Read Nduga MARAKUS 7 Bible Online

MARAKUS 7 - Nduga bible

MARAKUS 7

¹Parisi nap min Yerusalem-nen lobok yidnak imiri mbarak pidnak wene enaru nap erep min-e Yesus eram ndok wiriga-o.

²Ndok, wutluk, yik eneyaiganggal-e, Yesus owosirak ereb-e mburu nonggolar-e, ininggi kusimin min, ininggi yi marigit lag-et ningga-o.

³It onmborak-nen yidnak yidnak kwarogolar-e, it Parisi nap min Yawuri nap erep pidsa min-e ininggi kwara matluk nak-nen mburu-ge nunggwi-o.

⁴Nde, ir-e onggo pugwi sa-nen enma mbutlug-e, enpe kona marak puruk nak-nen mburu nunggwi-o. Nde, onmborak-nen “Iri ngal kwarurag-o” yidnak yidnak erep kwarogolar-e, posid yimbe min sakwi togolwak min posid togolwak min kwara marugwi-o.

⁵Iri kwarugwi me, it Parisi nap min imiri mbarak pidnak wene enaru nap min-nen Yesus kin wanogolar-e: “Kat kowosirak yu-ge noluk-nen nonmborak-nen yidnak yidnak kwarigit lak, mburu-ge ininggi marigit lak nili-o?” luk kin waniga-o.

⁶Kin wanogolikma-ge, Yesus-nen wene onggo yosolar-e: “Yesaya-nen urul paga engga bem mbarid na-ge kit kenesiget siget kwatli yu-t ndemeret urul pamu-o. Nde, iri-nen yosolar-e: ‘Ap yu-ge enmende nak-nen an kek tak nibili-t nde, inndi-ge erepma worasu-o.

⁷It-nen mul undugwi iri-ge ki nap-nen kwarugwi mende-t nde, an-nen yidnak nggal tak puruk mul indili me, An nerembel wanili iri-ge ebe lak mende nde kwat yusu-o.’

⁸Mbal Pem Nagawan-nen: ‘Irit kwarurag-o’ yidnak wene-ge kir-e mbo buruk, konmborak ki nap-nen yidnak wene nde puksa tena worali-o” luk yak indij-o.

⁹Yak unduruk, Yesus-nen tuguruk it yak ondosolar-e: “Nde, kir-e Mbal Pem Nagawan-nen: ‘Irit kwarurag-o’ yidnak wene keya buruk, kit kondomok-nen kwarugwi wene tena wolmomtag-e kir-e mondok kenaru lombog-o!

¹⁰Musa-nen yosolar-e: ‘Kineid kiniya irit kek tak unpurag-o’ luk, ‘Eid iya inmin meya wene yuwa nab-e mondok wururag-o’ luk yij-et nde,

¹¹kit-nen yogolar-e: ‘Ap misik-nen at arengge eid iya yongga undurak mende iri na min eid iya yak ondosolar-e: “Yu-ge Mbal Pem Nagawan amanggim pidnag-o” luk yak undurag-e ob-o’ yili iri bem

¹²ar-e eid iya yongga undurag-et nde, kit-nen lak tak pili-o.

¹³Kir-e iri nggal ap yak ondogolar-e, Mbal Pem Nagawan-nen ‘Irit kwarurag-o’ yidnak wene-ge ebe lak mende rak pili-o. Nde, kit-nen iri mende kwarugwi erep na kwarat worasu-o” luk yak indij-o.

¹⁴Yesus-nen tuguruk ap kwarat wene mbo unpuruk yak odosolar-e: “Kit pidsa-nen an-nen yidnak wene kuluruk, kwara yebet ker-o.

¹⁵Mbepme nggwe-nen ap enarem nggoso iri-nen-e ap meya rak onposo bug-o. Are, ap enarem-nen mboroso iri-net ap meya rak onposo-o.

¹⁶Iri bem-e, keneyanggo worak ala-ge, kwara koler-o” luk yak indij-o.

¹⁷Yak undurug-e, ap kwarat na keya unpuruk, o ma nggwarik worasoma-ge, at owosirak-nen-e nden karuk wene na-ge: “Ngge yosolat-nen yigen-o?” luk kin wok igiba-o.

¹⁸Kin wok obogolikma-ge, Yesus-nen it yak ondosolar-e: “Kit tet kinndi yebet kali bug-a? Mbepme nggwe-nen ap unlum arem pil nggugwi iri-nen-e ap meya rak onposo buk iri-ge kir-e kenaru bug-a?

¹⁹Ap unlum arem pil nggugwi iri-ge ap inndi arem nggoso bug-o. Are, we unlum arem ngguruk, enal wangge ma wirik pugwi-o” luk yak indij-o. Iri yid iri-ge, “Nunggwi mende pidsa nalma nag-o” yosolat-nen yij-o.

²⁰Yurug-e, at-nen tuguruk yosolar-e: “Ap enarem-nen mboroso mende iri-net ab-e meya rak onposo-o.

²¹Nde, ap enarem-nen mborosolar-e, meya yebet kagwi min kweyap terak ye unpugwi min yariya wanugwi min ap wurugwi min

²²mbona yugwi min ap enarengge ukwe ukwe yugwi min meya kwarugwi min ap onmbol pem lagwi min ukwe ukwe yugwi min enlengen ale yugwi min ap onpok pugwi min enambik entembel wanugwi min inndi amawi kwarugwi min

²³meya kwarugwi yu pidsa-ge ap enarem-nen mborosolar-e, ap meya rak onposo-o” luk yij-o.

²⁴Misik tarem Yesus na o iri na-nen mberarik, o Tirus koroga wok yij-o. Wok yuruk, ap-nen kujwa naru, o mbi me mbik mbok nggwij-et nde, at obok kurak yurag-e meya agaij-o.

²⁵Nde, kwe misik ara marik arem kugi meya lin yidnak woragij-o. Nde, kwe iri na-ge Yesus obok kuluruk, ereya na-net at eram lobok yarig-e, at eralu tud yij-o.

²⁶Nde, kwe iri-ge Yawuri kwe-ge lag-o. Are, Siria Penisia kwe-o. Nde, kwe iri na-nen at ara arem-nen kugi meya iri wirik puwakluk Yesus emengen kiri keresa mbarij-et nde,

²⁷Yesus-nen kwe iri yak tosolar-e: “Mburu-ge li marik nandug-et mak undugwi-o. Nde, lik marik unmburu-ge waga yengge eram mbo bugwi bug-o” luk yak tij-o.

²⁸Yak tosoloma-ge, kwe iri na-nen at yak tosolar-e: “Nab-o Ndemerer-et nde, li marik-nen nonggolat abapno mberak pidnak na yengge-nen-e mburu nunggwi sa indipma-nen pendaga naso-o” luk yij-o.

²⁹Yosoloma-ge, Yesus-nen kwe iri na yak tosolar-e: “Wene iri yigen iri bem-e kar-e kama mbiri-o. Kugi meya iri-ge kat kara arem-nen mbirij-o” luk yak tij-o.

³⁰Yak tosoloma-ge, kwe iri na ama mbiridnggal-e, ara na-ge kugi na nggogora mberamu, nene yoso sa mbinggirik worasoma kagaij-o.

³¹Iri lug-e, Yesus na Tirus-nen lobok yosolar-e, Siron nggwe-nen O Siri Sepulu na wot kil kil Nggalilea Koma eyak pem wok yij-o.

³²Wok yosola-ge, eyanggo lak, ama mbarak nap misig-e ap-nen Yesus eram pil lobok lug-e, Yesus inggi at ebem puwakluk emengen mbariga-o.

³³Emengen mbarogolikma-ge, ap kwarat ndok wiridnak sa keya buruk, ap iri na “Lobok yi-o” luk enarikmu-nen-e Yesus inggi ndum ap iri eyanggoru me mon karuk, wusi toboksa posoluk yarig-e, at iri na ama tenabij-o.

³⁴Tena burug-e, Yesus na mbal nggwe lik kasolat-nen indisep wirik puruk-nen ap iri na yak tosolar-e: “Epata” luk yak tij-o. Nde, iri-ge nit nenne bem-e: “Keyanggo kuwak mag-o” yosolat-nen yij-o.

³⁵Yosola-ge, at eyanggo na kuwak yosolat, ama mbarak na mot yosolar-e, wene yurak te agaij-o.

³⁶Nde, Yesus-nen it yak ondosolar-e: “Wene yu-ge ap misiger-o luk tet mondok yak undurak pug-o” luk ene amawi min-et yak indij-et nde, it iri na-nen wene na wigarak piga-o.

³⁷Wigarogola, wene iri kulidnak nab-e wi yiga-o. Nde, it-nen yogolar-e: “At-nen kwarusu yu ija-t kwarusu-o. Eneyanggo lak woragwi na kulugwi rak onposolat, it enna lak yidnak nap na wene yugwi rak onposolat yusu-o” luk wi yiga-o.