Read Nduga MARAKUS 9 Bible Online

MARAKUS 9 - Nduga bible

MARAKUS 9

¹Yuruk, at-nen it yak ondosolar-e: “Kenaru wolmer-o. Kit yu me worali nap ereb-e wat yigit lak ma-t Mbal Pem Nagawan-nen tenagaidnak wi-ge amawi bem-et lobok yosola, enlengen-nen kujwa-o” luk yak indij-o.

²Enam nene lug-e, Yesus-e Peterus min Yakobus min Yoanes min inmin lug-e, it enarig-et nak ndobo nggulok pem inmin lagarik, it enlengen pem-e at abage na nin agaij-o.

³Nin yosolar-e, usum na loro lombok abinal-nen igip kip worak agaij-o. Loro agaid iri-ge nggweyak ma yu me ap misiger-o luk tet sum loro matluk iri nggal loro rak na pugwi bug-o.

⁴Nde, iri luk at owosirak kenan iri na-nen yik kaiganggal-e, Elia min Musa min Yesus imin wene ndok ndok yogola, eneyaiga-o.

⁵Eneyarug-e, Peterus na-nen Yesus yak tosolar-e: “Nggomo Nondoso Nap wa-e. Nir-e yu me worali yu-ge konak lombog-o. Nde, o lije kenan wuruwog-o. Misig-e kat kirit, misig-e Musa irit, misig-e Elia irit wuruwog-o” luk yij-o.

⁶Iri yid iri-ge Peterus anggamirak inmin kwiye kwarat kagolat me, at-nen yurak kabak ala karuk-nen yij-o.

⁷Yosoloma-ge, nggan nggan mbi-nen it muruksa keya onposoloma-ge, nggan nggan arem-nen ene mbi-nen yosolar-e: “Yu-ge an Nambara nindi kundik-nen yusu-o. At ene nak koler-o” luk yosola kuliga-o.

⁸Kuluruk, ereya na-net it worali sa iri na mbenariga nggal-e, it endam misig-et tet lak, Yesus arig-et nak worasola kaiga-o.

⁹Karuk, it na ndobo bem-nen mbogolat-nen Yesus-nen it na yak ondosolar-e: “Ap Ambara an-e wat luk, wat yidnak ennggendumu-nen tuguruk nuruk tak pigit lak ma-ge, yanem kaigep iri-ge ap misiger-o luk tet yak undurak pug-o” luk yak indij-o.

¹⁰Yak ondosoloma-ge, wene yak indid na-ge abu waniga-t nde, “Ap wat yidnak ennggendumu-nen uruk yurak yid iri-ge no yosolat-nen yij-o?” luk it nak it nak yak kerak mbiga-o.

¹¹Yak kerak mburug-e, it-nen Yesus na kin wok obogolar-e: “Imiri mbarak pidnak wene enaru nap-nen-e noluk-nen Elia na-ge mondok nandug-et lobok yuwa-o luk yili-o” luk kin wok ibiga-o.

¹²Kin wok obogolikma-ge, Yesus-nen it yak ondosolar-e: “Elia-ge yi mende ndi mende lid lud tak purak pem ndemeret at nandug-et lobok yuwa-t nde, Mbal Pem Nagawan engga mbarak pem-nen-e: ‘Ap Ambara iri-ge yane kwarat worosolat, ap-nen pesel obogolat ma-o’ luk yidnak iri-ge ngge kwarag-o?

¹³Alat nde, kinndi kwara yebet ker-o. Elia na-ge lobok yamu ap-nen it inndi-n pidnak nak kwat ibiga iri-ge Mbal Pem Nagawan engga bem-nen at kwat uburak mbarak iri na ndak ndag-et kwat ibiga-o” luk yak indij-o.

¹⁴Yesus owosirak kenan iri na inmin-e Yesus owosirak erep endam wok yiga nggal-e, it imiri mbarak pidnak wene enaru nab-e it inmin wene mbi lit lit ngguno pogola, ap kwarat-e it lop lop indigarik worakmu eneyaiga-o.

¹⁵Nde ereya na-net ap iri na pidsa Yesus kagoluk, wendet luk, at eram puburak mbirigarig-e, wa yak tiga-o.

¹⁶Nde, Yesus-nen at owosirak iri kin wok onposolar-e “Kir-e imiri mbarak pidnak wene enaru nap inmin-e no wene lit kaigepndik-nen nggok tak pili-o?” luk kin wok inpij-o.

¹⁷Yosoloma-ge, ap kwarat na ennggendumu-nen ap misik-nen Yesus yak tosolar-e: “Nggomo Nondoso Nap wa-e. An nambara yu-ge kugi meya mbi at arem lin yosolar-e, at ene lak tak pidnak ala-n, an-e kat keram waruk lobok yigi-o.

¹⁸Kugi meya iri na-nen kwat obosolar-e, ebe-ge nggweyak pem lel nggwel tak obosolat, emende nggwe-nen-e eregup kilarosolat, eyak ene nggirit mak tak posolat, inggi owak kambung puk tak posolat yoso-o. Iri yosola karuk, an-e kat kowosirak inmin-e, ‘Kugi wirik per-o’ luk yak indigi-t nde, it-nen wirik purag-e meya-o” luk yij-o.

¹⁹Yosoloma-ge, Yesus-nen it yak ondosolar-e: “Kinndi angin tubu yugwi buk nap wa-e. Nunggwirik tarem nggal kinmin woramin-o? Nunggwirik tarem nggal kinmin momak puruk woramin-o? La iri-ge an neram waruk lobok yer-o” luk yak indij-o.

²⁰Yak ondosoloma-ge, it-nen la iri-ge at eram waruk lobok yogolikma-ge, kugi meya na-nen Yesus karug-e, ereya na-net la iri na yugup tugup tak posolar-e, la na nggweyak ma mbud luk kendam posolar-e, emendam nggwe-nen eragup kilara wagaij-o.

²¹Wasola karug-e, yesus-nen la iri na eid kin wok obosolar-e: “Yu kwaroso-ge mepme tarem-nen tel kwirij-o?” luk kin wanosola, at eid-nen erep nggarosolar-e: “Marik mu-net kwaroso-o.

²²Nde, kugi meya iri na-nen kwarat pem at worak ebeyekluk-nen kwat obosolar-e, kan ma pil nggosolat, yi ma pil nggosolat kwaroso-o. Alat nde, kat-nen yongga nundurak nde ndak ala-ge, nenabuwa karuk, yongga nindi-o” luk yij-o.

²³Yosoloma-ge, Yesus-nen at yak tosolar-e: “ ‘Yongga nundurak nde ndak ala-ge’ yigen-a? Pidsa kwat unpurak iri-ge ndak-nen yusu-o. Alat nde, nggog-e inndi angin tubu yurak iri nag-o” luk yak tij-o.

²⁴Yak tosoloma ereya na-net la na eid-nen ene ngguloksa yosolar-e: “An nindi angin tubu yusu-t nde, kwara nindi angin tubu yusu buk-nen kwara nindi angin tubu yek-nen yongga niri-o” luk yij-o.

²⁵Yosoloma-ge, Yesus-nen ap kwarat ereba na at eram ndok worogola karug-e, at-nen kugi meya na wirik posolat-nen yak tosolar-e: “Kugi meya kat-nen ndowaga, ap enne lak tak posolat, ap eneyanggo lak tak poso kugi meya wa-e. Nene amawi min yak kurusu-o. Kugi kar-e la yu arem tuguruk nggurag-e mondok lik lak sa-o. Mondok mbiri-o” luk yak tij-o.

²⁶Yak tosoloma-ge, kugi na ngasilek luk, la iri na yugup tugup tak puruk, at arem-nen mborosoloma, la na-ge ap lugunik nggal nde kaiga-o. Karuk, it pidsa-nen yogolar-e: “La yu-ge abu wat yamu-o” luk yiga-o.

²⁷Alat nde, Yesus-nen la na inggi lesa mendak posoloma-ge, at na-ge men yij-o.

²⁸Iri rak puruk, Yesus na o ma worasoma, at owosirak o ma enarik mu-nen at kin wok obogolar-e: “Noluk-nen kugi meya iri nit-nen wirik purag-e meya yij-o?” luk kin wok ibiga-o.

²⁹Kin wok obogolikma-ge, Yesus-nen it yak ondosolar-e: “Kugi yu nggal yu wirik pogolar-e, we-nen wirik purag-e meya-o. Are, tepan-net wirik purag-o” luk yak indij-o.

³⁰Yesus owosirak inmin-e iri me-nen mborogolar-e, Nggalilea nggwe rak piga-o. Nde, at worasu obok enaru yurak iri-ge Yesus-e isili-o.

³¹Yesus-nen at owosirak na mul ondosolar-e: “Ap Ambara-ge ap ininggem puwama, it-nen wuruwa-o. Wuruwama-ge, mberen naruk, kenan tak purak pem-e uruk ma-o” luk yak indij-o.

³²Yak ondosoloma-ge, at owosirak-nen-e yak indid wene iri-ge kwara yenggerak pigit lag-et nde, at kin wok uburag-e kwiye-nen larok yiga-o.

³³Nde, it na o Kapernaum wok luk, o ma mbi nggwigarik Yesus-nen owosirak na kin wok onpsolar-e: “Kit tu ndumu-ge no wene mbaril mbaril lobok yigeb-o?” luk kin wok inpij-et nde.

³⁴It lobok yogolat-nen-e: “Nit nennggendumu ya-nen-e ta-nen nde unu nggulok lombok ma-o?” luk iri wene lit lit ngguno pigarik me, enne lak yiga-o.

³⁵Enne lak yogolikma-ge, yesus na kore luk-nen at owosirak duabelas na wene mbo unpuruk, yak ondosolar-e: “Ta-nen nde nggulok wolmomtak perasolar-e, at ondomok-net tebe yosolat, ap pidsa ndegel onposo nap kwat mag-o” luk yak indij-o.

³⁶Yak undurug-e, la marik mbi inggi waga it ennggendumu mendak uburug-e, la na manuk tosolat-nen at owosirak na yak ondosolar-e:

³⁷“Ta-nen nde la marik yu nggal yu an nunu bem wok obosolar-e, iri-ge an-et wok nubusu-o. Nde, ta-nen nde an wok nobosolat ala-ge, an nak wok nubusu-ge lag-o. Are, an wirik nibil lobok yid nap Mbal Pem Nagawan iri na-t wok ubusu-o” luk yak indij-o.

³⁸Yak ondosoloma-ge, Yoanes-nen Yesus yak tosolar-e: “Nggomo Nondoso Nap wa-e. Ap mbi-nen-e kat kunu bem kugi wirik posola kaige-o. Karug-e, at iri-ge nit ninmin noso buk me, ‘Iri mende kwarusu-ge meyog-o’ luk yak tige-o” luk yij-et nde.

³⁹Yesus-nen yosolar-e: “An nunu bem kwiye worak mende nggeret kwaridnak nab-e ereya-net an nunu meya rak puwa-ge lak me, kit-nen mbawi wururak pug-o.

⁴⁰Nit ninmin wim mbarusu buk nab-e, nit nap-nen yusu-o.

⁴¹Kwara yebet yebet tak wolmer-o. Kar-e Kerisut imin kundik-nen yusu-o luk yi marig-et kenangga mak kunduwa-t nde, ndemeret Mbal Pem Nagawan-nen-e ap iri-ge onggo-t wok tuwa-o” luk yij-o.

⁴²Yuruk, Yesus-nen yosolar-e: “An nebem inndi angin tubu yidnak li marik yu ennggendumu-nen la misik nak an nebem indi angin tubu yidnak na lak tak puwa nap iri-ge, kerep nggulok at urusuwak pem yela keya buruk, yi koma arem mbo pil nggurag-e ndak-nen yusu-o.

⁴³Kat kinggi-nen nde meya rak kobosola-ge, kinggi mbarak pi-o. Kat kinggi ponok mbarak-net pem-et kuruk wolmomtag-e konag-o. Nde, kat kinggi mberen tag-et nigi yoso buk kan mare arem nggurag-e meya-o.

⁴⁴(Nde, iri me-ge kandug-e mondok nigi ma bug-o. Unpugwe na mondok wat ma bug-o).

⁴⁵Kat kijok-nen nde meya rak kobosola-ge, kijok mbarak pi-o. Kat kijok ponok nggwe nak worak-nen pem-et kuruk wolmomtag-e konag-o. Nde, kat kijok mberen tag-et kan mare arem nggurag-e meya-o.

⁴⁶(Nde, iri me-ge kandug-e mondok nigi ma bug-o. Unpugwe na mondok wat ma bug-o.)

⁴⁷Kat kerengen-nen nde meya rak kobosola-ge, kerengen kela wabi-o. Kat kerengen misiget nak-nen Mbal Pem Nagawan-nen tenagaidnak wi nggurag-e konag-o. Nde, kat kerengen mberen parugu kan mare arem nggurag-e meya-o.

⁴⁸Nde, iri me-ge kandug-e mondok nigi ma bug-o. Unpugwe na mondok wat ma bug-o.

⁴⁹At-nen mot mot nak kwaroso iri na kudtak pem-e, ap pidsa-ge inndi ngaroso kanduk mondok enpem mbuwa-o. Iri nggal kwat obosolar-e, mayu yugurik ibidnak nggal kwat yusu-o.

⁵⁰Mayu iri-ge konag-et nde, mayu nde undu lak ala-ge, nggesa-nen tuguruk undu worak tak purag-o? Iri bem-e, kid pidsa mayu yugurik inpidnak nab-et kwat yogolar-e, kit na kit-net kundik lambuksa wolmer-o” luk yij-o.