru buk me, mondok yik karok wolmer-o.

³⁶At mimo lobok yosolar-e, kit nene yukmu, kiniyujwa iri-ge mondok meya-o.

³⁷‘Yik karok wolmer-o’ luk yak kundusu yu-ge ap pidsa min-et yak undusu-o” luk yak indij-o.