Read Nduga MARAKUS 6 Bible Online

MARAKUS 6 - Nduga bible

MARAKUS 6

¹Yesus na o iri me keya buruk, at elem ma mborosola-ge, owosirag-e imin mbiriga-o.

²Mbirigarig-e, we woragwi tarem ar-e Yawuri nap tepan yugwi ma nggwarik, it nggomo ondoso tel korosoma-ge, ap kwarat iri me woraiga-o. Nde, at-nen mul ondoso iri kulurug-e, ir-e wi langgu mbarogolat-nen kin wanogolar-e: “At-nen yusu wene yu-ge ngge me-nen wanidnag-o? At indi nggat yu nggal yu-ge nggeba-nen aru yidnag-o? Nggesa-nen kwiye worak mende yu nggal yu-ge at inggi-nen kwarusu-o?

³At yu-ge o woroso nap, Maria ambara, Yakobus min Yoses min Yuras min Simon min onowe, at owosirak li kwami na nit ninmin worali iri-ge lak kaigeb-a?” yogolug-e, Yesus na insili rak piga-o.

⁴Insili rak pogola karug-e, Yesus-nen it yak ondosolar-e: “Mbal Pem Nagawan ene lomboksa yoso nab-e nin sa-nen-e kek tak ubugwi-t nde, at ambil ama, imi ambara, owe owosi ennggendumu-nen-e at kek tak ubugwi bug-o” luk yak indij-o.

⁵Yak undurug-e, iri me-nen-e at-nen kwiye worak mende misiger-o luk tet kwarigit lag-o. Are, ap kugi worak we wonarak nak at inggi-nen tena unpuruk, ki rak inpij-o.

⁶Nde, it inndi angin tubu yigit lak ala karuk, Yesus-nen wi yij-o. Iri luk, Yesus na-ge o siri marik marik ereba na ya wok nosolar-e, aid wene mul indil nij-o.

⁷Iri luk, at-nen at owosirak na yonggo unpuruk, ir-e mberen lombok mberen lombok wirik onposolar-e, it-nen kugi meya iri na wirik puwakluk amawi wok unduruk,

⁸at-nen wene enpem posolar-e: “Kir-e tula mborogolar-e, yi mende ndi mende wanurak pug-o. Wangun nak wanurag-o. Nde, mburu min kot manik min uang min waruk mbururak pug-o.

⁹Nde, kunuwok sum yururag-et nde, kenpe sum mberensa yururak pug-o” luk yak indij-o.

¹⁰Yak unduruk yarik, wene erep yak ondosolar-e: “O siri misik me-nen nde tena konpogola-ge, o iri me-t worakmu, mborogolat-net keya burag-o.

¹¹Alat nde, kit mburugupndik, o iri nap-nen wok kinpigit lak, kenne na kuligit lak ala-ge, o iri me-nen nde kit mborogolar-e, it inndi wanuwakluk, kit kunuwok liri-ge iri me pil karuk, mbururag-o” luk yak indij-o.

¹²Yak ondosoloma-ge, it mborogolat-nen ap mul ondogolar-e: “Kit meya yidnak keya buruk, kondok yer-o” luk yak indil mbiriga-o.

¹³Iri kwarogolar-e, kugi kwarat wirik pogolat, ap kugi worak enpem amburu kilik pogolat ki rak onpogolat woraiga-o.

¹⁴Yesus obog-e wigaril mbiridnak me, Nagawan Erores-nen at obok pidsa kulij-o. Ap erep-nen yogolar-e: “Yoanes ap yi maroso nap wat yid na uruk yarik-nen kwiye worak mende iri kwarusu-o” luk yiga-o.

¹⁵Nde, it erep-nen yogolar-e: “Lag-o. Elia-nen yusu-o” luk yiga-o. Nde, it erep-nen yogolar-e: “Lag-o. Nanduk woragwi Mbal Pem Nagawan ene lomboksa yugwi nap misik nam yarik-nen yusu-o” luk yiga-o.

¹⁶Iri yogola, Erores-e kulurug-e, at-nen yosolar-e: “Lag-o. An-nen urusu mbarer-o yukmu urusu mbariga nap Yoanes na nde uruk yarik-nen yusu-o” luk yij-o.

¹⁷Nde, Erorias iri-ge Erores owot Pilipus ogwe-t nde, Erores-nen wanosoluk yarig-e, at Erores na-ge kwe iri na wene lit lit Yoanes na tenasa, kere kamasa o kubu me ibil nggwij-o.

¹⁸Iri yid iri-ge, Yoanes-nen Erores yak tosolar-e: “Kat kowot ogwe wanigen yu-ge meya-t kwarigen-o” luk pempa yak terenak worasola karuk, o kubu me pil nggwij-o.

¹⁹Iri yoso ala-ge, Erorias na-ge isilepma Yoanes ebem purug-e, Yoanes na wururak peragaij-et nde, Erores na Yoanes wururak indi angin ala, wururag-e meya yij-o.

²⁰Yoanes na-ge konak lud tak nak kwaroso ala karug-e, Erores-nen Yoanes indi aye-nen-e at imiri yosolat woragaij-o. Nde, Yoanes-nen yidnak wene kolosolug-e, indi nden penden yosolar-et nde, alen min-et at ene kolosolat woragaij-o.

²¹Nde, Erores ndesa mbidnak tarem wok yosoloma-ge, it pemerinta nap ap yok nggok pidsa min polisi wari erep min Nggalilea iri me enne kulugwi nap min enmanggim Erores-nen mburu mburungga kwarat sagosola, iri na tarem-nen Erorias na-ge Yoanes wururak nanongga rak pij-o.

²²Sagaid iri tarem-e Erorias ara na-nen-e ndawi yosolat, kot kasolar-e, Erores na min at-nen yonggo inpidnak nap ereba na min-e enalen kwarat tak posoloma-ge, Erores-nen la kwe na yak tosolar-e: “kat kindingen peraidnak mende nde nggi yak norosola-ge, wog-et kirimin-o” luk yak tij-o.

²³Yak turug-e, owak mbarak puruk-nen la kwe na yak tosolar-e: “Kat-nen ‘Iri mende wok niri-o’ luk nggi yosola-ge, wok kirimin-o. An-nen tenagaidnak nggweyag-et nde, ‘Mengget niri-o’ yosola-ge, wog-et kirimin-o” luk yak tij-o.

²⁴Yak tosoloma-ge, la kwe na mbepme mberarik, at ija na kin wanosolar-e: “No nde nggi yimin-o?” luk kin wanosoloma-ge, ija-nen yosolar-e: “Ap yi maroso nap Yoanes anggulwak nde nggi yi-o” luk yij-o.

²⁵Yosoloma-ge, la kwe na ndag-et nak nagawan eram puburak mberarig-e: “An nindingen-e ap yi maroso nap Yoanes na anggulwak nde mbara piring pem puruk, yanem-et wok niril lobok yi-o” luk yij-o.

²⁶Yosoloma-ge, nagawan iri-ge indi angin kwarat yij-et nde, at-nen-e: “Wog-et kirimin-o” luk at-nen yonggo inpidnak nap inmbiri bem owak mbaridnak me, larok yurag-e meya agaij-o.

²⁷Alama-ge, ereya na-net nagawan iri-nen polisi mbi wirik posolar-e: “Yoanes anggulwak iri-ge mbatluk waruk lobok yi-o” luk yak tosoloma-ge, at na mberarig-e o kubu me-nen Yoanes urusu mbatlug-e,

²⁸at anggulwak na piring pem puruk, la kwe na wok til lobok yosola-ge, la kwe na-nen-e ija wok tij-o.

²⁹Nde, wene na Yoanes imin nugwi nap-nen kuluruk, lobok yigarig-e, at orogak na waga yapma biga-o.

³⁰Wirik inpidnak nap na-nen-e Yesus eram ndok wiril lobok Yogolar-e, it-nen kwaridnak wene nde ap mul indidnak wene nde ndegera yak tiga-o.

³¹Yak togolikma-ge, ap kwarat-nen it endam lobok yogolat, mborogolat yogola karug-e, Yesus owosirak inmin-e mburu norak tarem na meya ala-ge, Yesus-nen it yak ondosolar-e: “Nenpabok kwaruwokluk, nenarikmu endeba ap lak ma log-o” luk yak indij-o.

³²Yak ondosoloma-ge, e koma arem ngguruk, ir-e ap lak ma enarikmu ereba-t mbiriga-o.

³³Mborogolikma-ge, ap kwarat na-nen it mborogola eneyaruk, yenggerak eneyagoluk, it mbururak sa enaru me, o siri iri me woragwi pidsa-nen nggweyak tu puburak mbirigarig-e, iri na me nandug-et wok yiga-o.

³⁴Worakmu-ge, Yesus na-ge e koma arem-nen kenangga mbosolar-e, ap kwarat na yik eneyagaidnggal-e, ir-e lomba wam ombo lak nggal eneyarug-e, it enabuwa kwarat karug-e, wene kwarat mul indij-o.

³⁵Mul ondosola-ge, o keyama alama-ge, Yesus owosirag-e at eram lobok yigarik-nen yak togolar-e: “O yu me-ge ap na lak, o na mondok keyama yidnak me,

³⁶ap yeba-ge it ondomok-nen o siri yeba nggwe-nen mburu onggo mbara nujwak-nen wirik unpurak perak ob-o” luk yak tiga-o.

³⁷Iri yak tiga-t nde, Yesus-nen it yak ondosolar-e: “Kit-net nunggwi mende mak ender-o” luk yak ondosoloma-ge, it-nen yak togolar-e: “Po! Nit nontol 200 ya bem nak-nen wanidnak mburu-ge it yeba ndak mak undul-a?” luk yak tiga-o.

³⁸Yak togolikma-ge, Yesus-nen kin wok onposolar-e: “Kir-e oroti mburu-ge nunggwirik worasu-o? Mbi lembenarer-o” luk yosoloma-ge, it na karuk-nen yogolar-e: “Oroti mburu-ge lima nde, keyane-ge mberen worasu-o” luk yiga-o.

³⁹Yogolikma-ge, at-nen ene amawi min yak ondosolar-e: “Kir-e ap yeba-ge tusuangge bem lena mbo koreyak enper-o” luk yak indij-o.

⁴⁰Yak ondosoloma-ge, ir-e lena mbo kore yogolar-e, ap seratus nggal-e nin me kore yogolat, ap lima pulu nggal-e nin me kore yogolat, iri kwasa kore yil mbiriga-o.

⁴¹Iri rak unpurug-e, at-nen oroti mburu lima na min keyane mberen na min wanuruk yarig-e, erengen mbal lik karuk, Mbal Pem Nagawan “Wa-o” yak turuk, oroti mburu ndeksa ligik puruk, at owosirak-nen tembet unduwakluk ininggem pij-o. Iri nggal keyane mberen na irit tembesa it pidsa wok indij-o.

⁴²Wok ondosoloma-ge, it pidsa inmbitsa ningga-o.

⁴³Nurug-e, at owosirak-nen oroti mburu min keyane min minggirik ereba na ndok wosa yarak piganggal-e, mul sum-e duabelas irit kobong yij-o.

⁴⁴Nde, oroti mburu iri ningga nab-e ap nag-e limaribu-o (5.000).

⁴⁵Ereya na-net ar-e ap kwarat iri na wirik onpsolat-net at-nen ene amawi min-et at owosirak na yak ondosolar-e: “Kir-e e koma arem nggogoluk, eyak ele bem nanduk o Mbetsaira ndil ler-o” luk yak indij-o.

⁴⁶Nde, at owosirak na wirik unpurug-e, Yesus na-ge tepan yekluk ndobo bem mbirij-o.

⁴⁷Mberarik worasola-ge, o ndamuk yamu-ge e koma na-ge yi koma enggendumu worala, nde, Yesus arig-et wesi bem ereba-t woragaij-o.

⁴⁸Woralar-e, it yik eneyagaidnggal-e obube-ge enabuwok nggwenen puk kasolat me, yi na sabaril mborogolat, siri mbaril mburukmu, eneyagaij-o. Eneyarug-e, o nda yekluk kil posola, ar-e yi ombolwak pem it endam lobok yosolar-e, it keya unpuruk, wot mbereyekluk yij-o.

⁴⁹Yosoloma-ge it-nen yi ombolwak pem na lobok yosola karug-e, “Yu-ge ngena-nen yusu-o” luk, enne ya nga mbiga-o.

⁵⁰It pidsa-nen at kagolug-e, yendet wendet mbiga-t nde, Yesus-nen ndag-et nak it yak ondosolar-e: “Kondok yer-o. An-nen yusu-o. Kwiye kali-ge meyog-o” luk yak indij-o.

⁵¹Yurug-e it endam e koma na arem nggosola-ge, obube na kondok yosola-ge, Yesus owosirag-e mondok yi wi mbiga-o.

⁵²Nde, oroti mburu lima-t nde, kwiye worak mende kwarid na-ge ir-e kwara yenggerak pigit lak, it-nen yebet kudtag-e mondok meya irit woraiga-o.

⁵³Ir-e ele bem ndil laigarig-e, yi koma eyak pem o Nggenesaret wok lug-e, e koma na yi unggut mu yilik piga-o.

⁵⁴Yilik puruk, it na e koma arem-nen kenangga mbogola-ge, ap-nen-e Yesus na nam-et nak yenggerak ibiga-o.

⁵⁵Yenggerak uburuk, iri me woraidnak o siri pidsa yonggo bonggo nogolar-e, kugi worak nab-e nene yugwi ondoro bem mbinggirik unpuruk, “Yesus-e iri me worasu-o” yidnak sa iri na me wok unpuruk Yesus eram inpil lobok yiga-o.

⁵⁶Nde, Yesus na ya wok nosolar-e, o siri marik nggwe-nen na, o siri nggulok nggwe-nen na, Yesus mbiridnak sa-ge kugi worak nab-e waga onggo pugwi sa unpuruk, “Kusum erep nak tenaguwag-o” luk at emengen kiri keresa mbariga-o. Yak togola-ge, usum erep tenaidnak nap pidsa-ge ki yogolat woraiga-o.