Read Nduga LUKAS 1 Bible Online

LUKAS 1 - Nduga bible

LUKAS 1

¹Teopilus wa-e. Nap wa-o. Ap kwarat-nen-e nit nennggendumu-nen kwat yidnak wene-ge mondok kona mbariga-o.

²It-nen mbarogolar-e, nanduk-nen kwarogola, enlengen-nen karuk wugariga wene yak nindidnak iri na ndak ndag-et mbariga-o.

³Iri bem-e, nap Teopilus wa-e. An-e tel kwiridnak kuri-net kwaridnak mende pidsa kwara mbenarosolug-e, kat kamanggim kona irit mbal kururak peragi-o.

⁴Iri kwarimin iri-ge kat mul kiridnak wene pidsa-ge ndemerer-o luk peranokluk-nen mbal kirimin-o.

⁵O Yurea nagawan Erores worala-ge, tepan ombo misik unu-ge Sakaria irit woragaij-o. At iri-ge tepan ombo Abia winde nab-o. Nde, at ijambal unu-ge Elisabet na irit, tepan ombo-nen nderak irit woragaij-o.

⁶Nagawan Indo-nen “Irit kwarurag-o” yidnak min imiri mbarak pidnak wene min iri-nen yidnak yidnak nak kwarogola-ge, Mbal Pem Nagawan-nen it enmberek eneyasolar-e, it enmbereg-e mot mot kwarugwi irit eneyagaij-o.

⁷Kwe Elisabet na-ge yibiri me, ir-e li ndakit lak iri-net abu inndi worak, li yidnak irit woraiga-o.

⁸Misik tarem it Abia-nen Mbal Pem Nagawan ama yabu wanurak tarem na alama-ge, at Sakaria-ge Mbal Pem Nagawan eram iri me tepan ombo-nen wanugwi yabu na wanosolat woragaij-o.

⁹It tepan ombo-nen kwarugwi kwarogolar-e, Mbal Pem Nagawan ama iri me-nen emben konak mende kan purak tepan ombo lonogolat-nen kerep piganggal-e, Sakaria ebem mbidnak me, Mbal Pem Nagawan ama nggwarik, emben konak mende kan pij-o.

¹⁰Kan posola-ge, emben konak mende kan pugwi tarem-e Sakaria na ma nggosola-ge, ap kwarar-e mbepme tepan yogolat woraiga-o.

¹¹Woragola-ge, Nagawan Indo-nen idnak aid nab-e Sakaria imbiri bem nam yij-o. Nde, aid nap iri-ge emben konak mende kan pugwi ondoro iri na eralu kigit ambigit nggwe mendak woragaij-o.

¹²Nde, Sakaria-nen aid nap iri karug-e, wendet luk yarik, kwiye kwarat kagaij-o.

¹³Alat nde, aid nap iri-nen Sakaria yak tosolar-e: “Sakaria wa-e. Kwiye kasu meyog-o. Kat-nen tepan yigen-e Mbal Pem Nagawan-nen kolamu me, kat kogwe Elisabet na-ge li ap mbi ndaguwa-o. Nde, la na unu-ge Yoanes irit yarugun-o.

¹⁴La na ndesa mbosola-ge, kat-nen na kalen kwarat kasolat, ap kwarat-nen na kijik kijak irit wuruwa-o

¹⁵Nagawan Indo-nen la na yik kasolar-e, ap nggulok irit ma-o. At iri-ge anggut engen amburu min inndi nden kaso yi erep min mondok nujwa bug-o. At iri ndesa mbosola-net Konak Indi-nen arem kobong yidnak irit wolma-o.

¹⁶At iri-nen-e Isarael nap tuguruk nden yaga Nagawan Indo it Enmbal Pem Nagawan eram inpil lobok yuwa-o.

¹⁷At iri-ge Mbal Pem Nagawan-nen wirik pil lobok yidnak nap amawi worak, unu kek tak Elia nggal irit kwat ma-o. At-nen-e ineidtak min inlirak min lambuk tak onposolat, nde, wene kuruk tugwi nab-e mot mot yebet kagwi nap tak onposolat ma-o. Iri nggal kwarosolar-e, Nagawan Indo ilirak kwat momtak nap tak unpuwa-o” lu yak tij-o.

¹⁸Yak tosoloma-ge, Sakaria-nen aid nap na yak tosolar-e: “An-e narowe me, nogwe na arowe li yidnak me, kat-nen yak nurusu iri ndemeret kwat ma-o luk, no bem-nen naru yimin-o?” luk yij-o.

¹⁹Yosoloma-ge, aid nap na-nen at yak tosolar-e: “An-e Mbal Pem Nagawan ndegel oboso nap Nggabiriel-nen yusu-o. Mbal Pem Nagawan-nen konak wene yu yak kuruwakluk nibil lobok yamu-o

²⁰Alat nde, an-nen yak kurusu yu-ge kwat yurak tarem ndak ala-ge, an-nen yidnak wene yu-ge luj-et ma-t nde, kar-e te rak pusu-o. Te rak pusu me, kene lak yuwama, kene yigit lak woragundik, an-nen tul pusu wene yu kwat yosola-net kene kuwak ma-o” luk yak tij-o.

²¹Iri kwarogolat woragola-ge, ap ereba na-ge Sakaria na yik karok woragolar-e: “Abuk! Ar-e noluk-nen Mbal Pem Nagawan ama-nen wagit lak, pem-et worasu-o?” luk yiga-o.

²²Iri lug-e, at na wasolar-e, ene lak yidnak me, it inmin wene yigit lag-o. Are, inggi warok pem nak-nen yosola karuk, it-nen peragolar-e: “E! Mbal Pem Nagawan ama-nen-e nabi nggal mbi kagamu kaige-o” luk peraiga-o.

²³Nde, Mbal Pem Nagawan ama at ebem pidnak yabu na wanosolat woragaid woragaij-e ndak alama-ge, Sakaria na-ge ama mbirij-o.

²⁴Mberarik, worasoma-ge, at ogwe Elisabet na-ge abila luk, waneya lima iri-ge ama nak ura woralat-nen yosolar-e:

²⁵“An-e yu worasu yu-ge Nagawan Indo-nen yongga norosola, nabila yigi-o. Kweyap inmin ninggiri kasolat woraso iri-ge at-nen lak tak pij-o” luk yij-o.

²⁶Nde, Elisabet na abila luk, waneya enam worak puruk worasoma-ge, Mbal Pem Nagawan-nen-e Nggabiriel na-ge o Nggalilea nggweyak pem o Nasaret iri me ibil lobok yij-o.

²⁷Nggabiriel na-ge kwe ndugum mbi unu-ge Maria iri eram pil lobok yij-o. Nde kwe iri-ge Ndaud-nen wigarak mbi unu-ge Yusup-nen abi poso kwe-o.

²⁸Aid nap na-ge kwe na eram lobok yarik-nen yak tosolar-e: “Nagawan Indo-nen imbiringgat tak kibidnak kwe kar-e kindi yek tag-et wolmin-o! Nagawan Indo-ge kat kimin-et worasu-o” luk yak tij-o.

²⁹Yak tosoloma-ge, Maria na-ge aid nap-nen yak tidnak wene na kuluruk, wendet yij-o. “Noluk-nen iri yak nirij-o?” luk indi yebet kagaij-o.

³⁰Yebet kasoma-ge, aid nap-nen kwe na yak tosolar-e: “Maria wa-e. Mbal Pem Nagawan indi alen kat kebem pidnak me, kwiye kasu-ge meyog-o.

³¹Kar-e kabila luk, li ap mbi ndakun-o Nde, unu-ge Yesus irit yarugun-o.

³²Nde, at iri-ge ap nggulok irit ma-o. Ap-nen at imin-e: ‘Kar-e Kek tak Woraso Mbal Pem Nagawan Ambara-o’ luk yuwa-o. Nagawan Indo Mbal Pem Nagawan-nen-e at ombo Ndaud ondolma irit nagawan tak puwa-o.

³³At iri-ge Yakup-nen wigarak nap ennggendumu nagawan irit pempa wolma-o. At-nen tenagaidnak wi-ge lag-e ma bug-o!” luk yij-o.

³⁴Yosoloma-ge, Maria-nen aid nap na yak tosolar-e: “Nde, an-e ap inmin nene yoso buk me, kat-nen yigen iri-ge nggesa-nen kwat ma-o?” luk yij-o.

³⁵Yosoloma-ge, aid nap-nen wene erep nggarosolar-e: “Konak Indi-ge kat kebem lobok yosolar-e, Mbal Pem Nagawan amawi-ge kat kebem mbuma-o. Iri bem-e la ndakun iri imin-e: ‘Mbal Pem Nagawan Ambara len ibidnak-nen yusu-o’ luk yuwa-o.

³⁶Nde, kat kembap Elisabet na-ge kwe yibiri-o yak tugwi-t nde, kwe arowe li yidnag-et nde, yawo-ge abila yarik, waneya enam worak puruk worasu iri ki-o.

³⁷Mbal Pem Nagawan-nen kwarurag-e pidsa ndak nak-nen yusu-o” luk yij-o.

³⁸Yosoloma-ge, Maria-nen yosolar-e: “Eyo. An-e Nagawan Indo ndegel oboso kwe me, kat-nen yigen irit kwat nubuwag-o” luk yij-o. Yosoloma-ge, aid nap na-ge kwe na keya buruk mbirij-o.

³⁹Siyak worarug-e, Maria ana-ge ndag-et nak mborosolar-e, Yurea nggweyak pem o siri mbi ndobo worak sa irit mbirij-o.

⁴⁰Mberarig-e, Sakaria ama nggosolar-e, Elisabet na wa yak tij-o.

⁴¹Nde, Elisabet na Maria-nen wa yak tosola kolosola-ge, at arem la iri na-ge yunuk wanuk mbij-o. Alama-ge, Elisabet na arem Konak Indi-ge kobong yosolat-nen

⁴²ene ngguloksa yosolar-e: “Kwami erep ennggenggerak-nen mondok imbiringgat tak kibidnak kwe-ge kar-er-o! Imbiringgat tak pidnak la irit ndakun-o!

⁴³Noluk-nen an nggal neram-et nde, an-nen idnak Nagawan Indo ija-ge lobok yigen-o?

⁴⁴Nde, kat-nen wa yak norosola, kolosoma-net la an narem yu na igijak-nen yunuk wanuk mbij-o.

⁴⁵Nagawan Indo-nen yak kiridnak wene na-ge kwar-et ma-o luk peraigen pem-e kar-e kimbiringgat-nen yusu-o” luk yij-o.

⁴⁶Maria-nen yosolar-e: “An nindi-net Nagawan Indo erembel wanusu-o.

⁴⁷Mbal Pem Nagawan iri-ge an Nimiri Yoso ala, an nindi alin alen yusu-o.

⁴⁸At ndegel oboso kwe an meya teberak yu yebet neyaruk, Amawi worak Mbal Pem Nagawan-nen kwiye worak mende nggulok kwat nibidnak me, yawo-nen ap oboksa-nen an nimin yogolar-e: ‘Kar-e imbiringgat worak kwe-o’ luk yak nuruwa-o. At unu-ge marak-nen yusu-o.

⁴⁹

⁵⁰Nagawan Indo-nen at aye worak nap pidsa unpud kasolar-e, ap tap nanduk lud, abok lud irit unpud kaso-o.

⁵¹At inggi amawi worak iri bem-nen inndi kek tak nap sit mbit tak onposolat, it inndi-nen pidnak na nari wari rak posolat,

⁵²nagawan kek tak woragwi na lak tak onposolat, teberak woragwi nap na kek tak onposolat,

⁵³nere woragwi nab-e konak mende ndak yaga wok ondosolat, insilobulo kwarat worak nab-e we irit wirik onposolat yij-o.

⁵⁴Nit nenlawingga urul yak indidnak iri na ndak ndak tak posolar-e, at ndegel oboso nap Isarael na yongga wirij-o.

⁵⁵Nagawan Indo-nen at-nen urul pidnak iri na yebet yebet tak worasolar-e, Abaram min at-nen wigarak min pempa unpud kaso-o” luk yij-o.

⁵⁶Maria na-ge Elisabet inmin woralar-e, waneya kenan nggal woraruk, ama mbirij-o.

⁵⁷Nde, Elisabet na la ndagurak tarem na wok yosolar-e, la irit ndagaij-o.

⁵⁸Nagawan Indo-nen Elisabet na konak kwat ibidnak iri na obok kulurug-e, kwe na imin o siri misikmu woragwi nap min at owe owosi min-nen at imin kijik kijak wiriga-o.

⁵⁹La marik iri na nderak tuju nene luk delapan pem-e at iye ambasap waburak pem lobok yigarik, la marik iri unu-ge eid unu bem para Sakaria irit yaruwokluk peraiga-t nde,

⁶⁰at ija-nen yosolar-e: “Lag-o. At unu-ge Yoanes-et yarurag-o” luk yij-o.

⁶¹Yosoloma-ge, it-nen kwe na yak togolar-e: “Alat nde, kat kowe kowosirak misiger-o luk tet unnu-ge iri nggal mbi yarigit lag-o!” luk yak tiga-o.

⁶²Iri lug-e, it-nen-e la eid na ininggi warok pem kin wok obogolar-e: “La yu unu-ge ngge yarurak peraigen-o?” luk yiga-o.

⁶³Yogolikma-ge, Sakaria na-ge mbarurak engga mbi nggi yuruk-nen mbarosolar-e: “At unu-ge Yoanes-o” luk mbarosoloma-ge, it pidsa wi yiga-o.

⁶⁴Nde, ereya na-net Sakaria na ene kuwak lug-e, Mbal Pem Nagawan erembel wanosolat woragaij-o.

⁶⁵Worala-ge, at imin o siri misikmu woragwi nap pidsa-nen kwiye karug-e, iri kwaridnak wene-ge o Yurea wi ndobo worak sa woragwi nap ennggendumu-ge wigak yij-o.

⁶⁶Nde, wene na kuliga nap pidsa-nen enarem-nen peragolar-e: “Nagawan Indo-ge at imin worasu me, la iri nggok yosolar-e, no nggal kwat ma-o?” luk peraiga-o.

⁶⁷Iri lug-e, la iri eid Sakaria na-ge Konak Indi ebem mbuwasolar-e, at-nen Mbal Pem Nagawan-nen yidnak wene yosolar-e:

⁶⁸“At elem nap yongga ondosolat, wisirik enpeyekluk lobok yid Isarael nap Enmbal Pem Nagawan, Nagawan Indo iri nak erembel wanuwog-o.

⁶⁹Ninmiri yurak amawi worak nap wok nindid iri-ge at ndegel oboso nap Ndaud-nen wigarak-nen yusu-o.

⁷⁰Nanduk-nen Mbal Pem Nagawan-nen Mbal Pem Nagawan ene lomboksa yugwi nap marak nap enmendam tak posolar-e: ‘Irit kwarimin-o’ luk urul posolar-e:

⁷¹Kit kinmin wim nap min insili rak kunpugwi nap min ininggem-nen kinmiri yimin-o.

⁷²Kit kenlawingga unpud kasolat, ‘konak wene tul paga yak indigi na ndak tak pimin-o’ luk yij-o

⁷³At-nen owak mbara nit nonmbo Abaram na yak tosolar-e: ‘Kit kinmin wim nap ininggem-nen wisirik kinpimin-o. Iri ala-ge kwiye lag-et an ndegel nobogolat,

⁷⁴

⁷⁵kunluk woragolar-e, pempa an namanggim nak woragolat, an nindi nak alen tak pogolat yugub-o’ luk yak tij-o.

⁷⁶Nde, nambara wa-e. Ap-nen kat kimin yogolar-e: ‘Kar-e Kek tak Woraso Mbal Pem Nagawan ene lomboksa yoso nab-o’ luk yuwa-o. Kar-e Nagawan Indo abuwok urula yagonokluk, nanduk wirik kubuwa-o.

⁷⁷Kat-nen Nagawan Indo elem nap yak ondosolar-e: ‘Kit meya yidnak amberam tak posolar-e, kinmiri yuwa-o’ luk yak undugun-o.

⁷⁸Nde, nit Nenmbal Pem Nagawan-e indi konak, enabuwa kaso me, nit ninmiri yeklug-e, o kuplila molengen kona pil wasu iri nggal lobok yij-o.

⁷⁹Lobok yid iri-ge, ndamuk arem woragolat, kwiye kali na lesa ninmiri yurak tulabiyem nenpeyekluk-nen lobok yij-o” luk yij-o.

⁸⁰Nde, Sakaria ambara na-ge ebe nggulok yosolat, indi kwat yij-o. At iri-ge Isarael nap inmbiri bem nam yurak tarem wok yigit lak worala-ge, karu me irit woragaij-o.