Read Nduga MARAKUS 2 Bible Online

MARAKUS 2 - Nduga bible

MARAKUS 2

¹Iri rak puruk, siyak woraruk nggal-e, Yesus na tuguruk Kaperanaum wi wok yij-o. Wok yosoloma-ge, “Yesus na-ge worasu-o” luk obok wigariga-o.

²Wigarogolar-e, ap kwarat ndok worogolar-e, o ma-nen tumende bem-nen ap-nen yebet nggoro yikma-ge, Yesus-nen aid wene yak ondosolat worasoma-ge,

³ap kambung puk tak woraso nap misik ap enpe empat-nen Yesus eram waruk lobok yiga-o.

⁴Waruk lobok yigarig-e, ap kwarat yebet ngono rak me, Yesus eram panggosa pil nggurak meya alama-ge, it na-ge o ngguwa bem lagoluk, Yesus worasu parosa o ngguwa na mijara uru na nggwe kambung puk tak woraso nap na-ge mbinggirik iniksa-t kere nggijangsa pil mbiga-o.

⁵Pil mbogoloma, Yesus-nen it ereya na lik eneyagaidnggal-e, it inndi angin tubu yidnag-e ija-t karug-e, kambung puk tak woraso nap iri yak tosolar-e: “Nambara wa-e. Kat meya yidnag-e namberam tak pigi-o” luk yak tij-o.

⁶Yak tosoloma-ge, iri me koreyak woraidnak imiri mbarak pidnak wene enaru nap-nen enarem peragolar-e:

⁷“At yu-ge noluk-nen wene yu nggal yusu-o? Mbal Pem Nagawan obok pid irir-o! Iri yurak nab-e Mbal Pem Nagawan arig-et nak yu-t nde-o” luk peraiga-o.

⁸Eberagola ereya na-net Yesus-nen it inndi-nen yebet kali iri na karuk, it yak ondosolar-e: “Kir-e noluk-nen kinndi arem iri nggal perali-o?

⁹Kambung puk tak woraso nap yu yak turak ndag-e ngge-o? ‘Kat meya yidnag-e namberam tak pigi-o’ yak turak nde ndak, lak? Are, ‘Men yugundik, kat nene yoso kondoro iri kud turuk, mbiri-o’ yak turak nde ndag-a?

¹⁰Alat nde, ki nap ennggendumu-nen ap meya yidnak amberam tak purag-e Ap Ambara inggem pidnak worasu-o luk yenggerak kabog-o” luk yak unduruk, at-nen kambung puk tak woraso nap na yak tosolar-e:

¹¹“Kar-e men luk, kat nene yoso kondoro kud turuk, kama mbiri-o yak kurusu-o” luk yak tij-o.

¹²Iri yak tosola ereya na-net ap kwarat ereba na inmbiri bem at yu na men luk, at nene yoso ondoro kud turuk, mbirij-o. Mborosola-ge, it oboksa-nen wi langgu mbarogolar-e: “Nir-e yu nggal-e kagwi bug-o” luk Mbal Pem Nagawan erembel waniga-o.

¹³Yesus na tuguruk Nggalilea koma eyak pem mborosola-ge, ap kwarat at eram lobok yogola-ge, at-nen mul indij-o.

¹⁴Iri luk, Yesus na mborosolat-nen yik kagaidnggal-e, Alpius ambara pemerinta enmanggim tol ndok woroso nap Lewi iri-ge tol ndok wurugwi o ma koreyak worasoma, yik kagaij-o. Yik karug-e, Yesus-nen yak tosolar-e: “Nenmberek mburuwok-nen lobok yi-o” luk yak tosola ereya na-net Lewi na men luk, at imin mbirij-o.

¹⁵Iri rak puruk, Yesus na mberarik, Lewi ama-nen nunggwi mende nasola-ge, at imin mbiridnak pemerinta enmanggim tol ndok wurugwi nap kwarat min ap pidsa-nen meya yugwi nab-o luk enperagwi nap min-e totno Yesus owosirak inmin mburu ningga-o.

¹⁶Nonggola-ge, it Parisi nap imiri mbarak pidnak wene enaru nap erep-nen kaiganggal-e, Yesus na-ge meya yugwi nap min pemerinta enmanggim tol ndok wurugwi nap min mburu totno nonggola eneyarug-e, it-nen at owosirak na kin wok onpogolar-e: “At yu-ge noluk-nen meya yugwi nap min pemerinta enmanggim tol ndok wurugwi nap min mburu totno nili-o?” luk kin wok inpiga-o.

¹⁷It-nen yidnak wene Yesus-nen kuluruk yarik, it yak ondosolar-e: “Ap ki-nen-e ndoktet ukwe-ge lag-o. Are, kugi worak nap-net ukwe-o. An-e lud tak nak woragwi nap iri wene mbo inpil lobok yukmu-ge lag-o. Are, meya yugwi nap irit wene mbo enpeyekluk lobok yukmu-o” luk yak indij-o.

¹⁸Misik tarem-e ap yi maroso nap Yoanes imin nugwi nap min Parisi nap min-e mburu ninggit lak woragola-ge, ap erep lobok yigarik-nen Yesus kin wok obogolar-e: “Noluk-nen ap yi maroso nap Yoanes imin nugwi nap min Parisi nap inmin nugwi nap min-e mburu ninggit lak we worali-t nde, kat kimin nugwi nab-e mburu ninggit lak, we worali bug-o?” luk kin wok ibiga-o.

¹⁹Kin wok obogolikma-ge, Yesus-nen wene onggo yosolar-e: “Kwe wanogolat sakwi tarem iri me nggid yidnak nab-e kwe wanurak nap inmin worasola-ge, mburu ninggit lak, we woragwi-a? Lag-o. Nunggwi nar-o.

²⁰Alat nde, kwe wanurak nap it ennggendumu-nen wok uburak tarem-e lobok yuwa-o. Iri tarem-nen perak nde, ir-e mburu ninggit lak, we wolma-o.

²¹Ap misiger-o luk tet-nen-e sum umbuk iri na bem sum ngger-e panggaroso bug-o. Nde, sum umbuk iri na bem sum ngget panggarosola-ge, sum umbuk iri na nggoksa menna ndelep yoso-o.

²²Nde, iri nggal-et apnen-e anggut engen amburu ngger-e wam aboro yimbe taro iri arem woranggasa pil nggugwi bug-o. Nde, woranggasa pil nggogola-ge, anggut engen amburu ngget iri-nen wam aboro yimbe taro iri na tugwak yuwa-o. Tugwak yosolar-e, anggut angen amburu na min yimbe na min meya sa labuk ma-o. Alat nde, anggut engen amburu ngget iri-ge yimbe ngget arem-et woranggasa purag-o” luk yij-o.

²³We woragwi tarem misik pem-e Yesus na-ge mbato yagaidnak nggwe mborosola-ge, at owosirag-e at imin mborogolar-e, mbato mbaril mbaril mbiriga-o.

²⁴Mbato mbarogolikma karuk, Parisi nap-nen Yesus kin wok obogolar-e: “Ki-o. We woragwi tarem-nen kwarurak pug-o luk yidnak mende yu noluk-nen kat kowosirag-e kwatli-o?” luk kin wok ibiga-o.

²⁵Kin wok obogolikma-ge, Yesus-nen wene erep nggarosolar-e: “Engga bem-e Ndaud-nen kwaridnak iri-ge kir-e kagwi bug-a? At min at imin nugwi nap min-e nunggwi mende lak me, nere alama,

²⁶Abiyasat na-ge tepan ombo nagawan worasola tarem-e at Ndaud-nen Mbal Pem Nagawan ama nggwarik, Mbal Pem Nagawan amanggim pidnak oroti na ninggij-o. Nde, oroti ninggid iri-ge we nap-nen nunggwi bug-o. Tepan ombo nak-nen nunggwi oroti-t nde, at nasolat, at imin nugwi nap mak indid nar-o?” luk yak indij-o.

²⁷Yak unduruk, Yesus-nen it yak ondosolar-e: “We woragwi tarem iri-ge ap enmanggim lenak pij-o. Nde, ap ndak worak inpid iri-ge we woragwi tarem amanggim ndak worak inpigit lag-o.

²⁸Iri bem-e we woragwi tarem iri-ge Ap Ambara inggem pidnak-nen yusu-o” luk yak indij-o.